புதுடில்லி:விமான சேவை துறையில் காணப்படும் கடும் போட்டியால், விமான போக்குவரத்து கட்டணங்கள் அதிக அளவிற்கு உயராமல் உள்ளன. இத்துடன், பல்வேறு நிறுவனங்கள், அவ்வப்போது சலுகை விலையில் விமான பயண திட்டங்களை அறிவிக்கின்றன. இதனால், உள்நாட்டில், விமான பயணம் செய்வோரின் எண்ணிக்கை அதிகரித்து வருகிறது.

நடப்பாண்டு, ஜன., - ஏப்., வரையிலான நான்கு மாதங்களில், உள்நாட்டு விமான பயணிகளின் எண்ணிக்கை, 2 சதவீதம் வளர்ச்சி கண்டு, 2.07 கோடியாக அதிகரித்துள்ளது. இது, கடந்தாண்டின் இதே காலத்தில், 2.03 கோடியாக இருந்தது.மதிப்பீட்டு காலத்தில், இண்டிகோ நிறுவனம், அதன் விமானங்களில், 16.80 லட்சம் பயணிகளை சுமந்து சென்று, முதலிடத்தை பிடித்துள்ளது. இதையடுத்து, ஜெர் ஏர்வேஸ் - ஜெட்லைட் ஆகிய நிறுவனங்கள், 11.62 லட்சம் பயணிகளையும், ஏர் - இந்தியா, 9.74 லட்சம் பயணிகளையும் ஏற்றிச் சென்றுள்ளன. மேற்கண்டவை தவிர, கோ ஏர் (5.07 லட்சம் பயணிகள்), விஜயவாடாவைச் சேர்ந்த புதிய விமான நிறுவனமான ஏர்கோஸ்டா (45,000) ஆகிய நிறுவனங்களும் குறிப்பிடத்தக்க அளவிற்கு பயணிகளை கையாண்டுள்ளன.

சென்ற ஏப்ரலில், உள்நாட்டு விமான பயணிகளின் எண்ணிக்கை, 53.18 லட்சமாக உயர்ந்துள்ளது. இது, முந்தைய மார்ச் மாதத்தில், 52.88 லட்சமாக இருந்தது.மதிப்பீட்டு காலத்தில், விமான பயணி களை கையாண்டதில், இண்டிகோ, 31.6 சதவீத சந்தை பங்களிப்புடன் முன்னணியில் உள்ளது. இதையடுத்து, ஜெட்ஏர்வேஸ் - ஜெட்லைட் (21.8 சதவீதம்), ஏர் - இந்தியா (18.3), கோ ஏர் (9.5), ஏர்கோஸ்டா (0.8 சதவீதம்) ஆகிய நிறுவனங்கள் உள்ளன.