பதிவு செய்த நாள்
10 ஏப்2018
05:15
புதுடில்லி;பொதுத் துறை நிறுவனங்களில், பொது பங்கு மூலதன வரம்புக்கு அளித்துள்ள அவகாசத்தை, மேலும் நீட்டிக்குமாறு, ‘செபி’யிடம், மத்திய நிதியமைச்சகம் விண்ணப்பிக்க உள்ளது.பொதுத் துறை நிறுவனங்களில், சில்லரை முதலீட்டாளர்களின் பங்களிப்பை அதிகரிக்கவும், அந்நிறுவனங்களின் பங்கு விற்பனை மூலம், அரசு வருவாய் ஈட்டவும், 2014 ஜூனில், ஓர் உத்தரவை செபி பிறப்பித்தது.
அதில், ‘பங்குச் சந்தை பட்டியலில் உள்ள நிறுவனங்களின் பங்குகளில், நிறுவனர்கள் சாராமல், பொது முதலீட்டாளர்களுக்கு, குறைந்தபட்சம், 25 சதவீத பங்குகள் ஒதுக்க வேண்டும்’ என, தெரிவிக்கப்பட்டு இருந்தது.இதன்படி, 2017, ஆக., 21க்குள், பங்குச் சந்தை பட்டியலில் உள்ள, பொதுத் துறை நிறுவனங்கள், பங்குகளை ஒதுக்கியிருக்க வேண்டும். ஆனால், அவ்வாறு செய்யாததால், ஓராண்டு அவகாசம் அளிக்கப்பட்டது. அதன்படி, வரும் ஆக., 21க்குள், பொதுத் துறை நிறுவனங்கள், பங்குகளை ஒதுக்க வேண்டும்.
இது குறித்து, மத்திய நிதியமைச்சக அதிகாரி ஒருவர் கூறியதாவது:செபி உத்தரவுப்படி, அடுத்த ஐந்து மாதங்களுக்குள், பொதுத் துறையைச் சேர்ந்த, 12க்கும் மேற்பட்ட நிறுவனங்கள், தலா, 25 சதவீத பங்குகளை விற்பனை செய்ய வேண்டும். அது, இயலாத காரியம் என, அரசு கருதுகிறது.ஏனெனில், ஒரு சில பொதுத் துறை நிறுவனங்களில், பெரும்பான்மை பங்குகளை விற்பனை செய்வதற்கான முயற்சி நடைபெறுகிறது. சில நிறுவனங்களின் இணைப்பு நடவடிக்கைகள் தொடர்பாகவும் பரிசீலிக்கப்படுகிறது.அதனால், பங்கு வரம்பை குறைக்க, மேலும் அவகாசம் அளிக்குமாறு, செபியிடம் விண்ணப்பிக்கப்படும் என, தெரிகிறது.இவ்வாறு அவர் கூறினார்.
எப்படி உயர்த்தலாம்?
பங்குச் சந்தை பட்டியலில் உள்ள நிறுவனங்கள், பங்கு விற்பனை மூலம், பொது முதலீட்டாளர்களின் பங்கு மூலதனத்தை, குறைந்தபட்சம், 25 சதவீதமாக உயர்த்த, பல வழிகள் உள்ளன.பொது பங்கு வெளியீடு; ஏல முறை பங்கு விற்பனை; நிறுவனர்கள், நிறுவனங்களுக்கான ஒதுக்கீட்டு பிரிவில், பங்குகளை விற்பனை செய்வது போன்ற வழிமுறைகளை நாடலாம். மேலும், பங்கு முதலீட்டாளர்களுக்கு உரிமைப் பங்குகளை வெளியிட்டும், ‘போனஸ்’ பங்குளை வழங்கியும், பங்கு மூலதனத்தை குறைத்துக் கொள்ளலாம்.தகுதியுள்ள நிறுவனங்களுக்கான பிரிவில், நிறுவனர்கள் அல்லது நிறுவனர்களை உள்ளடக்கிய குழுக்கள், 2 சதவீதம் வரை, மொத்தமாக விற்பனை செய்யவும் வழி உள்ளது.
மேலும் பங்கு வர்த்தகம் செய்திகள்
|
Advertisement
|
Advertisement
|
Advertisement
|
|
|
|