பதிவு செய்த நாள்
22 அக்2014
00:31
புதுடில்லி:இந்தியாவின் கச்சா எண்ணெய் பொருட்கள் பயன்பாடு, சென்ற செப்டம்பர் மாதத்தில், 3 சதவீதம் அதிகரித்துள்ளது. என்றாலும், டீசல் விற்பனை, நடப்பு நிதியாண்டில், இரண்டாவது முறையாக சரிவை கண்டுள்ளது.
டீசல் விற்பனை:இதன்படி, மதிப்பீட்டு மாதத்தில், உள்நாட்டில், கச்சா எண்ணெய் பொருட்கள் பயன்பாடு, 2.9 சதவீதம் வளர்ச்சி கண்டு, 1.23 கோடி டன்னாக அதிகரித்துள்ளது. இது, கடந்தாண்டு செப்டம்பரில், 1.19 கோடி டன்னாக இருந்தது என, மத்திய பெட்ரோலிய அமைச்சகம் தெரிவித்துள்ளது. கணக்கீட்டு மாதத்தில், ஒட்டு மொத்த டீசல் விற்பனை, 49.08 லட்சம் டன்னிலிருந்து, 48.99 லட்சம் டன்னாக குறைந்துள்ளது.
இதற்கு முன், சென்ற ஏப்ரலில் தான், டீசல் விற்பனை, 61.52 லட்சம் டன்னிலிருந்து, 59.29 லட்சம் டன்னாக குறைந்து காணப்பட்டது. ஆக, நடப்பு நிதியாண்டில், இரண்டாவது முறையாக, உள்நாட்டில் டீசல் விற்பனை சரிவை கண்டுள்ளது.
ஒட்டுமொத்த பெட்ரோலிய பொருட்கள் தேவையில், டீசலின் பங்களிப்பு, 43 சதவீதமாக உள்ளது என்பது குறிப்பிடத்தக்கது.கடந்த 2003 – 04ம் நிதியாண்டு முதல், டீசல் விற்பனை வளர்ச்சி, 6 – 8 சதவீதம் என்ற அளவில் இருந்தது. சென்ற 2013 – 14ம் நிதியாண்டில், முதன் முறையாக, இதன் விற்பனை, 1 சதவீதம் சரிவை கண்டு, 6.83 கோடி டன்னாக சரிவை கண்டது. இதற்கு, மாதந்தோறும், டீசல் விலை, லிட்டருக்கு, 50 காசுகள் உயர்த்தப்பட்டதே முக்கிய காரணம். அதேசமயம், சென்ற செப்டம்பரில், பெட்ரோல் விற்பனை, 21.6 சதவீதம் உயர்ந்து, 15 லட்சம் டன்னாக அதிகரித்துள்ளது.
சமையல் எரிவாயு: இதே போன்று, சமையல் எரிவாயு விற்பனையும், 15 சதவீதம் வளர்ச்சி கண்டு, 15.50 லட்சம் டன்னாக உயர்ந்துள்ளது. அதேசமயம், நாப்தா பயன்பாடு, 9.38 லட்சம் டன்னிலிருந்து, 8.22 லட்சம் டன்னாக சரிவடைந்துள்ளது.கணக்கீட்டு மாதத்தில், உள்நாட்டில், கச்சா எண்ணெய் உற்பத்தி, 1.1 சதவீதம் குறைந்து, 30.40 லட்சம் டன்னாக குறைந்து உள்ளது.இதே போன்று, இயற்கை எரிவாயு உற்பத்தியும், 6.2 சதவீதம் வீழ்ச்சி கண்டு, 271 கோடி கனமீட்டராக சரிவடைந்துள்ளது.
குறிப்பாக ஓ.என்.ஜி.சி., நிறுவனத்தின் இயற்கை எரிவாயு உற்பத்தி, 7.1 சதவீதம் குறைந்து, 177 கோடி கனமீட்டராக வீழ்ச்சி கண்டுள்ளது.உள்நாட்டில் உள்ள 22 கச்சா எண்ணெய் சுத்திகரிப்பு ஆலைகளின் உற்பத்தி, 2.5 சதவீதம் குறைந்து, 1.80 கோடி டன்னாக குறைந்துள்ளது என, பெட்ரோலிய அமைச்சகம் மேலும் தெரிவித்துள்ளது.
மேலும் ஆட்டோமொபைல் செய்திகள்
|
Advertisement
|
Advertisement
|
Advertisement
|
|
|
|