பதிவு செய்த நாள்
15 மே2018
02:47
ஊட்டி:நீலகிரி மாவட்ட கூட்டுறவு தொழிற்சாலைகளில், தேயிலை கொள்முதலில், ‘கோட்டா’ முறை அமல்படுத்தப்பட்டுள்ளதால், நாளொன்றுக்கு, 3 லட்சம் கிலோ பசுந்தேயிலை வீணாகி வருகிறது.
நீலகிரி மாவட்டத்தில், 16 கூட்டுறவு தேயிலை தொழிற்சாலைகள் செயல்படுகின்றன. இவற்றில் உறுப்பினர்களாக உள்ள, 30 ஆயிரம் விவசாயிகள்,தங்களது தோட்டத்தில் பறிக்கும் பசுந்தேயிலையை அந்தந்த கூட்டுறவுதொழிற்சாலைக்கு வினியோகித்து வருகின்றனர். நடப்பாண்டு கோடை மழை அதிகளவில் பெய்ததால், பசுந்தேயிலை வரத்து அதிகரிக்க துவங்கியது.மே முதல் வாரத்திலிருந்து, பெரும்பாலான கூட்டுறவு தொழிற்சாலைகளில் நாளொன்றுக்கு, 25 ஆயிரம் கிலோ பசுந்தேயிலை கொள்முதல் செய்யப்பட்டது. கடந்த மூன்று நாட்களாக பசுந்தேயிலை கொள்முதல், 55 ஆயிரம் கிலோவை எட்டியது.
இந்நிலையில், கூட்டுறவுதொழிற்சாலைகளின், பசுந்தேயிலை அரவை திறன், நாளொன்றுக்கு, 25 ஆயிரம் கிலோ மட்டுமே என்பதால், தற்போது அதிகரித்துள்ள பசுந்தேயிலை முழுவதையும் கொள்முதல்செய்ய முடியாத சூழ்நிலை நிர்வாகங்களுக்கு ஏற்பட்டு உள்ளது.நேற்று முதல் குறிப்பிட்ட அளவில் பசுந்தேயிலை வாங்கும் நோக்கில் மஞ்சூர், பிக்கட்டி, எடக்காடு உட்பட பெரும்பாலான கூட்டுறவு தொழிற்சாலைகளில், ‘கோட்டா’ முறை அமலானது. நாளொன்றுக்கு சராசரியாக, 3 லட்சம் கிலோ பசுந்தேயிலை, தோட்டத்தில் வீணாகி வருகிறது.
இம்மாதம் இறுதி வரை, இம்முறை நீட்டிக்கப்படுவதால், சராசரியாக, 30 முதல், 40 லட்சம் கிலோ பசுந்தேயிலை, தோட்டத்தில் வீணாகும் சூழல் உருவாகியுள்ளது.கூட்டுறவு தொழிற்சாலை நிர்வாக இயக்குனர் கணபதி கூறுகையில், ‘‘பசுந்தேயிலை கொள்முதல் வழக்கத்தை விட அதிகரிப்பால், ‘கோட்டா’ முறை அமல்படுத்தியுள்ளோம். வரத்து குறையும் வரை இம்முறை தொடரும்,’’ என்றார்.
அரவை திறனை அதிகரிக்க வேண்டும்!
கூட்டுறவு தொழிற்சாலைகளை மேம்படுத்தி, கட்டமைப்பு வசதியை ஏற்படுத்தி, அரவை திறனை அதிகப்படுத்தினால் மட்டுமே, வரத்து அதிகரிக்கும் சமயத்தில் பசுந்தேயிலை முழுவதையும் கொள்முதல் செய்ய முடியும். ஆனால், பல ஆண்டுகளாக வரத்து அதிகரிக்கும் காலத்தில், ‘கோட்டா’ முறை அமல்படுத்துவதால் பல லட்சம் கிலோ பசுந்தேயிலை வீணாகிறது.
விவசாயிகளுக்கு பல கோடி ரூபாய் நஷ்டம் ஏற்படுகிறது. ஆண்டு தோறும் தொடர்கதையாகும் கோட்டா முறைக்கு நிரந்தர தீர்வு ஏற்படுத்த, இயந்திரங்களின் அரவை திறனை அதிகரிக்க, அதிகாரிகள் நடவடிக்கை எடுக்க வேண்டியது அவசியம்.
மேலும் பொது செய்திகள்
|
Advertisement
|
Advertisement
|
Advertisement
|
|
|
|