பதிவு செய்த நாள்
24 ஏப்2017
04:14
பணம் என்பது ஒரு கருவி தான், அதை சரியாக பயன்படுத்த நிதி திட்டம் தேவை என்கிறார் ரெஜினா லீட்ஸ். அவர் எழுதிய, ‘ஆர்கனைஸ்டு பைனான்சியல் லைப்’ புத்தகத்தில் நிதி திட்டமிடலுக்கான வழியை விவரிக்கிறார். பணத்திற்கு ஏதோ மந்திர சக்தி இருப்பதாக நாம் நினைக்கிறோம். பணம் கை நழுவி செல்வது பற்றி அல்லது பாக்கெட்டை பதம் பார்ப்பது பற்றி, அச்சம் கொள்கிறோம். ஆனால், பணம் நல்லதும் அல்ல; தீயதும் அல்ல. ஆனால், பணத்தை சிறப்பாக நிர்வகிக்க முடியும் என்றால், அது நம் வாழ்க்கையில் மிகுந்த நன்மைகளை ஏற்படுத்தி தரும்.
பணம் என்பது ஒரு கருவி தான். அதன் ஆற்றல் அதை நாம் பயன்படுத்தும் விதத்தில் தான் இருக்கிறது. நல்ல திட்டமிடல் இல்லாவிட்டால் பணத்தால் சிக்கல் ஏற்படலாம்.உங்கள் கோப்புகள் மற்றும் பில்களை ஒழுங்குப்படுத்துவது, தற்போதைய நிதி நிலையை அறிவது, வரி சேமிப்பு, பில்களை முறையாக செலுத்துவது, பட்ஜெட்டிற்குள் செயல்படுவது, பிள்ளைகளுக்கு பணம் பற்றி கற்றுத்தருவது, தேவையில்லாத செலவுகளை கட்டுப்படுத்துவது, கடைசி நேரத்தில் வரி சேமிப்பு முடிவுகளை மேற்கொள்வதை தவிர்ப்பது உள்ளிட்டவை மிகவும் அவசியம்.
பணத்தை நிர்வகிப்பதை கையில் எடுத்துக் கொள்ள பலரும் தயங்கலாம்; தள்ளிப் போடலாம். இதை எங்கிருந்து துவங்குவது என்று தெரியாமல் தடுமாறலாம். முதலீடு தொடர்பாக தவறான முடிவு எடுத்து விடுவோமோ என அஞ்சலாம். எனினும், நிதி கல்விக்கான அடிப்படை எளிமையானவை. நிதி திட்டமிடலை படிப்படியாக மேற்கொள்ளலாம். எந்த ஒரு திட்டத்தின் முதல் அம்சம் தேவையில்லாதவற்றை அகற்றுவதாகும். இது ஒரு சுவாரஸ்யமான முயற்சியாகவும் கூட இருக்கும். தேவையில்லாத பொருட்களை நன்கொடையாக அளிக்கலாம். நிதி திட்டமிடலில் நீக்குவதும், அழிப்பதும் உங்கள் சிறந்த நண்பராக விளங்கும். இந்த செயலுக்குப் பின், நீங்கள் ஒரு தெளிவை உணரும் வாய்ப்பு இருக்கிறது. தேவையில்லாதவற்றை நீங்கள் வாங்குவதையும் தவிர்க்கலாம். வீணான விஷயங்களை அகற்றுவதற்கான புதிய வழிகளை நீங்கள் கண்டறியலாம்.
அடுத்த கட்டம் வகைப்படுத்துவது. உண்மையில் இது முந்தைய கட்டத்தில் இருந்தே துவங்கி விடுகிறது. நீங்கள் தேவை என தேர்வு செய்திருக்கும் விஷயங்களை அவற்றுக்குரிய வகையில் பிரித்தாலே போதுமானது. வகைப்படுத்துவது உங்களுக்கு ஆற்றலை அளிக்கும். ஏற்கனவே உள்ள பொருட்களை வாங்குவதை தவிர்க்கலாம். இதன் மூலம் சேமிப்பும் அதிகமாகும். மேலும், வகைப்படுத்துவதன் மூலம் பாலிசிகள், வரிச்சான்றிதழ்கள் எல்லாவற்றையும் ஒழுங்குப்படுத்தலாம். அவை அங்கும் இங்கும் சிதறிக்கிடப்பதை தவிர்க்கலாம். தொடர்புடைய விஷயங்களை ஒருங்கிணைத்து வைப்பது உங்களுக்கு கட்டுப்பாட்டை அளிக்கும். இதன் பின், பயனுள்ள குறிப்புகளை அமல் செய்யத் துவங்கலாம்.
மேலும் வங்கி மற்றும் நிதி செய்திகள்
|
Advertisement
|
Advertisement
|
Advertisement
|
|
|
|