பதிவு செய்த நாள்
13 செப்2013
01:22
வளமான வர்த்தக வாய்ப்பு உள்ளதால், நுகர்வோர் சாதனங்கள் மற்றும் டிராக்டர் தயாரிப்பு நிறுவனங்கள், கிராமங்கள், அவற்றை ஒட்டியுள்ள சிறிய நகரங்களுக்கு படையெடுக்கத் துவங்கி உள்ளதாக, தெரியவந்துள்ளது.
பொருளாதார மந்த நிலையால், உள்நாட்டில், பல தொழில்துறை நிறுவனங்களின் செயல்பாடு பாதிப்புக்குள்ளாகி உள்ளதுடன், அவற்றின் வளர்ச்சி விகிதமும் பின்னடைவை கண்டுள்ளது.
வேலைவாய்ப்பு :மேலும், நகர்புறங்களில் வேலைவாய்ப்பு பறிபோகும் என்ற அச்சப்பாட்டால், தொழில் துறை நிறுவனங்களில் பணிபுரிபவர்களின் செலவினம், மிகவும் குறைந்து போயுள்ளது. மேலும், பலர் அத்தியாவசிய பொருட்கள் வாங்குவதை கூட ஒத்தி போட்டு வருகின்றனர்.இந்நிலையில், நாட்டில் பல மாநிலங்களில், பருவ மழை நன்கு பெய்து வருவதால், சாகுபடி பரப்பளவு அதிகரித்துள்ளது. இதையடுத்து, நடப்பாண்டில், ஒட்டு மொத்த அளவில், தானிய உற்பத்தி அதிகரிக்கும் என, மதிப்பிடப்பட்டுள்ளது.
இதையடுத்து, நுகர்வோர் சாதனங்கள் மற்றும் டிராக்டர் தயாரிப்பு நிறுவனங்கள், கிராமங்கள் மற்றும் சிறிய நகரங்களில், விற்பனையை அதிகரிக்கும் வகையில், தீவிரம் காட்டத் துவங்கியுள்ளன.இதற்கு எடுத்துக்காட்டாக, கடந்த 2012-13ம் நிதியாண்டின் பிற்பகுதியில் இருந்து, நடப்பு நிதிஆண்டின், ஜூலை வரையிலுமாக, நுகர்வோர் சாதனங்கள் விற்பனை, நகர்புறங்களை விட கிராமப்புறங்களில் அதிகரித்து உள்ளது.
கடந்த நிதியாண்டின் மூன்றாவது காலாண்டில்( அக்.,-டிச.,), நுகர்வோர் சாதனங்கள் விற்பனை வளர்ச்சி, 15.4 சதவீதம் என்ற அளவில் இருந்தது. அதேசமயம், இக்காலாண்டில், கிராமப்புறங்களில் இவற்றின் விற்பனை வளர்ச்சி, 22.7 சதவீதம் என்ற அளவில் உயர்ந்து காணப்பட்டது.
அதே போன்று, கடந்த நிதிஆண்டில், நான்காவது காலாண்டில், நகர்புறங்களில் இந்நிறுவனங்களின் விற்பனை வளர்ச்சி, 9.8 சதவீதம் என்ற அளவிலும், கிராமப்புறங்களில், 17.1 சதவீதம் என்ற அளவிலும், நடப்பு நிதிஆண்டின் முதல் காலாண்டில் (ஏப்.,-ஜூன்), இவை முறையே, 9.2 சதவீதம், 14.3 சதவீதம் என்ற அளவில் இருந்தன.
கடந்த 2012ம் ஆண்டில், ஏப்ரல் முதல் ஜூலை வரையிலான காலத்தில், டிராக்டர் விற்பனை, 1.75 லட்சம் என்ற அளவில் இருந்தது. நடப்பாண்டின் இதே காலத்தில், இந்த எண்ணிக்கை, 23 சதவீதம் வளர்ச்சி கண்டு, 2.15 லட்சமாக உயர்ந்துள்ளது.
பயணிகள் கார்:இந்நிலையில், கணக்கீட்டு காலத்தில், பயணிகள் கார் விற்பனை, 5.39 சதவீதம் சரிவு அடைந்து, 10.40 லட்சம் என்ற எண்ணிக்கையிலிருந்து, 9.84 லட்சமாக சரிவடைந்துள்ளது. இருப்பினும், கணக்கீட்டு காலத்தில், இருசக்கர வாகனங்கள் விற்பனை, 0.7 சதவீதம் மட்டும் உயர்ந்து, 57.10 லட்சம் என்ற எண்ணிக்கை யிலிருந்து, 57.51 லட்சமாக சற்று உயர்ந்துள்ளது.
நடப்பாண்டில், வேளாண் உற்பத்தி நன்கு இருக்கும் என்ற மதிப்பீட்டால், கிராமப்புறங்களில், இருசக்கர வாகனங்கள் குறிப்பாக, மோட்டார் சைக்கிள்கள் விற்பனை நல்ல அளவில் வளர்ச்சி காணும் என, இந்திய மோட்டார் வாகன தயாரிப்பாளர்கள் சங்கத்தின் துணை பொது இயக்குனர் சுகாட்டோ சென் தெரிவித்தார்.
மொபைல் போன்கள், பிளாட் வகை "டிவி'க்கள் போன்றவற்றின் விற்பனையில் ஈடுபட்டு வரும் சாம்சங் நிறுவனம், கிராமப்புறங்கள் மற்றும் அதை சார்ந்துள்ள இரண்டாவது மற்றும் மூன்றாவது நிலை நகரங்களில், அதன் மின்னணு சாதனங்கள் விற்பனையை அதிகரிக்கும் வகையில், தீவிரமாக களம்இறங்கியுள்ளது.
இதே போன்று, வீடியோகான் நிறுவனமும், கிராமப்புறங்களில் நுகர்வோர் சாதனங்களின் விற்பனையை அதிகரிக்கும் வகையில் அதிகளவில் கிளைகளை நிறுவி வருவதாக, இந்நிறுவனத்தின் தலைமை செயல்பாட்டு அதிகாரி எஸ்.எம்.சிங் தெரிவித்தார்.
மோட்டார் சைக்கிள்:ஹீரோ மோட்டோகார்ப் நிறுவனமும், கிராமப்புறங்களில் அதன் மோட்டார்சைக்கிள் விற்பனையை அதிகரிக்கும் வகையில் நடவடிக்கை மேற்கொண்டு உள்ளது. இந்நிறுவனம், ஆண்டுக்கு, புதிதாக, 500 வினியோக மையங்கள் துவக்க திட்டமிட்டுள்ளது. தற்போது, நிறுவனத்திற்கு நாடு தழுவிய அளவில், 5,500 வினியோக மையங்கள் இருப்பதாக, இந்நிறுவனத்தின் மூத்த துணைத் தலைவர் (சந்தைப்படுத்துதல்) அனில் துவா தெரிவித்தார்.
ஒட்டு மொத்த அளவில், நுகர்வோர் சாதன தயாரிப்பு நிறுவனங்கள், அவற்றின் மொத்த விற்பனையில், கிராமப்புறங்களின் பங்களிப்பை, 40 சதவீத அளவிற்கு உயர்த்த திட்டமிட்டு உள்ளன.
- பிசினஸ் ஸ்டாண்டர்ட் உடன் இணைந்து -
மேலும் கம்மாடிட்டி செய்திகள்
|
Advertisement
|
Advertisement
|
Advertisement
|
|
|
|