பதிவு செய்த நாள்
13 செப்2017
23:43
ஜி.எஸ்.டி.ஆர்., டிரான் – 1 படிவத்தை, எந்த தேதிக்குள் தாக்கல் செய்ய வேண்டும்? ஏற்கனவே தாக்கல் செய்யப்பட்ட, டிரான் – 1 படிவத்தில் திருத்தம் செய்ய இயலுமா?– ராஜ்குமார், நெய்வேலி
ஜி.எஸ்.டி., சட்டம் அறிமுகம் செய்த போது, ஜி.எஸ்.டி., டிரான் – 1 படிவம் தாக்கல் செய்வதற்கான தேதி, 30ம் தேதி என, இருந்தது. இந்த தவணை தேதி, மேலும் ஒரு மாதம் நீட்டிக்கப்பட்டு, அக்., 31க்குள், ஜி.எஸ்.டி., டிரான் – 1 படிவத்தை தாக்கல் செய்ய வேண்டும். மேலும், தாக்கல் செய்யப்பட்ட, டிரான் – 1 படிவத்தில், ஒருமுறை மாற்றம் செய்ய அனுமதிக்கப்பட்டு உள்ளது.
*****
நான், என்னுடைய கட்டடத்தை, ஒரு தனியார் பைனான்ஸ் கம்பெனிக்கு மாத வாடகைக்கு விட்டுள்ளேன். இதுவரை, வாடகை பணத்தில், வருமான வரியை பிடித்தம் செய்து, வாடகையை செலுத்தி வந்தனர். தற்போது, வருமான வரியுடன், ஜி.எஸ்.டி.,யையும் சேர்த்து, பிடித்தம் செய்து வாடகையை செலுத்துகின்றனர். இது, எந்த வகையில் சரி என்பதை விளக்கவும்.– சந்தானம், சிவகாசி
உங்கள் கட்டடத்தில் வாடகைக்கு இருக்கும் தனியார் நிறுவனம், ஜி.எஸ்.டி., பதிவு பெற்றுள்ளது என்றால், இந்த பரிவர்த்தனைக்கு, அவர்கள், ‘ரிவெர்ஸ் சார்ஜ்’ முறையில், ஜி.எஸ்.டி.,யை, அரசுக்கு செலுத்த வேண்டும். அவர்கள் செலுத்திய வரியை, உள்ளீட்டு வரி பயனாக பெறலாம். உங்களுக்கு வழங்கக்கூடிய வாடகை தொகையில், ஜி.எஸ்.டி.,யை காரணம் காட்டி, எந்த ஒரு பிடித்தமும் அவர்கள் செய்யக் கூடாது. முன் செய்தது போலவே, வருமான வரி பிடித்தம் மட்டுமே, அவர்கள் செய்ய வேண்டும்.
*****
சார், நான், வெள்ளி கொலுசு வியாபாரம் செய்கிறேன். ‘வாட்’ வரி இருந்த போது இதற்கு வரி இல்லை. தற்போது, 3 சதவீத வரி உள்ளது. பழைய கொலுசுகளை வாடிக்கையாளர்கள் எங்களிடம் அளித்து, புது கொலுசு வாங்கிக் கொள்வர். அப்படி, நாங்கள் கொலுசுகளை வாங்கும் போது, ‘ரிவெர்ஸ் சார்ஜ்’ வரி செலுத்த வேண்டுமா?– ஹரிவாசன், இளையான்குடி
நீங்கள், பதிவு செய்யாத வணிகரிடமிருந்து நகைகளை வாங்கினால் மட்டுமே, ‘ரிவெர்ஸ் சார்ஜ்’ முறையில் வரி செலுத்த வேண்டும். அதுவே, வாடிக்கையாளரிடமிருந்து பழைய கொலுசுகளை வாங்கினால், அதற்கு, ‘ரிவெர்ஸ் சார்ஜ்’ முறையில் வரி விதிக்கப்படாது.
*****
ஜூன், 30ல், எங்களிடம் இறக்குமதி செய்யப்பட்ட கையிருப்பு சரக்கு உள்ளது. அதில் செலுத்தியிருந்த சுங்க வரியை, உள்ளீட்டு வரி பயனாக பெறுவதற்கு வழி உள்ளதா? சுங்க வரி தொகை, 2 லட்சம் ரூபாய்க்கும் மேல் இருக்கும். தயவு கூர்ந்து விளக்கவும்.– உமா மகேஸ்வரி, மேற்கு மாம்பலம்
நீங்கள் செலுத்திய சுங்க வரிக்கு, உள்ளீட்டு வரி பயன் கிடைக்காது. இறக்குமதியின் போது செலுத்திய, கலால் வரியை பயனாக பெறலாம்.
*****
நான், இந்தியாவில் இருக்கும் அனைத்து மாநில மாணவர்களுக்கும், கல்வி சேவை செய்து வருகிறேன். கல்வி சேவைக்கு, ஜி.எஸ்.டி., வசூல் செய்ய வேண்டுமா? ஆண்டு வருமானம், 20 லட்சம் ரூபாய்க்கு மேல் இருந்தால், நான், அவர்களிடம், ஜி.எஸ்.டி., வசூல் செய்ய வேண்டுமா?– ரஞ்சித், சென்னை
நீங்கள் குறிப்பிடும் சேவைக்கு, 18 சதவீதம் வரி விதிக்க வேண்டும். நீங்கள், அனைத்து மாநிலங்களுக்கும் சென்று சேவை வழங்குவதால், உங்கள் வருமானம், 20 லட்சம் ரூபாய்க்கு குறைவாக இருப்பினும், ஜி.எஸ்.டி., பதிவை பெற வேண்டும். ஜி.எஸ்.டி., பதிவை பெற்ற பின், வரி வசூல் செய்து, அரசுக்கு செலுத்த வேண்டும்.
*****
சார், நான், எல்.இ.டி., பல்புகள் முகவராக உள்ளேன். இதன், எச்.எஸ்.என்., குறியீட்டு எண் மற்றும் வரி விகிதத்தை தெரியப்படுத்தவும்.– சங்கர நாராயணன், நெல்லை
நீங்கள் குறிப்பிட்ட பொருளை, 8539 எனும், எச்.எஸ்.என்., குறியீட்டில் வகைப்படுத்தப்படும். இதற்கு நீங்கள், 12 சதவீத வரி விதிக்க வேண்டும்.
-ஜி.சேகர், எப்.சி.ஏ., ஆடிட்டர்
மேலும் பொது செய்திகள்
|
Advertisement
|
Advertisement
|
Advertisement
|
|
|
|