பதிவு செய்த நாள்
24 ஜூன்2016
07:05
புதுடில்லி : தக்காளி விலை உயர்வு காரணமாக, அதன் பயன்பாடு குறைந்துள்ளது. அதேசமயம், பிரபல நிறுவனங்களின் ‘டொமேட்டோ புரீ, கெட்ச்அப்’ போன்ற தக்காளி கூழ், தக்காளி சட்னி உள்ளிட்ட, உடனடி உணவு வகைகளின் விற்பனை, கடந்த ஒரு மாதத்தில், 40 சதவீதம் உயர்ந்துள்ளதாக, ‘அசோசெம்’ ஆய்வறிக்கையில் தெரிவிக்கப்பட்டுள்ளது.
கர்நாடகா, ஆந்திரா, தெலுங்கானா, மத்திய பிரதேசம், மேற்கு வங்கம், ஒடிசா ஆகிய மாநிலங்கள், தக்காளி உற்பத்தியில் சிறந்து விளங்குகின்றன. நடப்பு, வேளாண் பருவத்தில், நாட்டின் தக்காளி உற்பத்தி, 1.83 கோடி டன்னாக இருக்கும் என, மதிப்பிடப்பட்டுள்ளது. இது, கடந்த ஆண்டு, 1.64 கோடி டன்னாக இருந்தது. தக்காளி உற்பத்தி அதிகம் இருக்கும் என, மதிப்பிடப்பட்ட போதிலும் கடந்த ஒரு மாதத்தில், வரத்து குறைவால், தக்காளி விலை, கிடு கிடுவென உயர்ந்து, ஒரு கிலோ, 100 ரூபாயை எட்டியது. இதனால், அதிர்ச்சி அடைந்த மக்கள், தக்காளி வாங்குவதை குறைத்து, அதற்கு பதிலாக, தக்காளியில் தயாரிக்கப்பட்ட, டொமேட்டோ புரீ, கெட்ச்அப் ஆகியவற்றை வாங்கி, சமையலுக்கு பயன்படுத்த துவங்கியுள்ளனர். இதனால், இவ்வகை பொருட்களின் விற்பனை, கடந்த ஒரு மாதத்தில், 40 சதவீதம் உயர்ந்துள்ளது.
சமையலில்...டில்லி, மும்பை உள்ளிட்ட நகரங்களில், 1,500க்கும் அதிகமான இல்லத்தரசிகளிடம், அசோசெம் நடத்திய ஆய்வில், அவர்கள் தக்காளிக்கு பதிலாக, டொமேட்டோ புரீ, கெட்ச்அப் போன்றவற்றையும், வெண்டைக்காய், பூசணி போன்ற காய்களையும் சமையலுக்கு பயன்படுத்துவது தெரியவந்துள்ளது. பலர், சமையலில், தக்காளிக்குபதிலாக புளி, மாங்காய் ஆகியவற்றை உபயோகிப்பதாக கூறியுள்ளனர்.
அதிக இருப்புஒரு கிலோ தக்காளியின் விலையை விட, டொமேட்டோ புரீ, கெட்ச்அப் ஆகியவற்றின் விலை குறைவாக உள்ளதால், அவற்றை, மக்கள் அதிக அளவில் வாங்கி வருகின்றனர். இதனால், கடந்த இரு வாரங்களில், அப்பொருட்களின் விற்பனை, திடீரென உயர்ந்துள்ளதாக, கடைக்காரர்கள் தெரிவித்துள்ளனர். தேவை அதிகமாக உள்ளதால், டொமேட்டோ புரீ, கெட்ச் அப் உள்ளிட்ட உணவுப் பொருட்களை, வழக்கத்தை விட அதிகமாக இருப்பு வைத்துள்ளதாக, அவர்கள் கூறியுள்ளனர்.
ஜூன் – செப்., வரையிலான காலத்தில் தக்காளி வரத்து குறைந்து, அதன் விலை சற்று உயர்வது வழக்கம். இந்தாண்டு, தென்னிந்தியாவில், பருவம் தவறிய மழையால், பூக்கும் பருவத்தில் இருந்த தக்காளி பயிர்கள் பாழாகி, அதன் உற்பத்தி குறைந்துள்ளதாக கூறப்படுகிறது.
மேலும் பொது செய்திகள்
|
Advertisement
|
Advertisement
|
Advertisement
|
|
|
|