பதிவு செய்த நாள்
14 ஆக2019
23:33
புதுடில்லி:நாட்டின், மொத்த விலை பணவீக்கம், 25 மாதங்களில் இல்லாத அளவுக்கு, ஜூலை மாதத்தில், 1.08 சதவீதமாக குறைந்துள்ளது.எரிபொருட்களின் விலையில் ஏற்பட்ட சரிவே, மொத்த விலை பணவீக்கம் குறைய காரணமாக அமைந்துஉள்ளது.
ஜூன் மாதத்தில், மொத்த விலை பணவீக்கம், 2.02 சதவீதமாக இருந்தது குறிப்பிடத்தக்கது.
மேலும், ஜூலை மாதத்தில், மொத்த விலை பணவீக்கம், 1.93 சதவீதமாக இருக்கும் என்ற கணிப்புக்கு மாறாக, 1.08 சதவீதமாக குறைந்துள்ளது. ஜூலை மாதத்தில், எரிபொருள் விலை சரிவடைந்ததை அடுத்து, உணவு மற்றும் தயாரிப்பு பொருட்கள் விலையும் குறைந்தது.
இதையடுத்து, உணவு, எரிபொருள், தயாரிப்பு பொருட்கள் ஆகியவற்றின் விலை குறைந்ததன் காரணமாக, மொத்த விலை பணவீக்கமும் குறைந்துள்ளது.
மாற்றம்
உணவுப் பொருட்களின் பணவீக்கம், ஜூன் மாதத்தில், 6.98 சதவீதமாக இருந்த நிலையில், ஜூலையில், 6.15 சதவீதமாக குறைந்துஉள்ளது.எரிபொருட்களின் பணவீக்கம், ஜூன் மாதத்தில் மைனஸ் 2.2 சதவீதமாக இருந்த நிலையில், கணக்கீட்டு மாதத்தில், மைனஸ் 3.64 சதவீதமாக குறைந்து, மாற்றம் கண்டுள்ளது.இதேபோல், தயாரிப்பு பொருட்களின் பணவீக்கம், ஜூன் மாதத்தில், 0.94 சதவீதமாக இருந்த நிலையில், ஜூலையில், 0.34 சதவீதமாக குறைந்துள்ளது.
அடிப்படை தேவைகளுக்கான பொருட்களின் பணவீக்கம், ஜூன் மாதத்தில், 6.72 சதவீதமாக இருந்தது. இது, ஜூலையில், 5.03 சதவீதமாக குறைந்துள்ளது.இதேபோல், காய்கறிகளின் பணவீக்கம், 24.76 சதவீதத்திலிருந்து, 10.67 சதவீதமாகவும், பாலின் விலை, 0.91 சதவீதத்திலிருந்து, 0.28 சதவீதமாகவும், உருளைக் கிழங்கின் விலை, மைனஸ் 23.63 சதவீதமாகவும், ஜூலை மாதத்தில் சரிவை கண்டுள்ளன.
தயாரிப்பு பொருட்களின் பிரிவில், ரசாயனம் மற்றும் ரசாயன தயாரிப்புகள், 1.45 சதவீதத்திலிருந்து, 0.42 சதவீதமாகவும்; ஜவுளி, 2.67 சதவீதத்திலிருந்து, 1.36 சதவீதமாகவும், ஜூலை மாதத்தில் குறைந்துள்ளன.
ரெப்போ வட்டி
அடிப்படை உலோகங்களின் விலையும், மைனஸ் 4.27 சதவீதமாக சரிந்துள்ளது குறிப்பிடத்தக்கது.இதற்கிடையே, நேற்று முன்தினம் அறிவிக்கப்பட்ட, சில்லரை விலை பணவீக்கம் ஜூன் மாதத்தில், 3.18 சதவீதத்திலிருந்து சற்று குறைந்து, ஜூலை மாதத்தில், 3.15 சதவீதமாகி உள்ளது.ரிசர்வ் வங்கி, அதன் வட்டி விகிதம் குறித்த அறிவிப்பை, சில்லரை பணவீக்கத்தின்
அடிப்படையிலேயே நிர்ணயிக்கிறது.
வங்கிகளுக்கு வழங்கும் கடனுக்கான, ரெப்போ வட்டி விகிதத்தை, 0.35 சதவீதம் குறைத்துள்ளதாக, ரிசர்வ் வங்கி சமீபத்தில் அறிவித்தது.இந்த ஆண்டில், நான்காவது முறையாக வட்டி விகிதத்தை, ரிசர்வ் வங்கி குறைத்து அறிவித்துள்ளது. இதையடுத்து, வட்டி விகிதமானது, 5.4 சதவீதமாக குறைந்துள்ளது.கடந்த, 2010 ஏப்ரல் மாதத்துக்குப் பின், இது தான் மிகக் குறைவான வட்டி விகிதம்.
முக்கிய காரணி
உணவு, எரிபொருள், தயாரிப்பு பொருட்கள் ஆகிய மூன்றின் விலை குறைவே, மொத்தவிலை பணவீக்கம் குறைந்ததற்கான முக்கிய காரணியாகும்.
மேலும் பொது செய்திகள்
|
Advertisement
|
Advertisement
|
Advertisement
|
|
|
|