பதிவு செய்த நாள்
31 மே2016
07:34
புதுடில்லி : இந்தாண்டு, ஜன., – மார்ச் வரையிலான காலாண்டில், இந்திய நிறுவனங்களின் வர்த்தக செயல்பாடுகள், அவை, தேக்க நிலையில் இருந்து மீண்டு, எழுச்சிப் பாதைக்கு திரும்புவதை கோடிட்டு காட்டியுள்ளன.
கெய்ர்ன் எனர்ஜி, வேதாந்தா குழுமம், வங்கிகள், நிதி மற்றும் பெட்ரோலிய நிறுவனங்கள் நீங்கலாக, பங்குச் சந்தை பட்டியலில் உள்ள, 1,181 நிறுவனங்கள் குறித்து, ஆய்வு செய்யப்பட்டது.
உயர்ந்த வட்டி விகிதம் அதில், அந்த நிறுவனங்களின் நிகர லாபம், 2015 – 16ம் நிதியாண்டின், ஜன., – மார்ச் வரையிலான, நான்காவது காலாண்டில், முந்தைய நிதியாண்டின், இதே காலாண்டை விட, 41.7 சதவீதம், உயர்ந்திருப்பது தெரியவந்துள்ளது. இதே காலத்தில், அவற்றின் விற்பனை, 4.20 சதவீதம் அதிகரித்துள்ளது.மூலப்பொருட்கள் விலையில் ஏற்பட்ட சரிவு, மிகச் சிறிய அளவில் உயர்ந்த வட்டி விகிதம் உள்ளிட்ட காரணங்களால், இந்த வளர்ச்சி சாத்தியமாகியுள்ளது. இந்நிறுவனங்களின் வருவாய் வளர்ச்சி, தொடர்ந்து, ஒன்றரை ஆண்டுகளாக குறைந்து காணப்பட்டது. கடந்த, 2015, ஏப்., – ஜூன் நீங்கலாக, தொடர்ந்து ஒன்பது காலாண்டுகளாக சரிவடைந்த, புதிய குடியிருப்புகளின் விற்பனை வளர்ச்சி, மதிப்பீட்டு காலாண்டில் உயர்ந்து, நிறுவனங்களின் வருவாய் வளர்ச்சிக்கு துணை புரிந்துள்ளது. ஓராண்டிற்கும் மேலாக, மந்த நிலையில் இருந்த இரு சக்கர வாகன விற்பனை, கடந்த நான்கு மாதங்களாக உயர்ந்து வருகிறது. இது, கிராமப்புறங்களில், இருசக்கர வாகனங்களுக்கான தேவை அதிகரித்து வருவதை உணர்த்துகிறது.
பொருட்களுக்கான தேவைஇதே காலத்தில், நுகர்வோர் சாதனங்களின் விற்பனையும், கிராமம், நகரம் என்ற பாரபட்சமின்றி அதிகரித்துள்ளது. மதிப்பீட்டு காலத்தில், நிறுவனங்களின், விரிவாக்கச் செலவினமும், அன்னிய நேரடி முதலீடுகளும் அதிகரித்து வந்த போதிலும், ஏற்றுமதி, தனியார் முதலீடு மற்றும் பொருட்களுக்கான தேவை குறைந்து இருந்தது. இந்த நிலையிலும், நிறுவனங்களின் விற்பனை மற்றும் லாபம் வளர்ச்சி கண்டுள்ளது குறிப்பிடத்தக்கது. கடந்த, 2012 ஜூன் முதல், மக்களிடம் அவசியமற்ற பொருட்களை வாங்கும் போக்கு குறைந்து காணப்பட்டது. இது, கடந்த மூன்று மாதங்களாக மெல்ல மாறத் துவங்கியுள்ளது. அவ்வகை பொருட்களுக்கான தேவை அதிகரித்துள்ளதை புள்ளி விவரங்கள் காட்டுகின்றன. பல முன்னணி நிறுவனங்கள், வளர்ச்சிப் பாதைக்கு திரும்பிக் கொண்டிருப்பது, ஆய்வில் தெரியவந்துள்ளது.
பஜாஜ் ஆட்டோ நிறுவனத்தின் லாப வரம்பு, 2016, ஜன., – மார்ச் வரையிலான காலாண்டில், 21.3 சதவீதம் உயர்ந்துள்ளது. நடப்பு நிதியாண்டில், விற்பனை, 18 சதவீதம் உயர்ந்து, 46 லட்சமாக அதிகரிக்கும் என, மதிப்பிடப்பட்டுள்ளது. மதிப்பீட்டு காலாண்டில், எல் அண்டு டி நிறுவனத்தின் வருவாயும், நிகர லாபமும், எதிர்பார்த்ததை விட, அதிகரித்துள்ளது.
மேலும் பொது செய்திகள்
|
Advertisement
|
Advertisement
|
Advertisement
|
|
|
|