சிங்கப்பூர் : இந்திய எரிசக்தி துறைக்கு வரும், 2035ம் ஆண்டிற்குள், 2.30 லட்சம் கோடி டாலர் தேவைப்படும் என, ஏஷியன் டெவலப்மெண்ட் பேங்க் மதிப்பிட்டுள்ளது.
இது குறித்து இவ்வங்கி வெளியிட்டுள்ள அறிக்கை: ஆசியா மற்றும் பசிபிக் பிராந்தியத்தில், 2010 - 2035ம் ஆண்டுகளில், எரிசக்தி துறையின் மொத்த முதலீட்டில், தெற்காசியாவின் பங்களிப்பு, 20.6 சதவீதம் (2.40 லட்சம் கோடி டாலர்) என்ற அளவிற்கு இருக்கும்.பங்களிப்பு இந்தியாவில், எரிசக்தி விலை தான் முக்கிய பிரச்னையாக உள்ளது. மதிப்பீட்டு காலத்தில், தெற்காசிய எரிசக்தி துறைக்கு தேவைப்படும் முதலீட்டில், இந்தியாவின் பங்களிப்பு, 95.6 சதவீதம் (2.30 லட்சம் கோடி டாலர்) இருக்கும்.
தெற்காசியாவில், இந்தியா, வங்க தேசம், பூடான், வங்கதேசம், மாலத் தீவு, நேபாளம், இலங்கை ஆகிய நாடுகள் அடங்கும். மதிப்பீட்டு காலத்தில், இந்தியாவின் எரிசக்தி தேவை, ஆண்டுக்கு, 2.7 சதவீதம் என்ற அளவிற்கு வளர்ச்சி காணும்.
எனினும், இந்த வளர்ச்சி, இதே காலத்தில், இந்தியாவின் மொத்த உள்நாட்டு உற்பத்தி வளர்ச்சியுடன் (5.7 சதவீதம்) ஒப்பிடும் போது குறைவாகும்.வரும், 2,035ம் ஆண்டு வரை, மின் துறையின் முக்கிய எரிபொருளாக நிலக்கரி விளங்கும்.
இதே காலத்தில், தெற்காசியாவின் எரிசக்தி தேவையில், இந்தியாவின் பங்களிப்பு, 92.5 சதவீதம் என்ற அளவில் தொடர்ந்து இருக்கும். உள்நாட்டில் எரிசக்தி உற்பத்தியை விட, அதற்கான தேவை அதிகரிக்கும் என, மதிப்பிடப்பட்டுள்ளது. இதற்காக, இறக்குமதி செய்யப்படும் கச்சா எண்ணெய், எரிவாயு, நிலக்கரி ஆகியவை, நாட்டின் பொருளாதாரத்தில்,
தாக்கத்தை ஏற்படுத்தும்.எரிசக்தி பாதுகாப்புக்கு, இந்தியா, கொள்கை அளவில் முன்னுரிமை அளிக்கும் நிலை ஏற்படும்.
மானியம் அரசு மானியம் காரணமாக, மண்ணெண்ணெய், டீசல் மற்றும் சமையல் எரிவாயு ஆகியவற்றுக்கு மிகவும் குறைவான தொகை வசூலிக்கப் படுகிறது. அதுமட்டுமின்றி, மின்கட்டணமும் மிகக் குறைவாகவே உள்ளது. குறிப்பிட்ட மாநிலங்களில், விவசாய பணிகளுக்கு பயன்படும் மின்சாரத்திற்கு, மானியம் வழங்கப்படுகிறது. மின் கட்டண நிர்ணயமும், அரசின் கட்டுப்பாட்டில் உள்ளதால், தனியார் நிறுவனங்கள், புதிய மின் உற்பத்தி திட்டங்களில் முதலீடு செய்ய அதிகம் ஆர்வம் காட்டாமல் உள்ளன. இதுவும் மின் உற்பத்தி வளர்ச்சிக்கு அணை போடுவதாக உள்ளது. இவ்வாறு அறிக்கையில் தெரிவிக்கப்பட்டுள்ளது.