பதிவு செய்த நாள்
20 மார்2012
10:38
நகைக்கடை உரிமையாளர்கள் நடத்திய, நாடு தழுவிய கடையடைப்பால், மத்திய, மாநில அரசுகளுக்கு கிடைக்க வேண்டிய வரி வருவாயில், 1,000 கோடி ரூபாய் இழப்பு ஏற்பட்டுள்ளது. தங்க இறக்குமதிக்கான சுங்க வரியை 4 சதவீதமாக அதிகரித்து, உற்பத்தி வரியை 2 சதவீதமாக உயர்த்தியுள்ளது மத்திய அரசு. இது, ஒரு கிராம் தங்கம் விலையில், குறைந்தபட்சம், 100 ரூபாய் வரை அதிகரித்து விடும். உற்பத்தியாளர்கள் மற்றும் விற்பனையாளர்களுக்குத் தான் சுமை என்றாலும், அதை அவர்கள், வாடிக்கையாளர்கள் தலையில் தான் இறக்கி வைப்பர்.இந்நிலையில், இந்த வரி உயர்வைக் கண்டித்து, நாடு முழுவதும் உள்ள நகைக்கடை உரிமையாளர்கள், சனி, ஞாயிறு, திங்கள் என, மூன்று நாட்கள் கடையடைப்பு நடத்தினர். வெள்ளிக்கிழமை இரவு 7 மணிக்கு எடுத்த இந்த முடிவு, வாய்மொழியாகவே நாடு முழுவதும் பரப்பப்பட்டது. பல பேருக்குத் தகவல் தெரியாததால், சனிக்கிழமை காலையில் சிலர் கடையைத் திறந்திருந்தனர். சங்கத்தினர் சொல்லி, பிறகு கடையை அடைத்தனர்.
ரூ.1,000 கோடி இழப்பு
இது தொடர்பாக, சென்னை தங்க நகை மற்றும் வைர வியாபாரிகள் சங்கத் தலைவர், ஜெயந்திலால் ஷெலானி கூறியதாவது: ஒரு நாட்டின் பொருளாதார பலம், அந்நாட்டில் இருக்கும் தங்கத்தைப் பொறுத்தே மதிப்பிடப் படுகிறது. உலகிலேயே அதிகம் தங்கம் நுகரும் நாடுகளில் இரண்டாவது, மூன்றாவது இடங்களில், இந்தியா இருக்கிறது.
அப்படியானால், இந்தியா பொருளாதார பலத்தோடு இருக்கிறது என்று தானே பொருள். ஆனால், இந்த வரி உயர்வின் மூலம், தங்கம் இறக்குமதிக்கு முட்டுக்கட்டை போடுகிறது மத்திய அரசு.சென்னையில் மட்டுமே ஒரு நாளைக்கு, ஏறக்குறைய, 200 கோடி ரூபாய்க்கு தங்க நகை விற்கப்படுகிறது; தமிழகம் முழுவதும், 1,000 கோடி ரூபாயை எட்டும். நாடு முழுவதும் மூன்று நாள் கடையடைப்பு மூலம், மத்திய அரசுக்கு வர வேண்டிய இறக்குமதி தீர்வை, மாநில அரசுகளுக்கு வர வேண்டிய வணிக வரி என, குறைந்தபட்சம், 1,000 கோடி ரூபாய் இழப்பு ஏற்பட்டுள்ளது.வாடிக்கையாளர் தானே செலுத்தப் போகிறார் என, நாங்கள் பேசாமல் இருந்து விடலாம். ஆனால், மத்திய அரசு தவறான திசையில் செல்கிறது என்பதை எடுத்துச் சொல்வதற்காகவே, போராட்டம் நடத்தினோம். இவ்வாறு ஜெயந்திலால் கூறினார்.
தமிழகத்தில் உள்ள நகைக்கடைகள் - 18,000 சென்னையில் மட்டும் - 4,000 :தமிழகத்தின் ஆண்டு விற்பனை - ரூ.50 ஆயிரம் கோடி
மேலும் பொது செய்திகள்
|
Advertisement
|
Advertisement
|
Advertisement
|
|
|
|