புதுடில்லி:60 வயதிற்கு மேல் அரசு பணியில் சேருவோரும், தேசிய ஓய்வூதிய திட்டத்தில் இணையலாம் என, ஓய்வூதிய நிதியம் ஒழுங்குமுறை மற்றும் மேம்பாட்டு ஆணையம் (பி.எப்.ஆர்.டீ.ஏ.,) அறிவித்துள்ளது.தற்போது, அரசு அல்லது தனியார் துறையில் பணியாற்றியவர்கள், 60 வயதிற்கு மேல், வேறு ஏதேனும் அரசு பணியில் இணைந்தால், அவர்கள் தேசிய ஓய்வூதிய திட்டத்தில் சேர்ந்து, அதன் பலனை பெற முடியாத நிலை உள்ளது.

பி.எப்.ஆர்.டீ.ஏ., அங்கீகரிக்கும் நபர்கள் மட்டுமே என்.பி.எஸ்.,-ல் சேர முடியும்.இந்த விதிமுறையை நீக்கி, 60 மற்றும் அதற்கு மேற்பட்ட வயதுடையோர், தனது அங்கீகாரமின்றி, என்.பி.எஸ்., திட்டத்தில் சேரலாம் என, பி.எப்.ஆர்.டீ.ஏ., தெரிவித்துள்ளது அதே சமயம், தேசிய ஓய்வூதிய திட்டத்தில், ஒருவரின் சந்தா செலுத்தும் காலம், 42 ஆண்டுகளுக்கு மிகாமல் இருக்க வேண்டும்.

கடந்த 2004ம் ஆண்டு தேசிய ஓய்வூதிய திட்டம் அறிமுகப்படுத்தப்பட்டது. அந்த ஆண்டில் இருந்து அரசு பணியில் சேருவோர், இத்திட்டத்தின் கீழ் கொண்டு வரப்படுகின்றனர். இந்நிலையில், தனி நபர்கள், தனியார் நிறுவன ஊழியர்கள், அமைப்பு சாரா தொழிலாளர்கள் ஆகியோருக்கும் இத்திட்டம் விரிவுபடுத்தப்பட்டது.இதையடுத்து, கடந்த, 2008-09ம் நிதியாண்டில், 4.3 லட்சமாக இருந்த என்.பி.எஸ்., சந்தாதாரர் எண்ணிக்கை, சென்ற 2013-14ம் நிதியாண்டில், 53 லட்சமாக உயர்ந்துள்ளது.இதே காலத்தில், என்.பி.எஸ்., நிர்வகிக்கும் சொத்து, 2,277 கோடியில் இருந்து, 35 ஆயிரம் கோடி ரூபாயாக உயர்ந்துள்ளது.