பதிவு செய்த நாள்
17 மே2018
01:32
கோவை : கடந்த ஏப்ரலில் நுால், துணி வகைகள் மற்றும் வீட்டு உபயோக ஜவுளிப் பொருட்கள் ஏற்றுமதி, 885 கோடி ரூபாய் அதிகரித்துள்ளது. இதனால், இந்திய ஜவுளித்துறை தொடர்ந்து ஏறுமுகத்தில் உள்ளது.
நேற்று முன்தினம், மத்திய வர்த்தக அமைச்சகம், ஏற்றுமதி விபரங்களை வெளியிட்டுள்ளது. அதில், 2017 ஏப்ரலில் நுால், துணி மற்றும் வீட்டு உபயோக ஜவுளிப் பொருட்கள் ஏற்றுமதி, 4,999 கோடி ரூபாயாக இருந்தது. இந்த ஆண்டு ஏப்ரல் மாதத்தில், 5,884 கோடி ரூபாயாக அதிகரித்துள்ளது. ஏற்றுமதி வளர்ச்சி, 17.69 சதவீதம் என கூறப்பட்டுள்ளது.
சுணக்கம் :
செயற்கை நுால் வகைகளான, ‘பாலியஸ்டர், விஸ்கோஸ்’ போன்றவற்றின் ஏற்றுமதி, 2017 ஏப்ரலில், 2,629 கோடியாக இருந்தது, 2018 ஏப்ரலில், 2,743 கோடி ரூபாயாக அதிகரித்து, 4.35 சதவீத வளர்ச்சியை எட்டிஇருக்கிறது. அதேநேரத்தில், ஆயத்த ஆடைகள் ஏற்றுமதி, 2017 ஏப்ரலில், 11 ஆயிரத்து, 272 கோடியாக இருந்தது; 2018 ஏப்ரலில், 8,859 கோடி ரூபாயாக குறைந்துள்ளது.
நுால் மற்றும் செயற்கை நுாலிழை ஏற்றுமதி உயர்வுக்கு, உள்நாடு மற்றும் வெளிநாட்டு தேவை அதிகரிப்பு தான் பிரதான காரணம் என்று கூறப்படுகிறது. ஆனால், கடந்த நான்கு மாதங்களாக தொடர்ந்து, ஆயத்த ஆடை துறை சரிவில் இருக்கிறது. இந்த சுணக்கம் தொடரும் என்றே ஜவுளித் துறையினர் அஞ்சுகின்றனர்.
போட்டி :
இதற்கு வியட்னாம், சீனா மற்றும் வங்கதேசத்தின் கடும் போட்டியே காரணம். அந்நாடுகளுக்கு சர்வதேச சந்தையில் இறக்குமதி வரி கிடையாது என்பது கூடுதல் சாதகமாக இருப்பதால், இந்திய ஜவுளித் துறை தள்ளாடுகிறது. எனவே, அரசு இத்துறைக்கு குறுகிய கால சலுகைகளை அளிப்பது, புதிய சந்தை வாய்ப்புகளை உருவாக்குவது மற்றும் உற்பத்தி திறனில் கவனம் செலுத்துவது, நடவடிக்கைகளை மேற்கொள்வது போன்ற தீர்வுகள் முன்வைக்கப்படுகின்றன. ஏனெனில், சிறு, குறு முதலீட்டில் அதிகமானோருக்கு வேலை வாய்ப்பு அளிப்பது ஜவுளித் துறையாகும்.
‘இந்தியன் டெக்ஸ்பிரனர்ஸ் அசோசியேஷன்’ ஒருங்கிணைப்பாளர் பிரபு தாமோதரன் கூறுகையில், ‘‘உள்நாட்டு நுால் தேவை, வெளிநாட்டு ஏற்றுமதி ஆர்டர்கள் தொடர்ந்து நல்ல நிலையில் இருப்பதால், நுால், துணி வகைகள் மற்றும் வீட்டு உபயோக ஜவுளிப் பொருட்களின் ஏற்றுமதி தொடர்ந்து அதிகரிக்கும். ‘‘நுால் விலையும் தொடர்ந்து நிலையாகவும் ஏறுமுகத்திலும் இருப்பது, இந்திய ஜவுளித் துறைக்கு நல்ல செய்தியாகும்,’’ என்றார்.
மேலும் பொது செய்திகள்
|
Advertisement
|
Advertisement
|
Advertisement
|
|
|
|