பதிவு செய்த நாள்
28 ஆக2016
02:01
புதுடில்லி:மத்திய அரசு, ரொக்கப்பரிமாற்றங்களை குறைத்து, ‘கிரெடிட், டெபிட்’ கார்டுகள் மற்றும் கணினி வாயிலான மின்னணு பரிவர்த்தனைகளை அதிகரிப்பதன் மூலம், கறுப்பு பணத்தை கட்டுப்படுத்த திட்டமிட்டு, அதற்கான நடவடிக்கைகளை மேற்கொண்டுள்ளது.இதன்படி, முதற்கட்டமாக, கிரெடிட், டெபிட் கார்டுகள் மற்றும் கணினி வாயிலான மின்னணு பணப் பரிமாற்றங்களுக்கு வசூலிக்கப்படும் கூடுதல் வரி, சேவை வரி, பரிவர்த்தனை கட்டணம் ஆகியவற்றை நீக்க, முடிவு செய்துள்ளது.
இத்துடன், குறிப்பிட்ட தொகைக்கு மேற்பட்ட பரிவர்த்தனைகளை, கட்டாயம் கிரெடிட், டெபிட் கார்டுகள் அல்லது மின்னணு முறையில் தான் மேற்கொள்ள வேண்டும் என்ற, திட்டத்தையும் நடைமுறைப்படுத்த தீர்மானித்துள்ளது. இவற்றுடன், கிரெடிட், டெபிட் மற்றும் மின்னணு வாயிலான பணப் பரிவர்த்தனை ஊக்குவிப்பு திட்டங்கள் குறித்து ஆராய்வதற்கு, உயர்மட்டக் குழு ஒன்றை அமைப்பதற்கு, மத்திய அமைச்சரவைக் குழு ஏற்கனவே ஒப்புதல் அளித்துள்ளது.
இந்நிலையில், மத்திய நிதியமைச்சகம், கிரெடிட், டெபிட் கார்டுகள் மற்றும் மின்னணு பரிமாற்றங்களை ஊக்குவிப்பது தொடர்பாக ஆராய்ந்து அறிக்கை அளிக்க, உயர்மட்டக் குழு ஒன்றை அமைத்துள்ளது. நிதித்துறை முன்னாள் செயலர் ரத்தன் பி.வாட்டல் தலைமையில் அமைக்கப்பட்டுள்ள, 11 உறுப்பினர்களைக் கொண்ட இக்குழு, ஓராண்டிற்குள், அதன் பரிந்துரையை, நிதியமைச்சகத்திடம் வழங்கும்.
இதுகுறித்து, நிதியமைச்சக அதிகாரி ஒருவர் கூறியதாவது:உயர்மட்டக்குழு, கிரெடிட், டெபிட் கார்டுகள் மற்றும் மின்னணு வாயிலான பணப்பரிவர்த்தனைகளுக்கு, வரி விலக்கு, பணம் திரும்பப் பெறுவது உள்ளிட்ட சலுகைகள்வழங்குவது குறித்து ஆராயும். இத்தகைய பரிவர்த்தனைகளின் ஒருங்கிணைந்த தகவல் தொகுப்பை உருவாக்குவது குறித்தும் பரிசீலிக்கும். இதன் மூலம், வர்த்தகர்களும், நுகர்வோரும், தங்களின் அனைத்து மின்னணு சார்ந்த பணப் பரிவர்த்தனைகளை உடனுக்குடன் அறிந்து கொள்ள முடியும். கிரெடிட், டெபிட் கார்டு மற்றும் மின்னணு பரிவர்த்தனைகள் அனைத்தையும், ஒற்றை சாளர வழிமுறையில் இணைப்பது குறித்தும், உயர்மட்டக்குழு பரிசீலிக்கும்.
பல்வேறு அரசு அமைப்புகளில், வெவ்வேறு வலைதளங்கள் வாயிலாக மேற்கொள்ளப்படும் பணப்பரிவர்த்தனைகளை, ஒரே குடையின் கீழ் கொண்டு வருவது குறித்தும், உயர்மட்டக்குழு பரிசீலித்து, அதன் பரிந்துரைகளை வழங்கும்.இவ்வாறு அவர் கூறினார்.
மேலும் பொது செய்திகள்
|
Advertisement
|
Advertisement
|
Advertisement
|
|
|
|