பதிவு செய்த நாள்
19 அக்2013
01:19
கடந்த ஒரு சில வாரங்களாக, பருத்தி நுாலிழை விலை குறையத் துவங்கியுள்ளது. கையிருப்பு அதிகரித்துள்ளதாலும், இதற்கான தேவை குறைந்துள்ளதாலும், நுாலிழை விலை, கடந்த ஒரு மாத காலத்தில், 5–7 சதவீதம் குறைந்துள்ளது.
கையிருப்பு:இதுகுறித்து, தென்னிந்திய ஆலைகள் கூட்டமைப்பின் தலைமை செயலர் கே. செல்வராஜ் கூறியதாவது:துணி உற்பத்தியாளர்களிடமிருந்து, நுாலிழைகளுக்கான ஆர்டர்கள் மிகவும் குறைந்துள்ளன. இந்நிலையில், நூலிழை கையிருப்பும் அதிகமாக உள்ளது. மேலும், கடந்த செப்டம்பர் மாதத்தின், இரண்டாவது வாரத்தில் இருந்து, பருத்தியின் விலை, கேண்டிக்கு (ஒரு கேண்டி–356 கிலோ), 3,500 ரூபாய் குறைந்துள்ளது.கடந்த செப்டம்பர் மாதம் 15ம் தேதி, ஒரு கிலோ கோம்ப்டு பருத்தி நூலிழை விலை, 281 ரூபாயாக இருந்தது. இது, தற்போது, 261 ரூபாயாக சரிவடைந்துள்ளது.இதே போன்று, 4.54 கிலோ கொண்ட ஒரு பண்டில், ஹேங்க்டு பருத்தி நூலிழையின் விலை, செப்டம்பர் மாதம் மத்தியில், 1,115 ரூபாயாக இருந்தது. இது, தற்போது, 1,085 ரூபாயாக குறைந்துள்ளது.இவ்வாறு அவர் தெரிவித்தார்.
இந்நிலையில், வர்த்தகர்கள் வசம், 16 லட்சம் கிலோ பருத்தி நுாலிழை கையிருப்பு உள்ளது.இந்திய பருத்தி நூலிழை விலை அதிகமாக உள்ளது. இது, குறைய வாய்ப்புள்ளது என்ற நிலைப்பாட்டில், இந்தியாவிலிருந்து, அதிகளவில் பருத்தி நுாலிழைகளை இறக்குமதி செய்து வந்த சீனா, தற்போது, இதனை முற்றிலுமாக நிறுத்தியுள்ளது என, பருத்தி நுாலிழை வர்த்தகரான அருண் தலால் தெரிவித்தார்.
சீனா தவிர்த்த இதர புதிய நாடுகளுக்கு, நூலிழை ஏற்றுமதியை அதிகரிக்கும் நோக்கில், மத்திய அரசு, பாரம்பரிய சந்தைகளுக்கான நூலிழை ஏற்றுமதிக்கு அளித்து வந்த சலுகைகளை தற்போது, நிறுத்தியுள்ளது.இதுவும், நூலிழை வர்த்தகத்தை பாதிப்பதாக உள்ளது என, ஆந்திராவைச் சேர்ந்த வர்த்தகர் ஒருவர் குறிப்பிட்டார்.
செயற்கை நூலிழை:சென்ற செப்டம்பர் மாதத்தில், பருத்தி நூலிழை விலை, மிகவும் அதிகரித்ததையடுத்து, பல ஆடை தயாரிப்பு நிறுவனங்கள், செயற்கை நூலிழை வகைகளை அதிகளவில் கொள்முதல் செய்யத் துவங்கின. இந் நிலையில், நடப்பாண்டில், சீனா, இந்தியாவிலிருந்து, பருத்தி வாங்காது என்றும், அதற்கு பதிலாக, பருத்தி நூலிழையை வாங்க துவங்கும் என, சந்தையாளர்கள் மதிப்பிட்டுள்ளனர்.அவ்வாறு, சீனா, அதிகளவில் பருத்தி நூலிழைகளை வாங்க துவங்கும் நிலையில், இதன் விலை உயர வாய்ப்புள்ளது.நாட்டின் மொத்த பருத்தி நுாலிழை ஏற்றுமதியில், சீனாவின் பங்களிப்பு, தற்போது, 40–50 சதவீதம் என்ற அளவில் உள்ளது என, வர்த்தகர்கள் மேலும் தெரிவித்தனர்.
– பிசினஸ் ஸ்டாண்டர்ட் உடன் இணைந்து –
மேலும் ஜவுளி செய்திகள்
|
Advertisement
|
Advertisement
|
Advertisement
|
|
|
|