பதிவு செய்த நாள்
02 ஆக2014
00:21
புதுடில்லி:நீண்ட கால மந்த நிலைக்கு பிறகு, சென்ற ஜூலை மாதத்தில், முன்னணி நிறுவனங்களின் வாகன விற்பனை சூடுபிடித்துள்ளது. இது, சோம்பிக்கிடந்த மோட்டார் வாகன துறைக்கு புத்துணர்வு அளிக்கும் விதமாக அமைந்துள்ளது.
தள்ளுபடி: இதுகுறித்து, ஹூண்டாய் மோட்டார் இந்தியா நிறுவனத்தின், மூத்த துணைத் தலைவர் (விற்பனை மற்றும் சந்தைப்படுத்தல்) ராகேஷ் ஸ்ரீவத்சவா கூறுகையில், ‘சந்தையில் பல்வேறு புதிய வாகனங்களின் அணிவகுப்பு மற்றும் நிறுவனங்கள் அதிகளவில் சிறப்பு தள்ளுபடி சலுகைகளை வழங்கியதன் காரணமாக, வாகனங்களுக்கான தேவை சூடுபிடிக்க துவங்கியுள்ளது’ என்று தெரிவித்தார்.
தயாரிப்பு மற்றும் விற்பனையில் முன்னணியில் உள்ள மாருதி சுசூகி நிறுவனத்தின் கார் விற்பனை, மதிப்பீட்டு மாதத்தில், 21.7 சதவீதம் அதிகரித்து, 1,01,380 ஆக உயர்ந்துள்ளது. இது, கடந்தாண்டின் இதே மாதத்தில், 83,299 ஆக இருந்தது.குறிப்பாக, உள்நாட்டில், இந்நிறுவனத்தின் கார் விற்பனை, 19.9 சதவீதம் உயர்ந்து, 75,145லிருந்து, 90,093 ஆக வளர்ச்சி கண்டுள்ளது.ஹூண்டாய்:கணக்கீட்டு மாதத்தில், ஹூண்டாய் நிறுவனத்தின் உள்நாட்டு கார்கள் விற்பனையும், 12.69 சதவீதம் உயர்ந்து, 25,965லிருந்து, 29,260 ஆக அதிகரித்துள்ளது.ஹோண்டா நிறுவனத்தின் உள்நாட்டு கார்கள் விற்பனை, 39.97 சதவீதம் வளர்ச்சி கண்டு, 11,223லிருந்து, 15,709 ஆக உயர்ந்துள்ளது.
இதே போன்று, டொயோட்டா கிர்லோஸ்கர் மோட்டார் நிறுவனத்தின் உள்நாட்டு கார் விற்பனை, 3.52 சதவீதம் அதிகரித்து, 11,515 என்ற எண்ணிக்கையிலிருந்து, 11,921 ஆக வளர்ச்சி கண்டுள்ளது.
இருசக்கர வாகனம்:ஹீரோ மோட்டோகார்ப் நிறுவனத்தின் ஒட்டு மொத்த இருசக்கர வாகன விற்பனை, மதிப்பீட்டு மாதத்தில், 8.67 சதவீதம் வளர்ச்சி கண்டு, 4,87,545லிருந்து, 5,29,862 ஆக உயர்ந்துள்ளது.யமஹா மோட்டார் இந்தியாவின் உள்நாட்டு இருசக்கர வாகன விற்பனையும், 35.81 சதவீதம் அதிகரித்து, 37,026 என்ற எண்ணிக்கையிலிருந்து, 50,286 ஆக வளர்ச்சி கண்டுள்ளது.
மேலும் ஆட்டோமொபைல் செய்திகள்
|
Advertisement
|
Advertisement
|
Advertisement
|
|
|
|