பதிவு செய்த நாள்
04 மே2018
00:58
மும்பை:‘இந்தியாவில் தங்கத்தின் தேவை குறைந்துள்ளது’ என, உலக தங்க கவுன்சில் தெரிவித்துள்ளது.
இது குறித்து, இக்கவுன்சில் வெளியிட்டுள்ள அறிக்கை:இந்தாண்டு, ஜன., – மார்ச் வரையிலான காலாண்டில், இந்தியாவில் தங்கத்திற்கான தேவை, 12 சதவீதம் குறைந்து, 115.6 டன்னாக சரிவடைந்துள்ளது. இது, கடந்த ஆண்டு, இதே காலாண்டில், 131.2 டன்னாக இருந்தது.
சுப முகூர்த்தம்
இதே காலத்தில், தங்கத்தின் தேவை, மதிப்பு அடிப்படையில், 8 சதவீதம் குறைந்து, 34 ஆயிரத்து, 440 கோடியில் இருந்து, 31 ஆயிரத்து, 880 கோடி ரூபாயாக சரிவடைந்துள்ளது.இந்தியாவில் தங்கத்திற்கான தேவை குறைய, பல காரணங்களை கூறலாம். பிப்., 1ல் தாக்கல் செய்யப்பட்ட, மத்திய பட்ஜெட்டில், தங்கம் இறக்குமதி வரி குறைக்கப்படும் என்ற எதிர்பார்ப்பு இருந்தது.
கடந்த ஆண்டின் முதல் காலாண்டை விட, நடப்பாண்டின் முதல் காலாண்டில், சுப முகூர்த்த நாட்கள் குறைவாக இருந்தன. மேலும், தங்கம் விலையும் அதிகமாக இருந்தது. அமைப்பு சாரா துறையினர், ஜி.எஸ்.டி., முறைக்கு மாறுவதில் சந்தித்த பிரச்னைகளும், தங்கத்திற்கான தேவைப்பாடில் சிறிது தாக்கத்தை ஏற்படுத்தி உள்ளது.
மேலும், பஞ்சாப் நேஷனல் வங்கியில், வைர வியாபாரிகளான, நிரவ் மோடி, மெகுல் சோக்ஸி ஆகியோரின், 13 ஆயிரம் கோடி ரூபாய் மோசடியாலும், தங்கம் மீதான வர்த்தகம் சுணக்கம் கண்டுள்ளது.இது போன்ற காரணங்களால், மதிப்பீட்டு காலாண்டில், தங்கத்திற்கான தேவை குறைந்திருந்தது.
இந்தாண்டின் முதல் காலாண்டில், தங்க ஆபரணங்களுக்கான தேவை, 12 சதவீதம் குறைந்து, 87.7 டன்னாக சரிவடைந்துள்ளது. இது, கடந்த ஆண்டு இதே காலாண்டில், 99.2 டன்னாக இருந்தது.
வரி சேமிப்பு
இதே காலத்தில், மதிப்பு அடிப்படையிலான தங்க ஆபரணங்கள் விற்பனை, 7 சதவீதம் சரிவடைந்து, 26 ஆயிரத்து, 50 கோடியில் இருந்து, 24 ஆயிரத்து, 130 கோடி ரூபாயாக குறைந்துள்ளது.மறுசுழற்சி செய்யப்பட்ட தங்கத்தின் அளவு, 3 சதவீதம் குறைந்து, 14.5 டன்னில் இருந்து, 14.1 டன்னாக இறக்கம் கண்டு உள்ளது.
இந்தாண்டின் முதல் காலாண்டு, தங்கம் வணிகத்திற்கு அவ்வளவு சிறப்பாக இல்லை. நிதியாண்டின் முடிவையொட்டி, மக்களின் கவனம், வரி சேமிப்பு இனங்களின் மீது திரும்பியிருந்தது.இவ்வாறு அதில் கூறப்பட்டுள்ளது.
இந்தாண்டு, ஜன., – மார்ச் காலாண்டில், தங்கம் இறக்குமதி, 50 சதவீதம் குறைந்து, 153 டன்னாக சரிவடைந்தது. இது, 2017 ல், இதே காலாண்டில், 260 டன்னாக இருந்தது. இந்தாண்டும், தங்கம் இறக்குமதியில் அதிக மாற்றம் இருக்காது எனத் தெரிகிறது. முழு ஆண்டில், தங்கத்திற்கான தேவை, 700 – -800 டன்னாக இருக்கும் என, மதிப்பிடப்பட்டுள்ளது.
நாட்டின் பொருளாதார வளர்ச்சி, கிராமப்புற மக்களின் வருவாய் உயர்வு, சிறப்பான பருவ மழை குறித்த கணிப்பு ஆகியவை, தங்கத்திற்கான தேவையை அதிகரிக்க துணை புரியும்.பி.ஆர்.சோமசுந்தரம்
நிர்வாக இயக்குனர், உலக தங்க கவுன்சில்
மேலும் பொது செய்திகள்
|
Advertisement
|
Advertisement
|
Advertisement
|
|
|
|