பதிவு செய்த நாள்
16 ஆக2012
11:05
புதுடில்லி: நாட்டின் பொறியியல் சாதனங்கள் ஏற்றுமதி, சென்ற ஜூலை மாதத்தில், 423 கோடி டாலராக (23,265 கோடி ரூபாய்) சரிவடைந்துள்ளது. இது, கடந்த ஆண்டின் இதே மாதத்தில், 504 கோடி டாலராக (27,720 கோடி ரூபாய்) அதிகரித்து காணப்பட்டது. ஆக, நடப்பாண்டு ஜூலை மாதத்தில், பொறியியல் சாதனங்கள் ஏற்றுமதி 16 சதவீதம் வீழ்ச்சி கண்டுள்ளது என, பொறியியல் ஏற்றுமதி மேம்பாட்டு கவுன்சில் தெரிவித்துள்ளது.
சர்வதேச அளவிலான பொருளாதார தேக்க நிலையால், ஐரோப்பா, அமெரிக்கா உள்ளிட்ட மேற்கத்திய நாடுகளில், பொறியியல் சாதனங்களுக்கான தேவை குறைந்துள்ளது. இதன் காரணமாகவே, சென்ற ஜூலை மாதத்தில் இதன் ஏற்றுமதி குறிப்பிடத்தக்க அளவிற்கு சரிவைச் சந்தித்துள்ளது.
நடப்பு 2012-13ம் நிதியாண்டின், ஏப்ரல் முதல் ஜூலை வரையிலான காலத்தில், பொறியியல் சாதனங்கள் ஏற்றுமதி, 9 சதவீதம் சரிவடைந்து, 1,860 கோடி டாலராக (1,02,300 கோடி ரூபாய்) குறைந்துள்ளது. மதிப்பீட்டு காலத்தில், இரும்பு, உருக்கு, விமான மற்றும் விண்கல உதிரிபாகங்கள்,கப்பல்கள், கட்டுமான இயந்திரங்கள் ஆகியவற்றின் ஏற்றுமதி மிகவும் சரிவடைந்துள்ளது.
சென்ற 2011-12ம் முழு நிதியாண்டில், நாட்டின் பொறியியல் சாதனங்கள் ஏற்றுமதி 17 சதவீதம் வளர்ச்சி கண்டு, 5,900 கோடி டாலராக (3,24,500 கோடி ரூபாய்) அதிகரித்திருந்தது. இது, இதற்கு முந்தைய 2010-11ம் நிதியாண்டில், 4,970 கோடி டாலராக (2,73,350 கோடி ரூபாய்) இருந்தது. நம்நாட்டிலிருந்து, போக்குவரத்து சாதனங்கள், இயந்திரங்கள் மற்றும் உதிரிபாகங்கள், போல்ட்டுகள், நட்டுகள் போன்றவை அதிகளவில் ஏற்றுமதியாகின்றன. உலகளாவிய பொருளாதார மந்த நிலையால் பல்வேறு பொருட்களுக்கான தேவை குறைந்துள்ளது.
மேலும் பொது செய்திகள்
|
Advertisement
|
Advertisement
|
Advertisement
|
|
|
|