இந்தியா - ஐரோப்பிய நாடுகள் இடையிலான வர்த்தக உறவில் ஏற்பட்டுள்ள விரிசல் விரிவடைந்து கொண்டே போகிறது. பூச்சி மருந்து பிரச்னையில், இந்தியாவின் அல்போன்சா மாம்பழங்களின் இறக்குமதிக்கு, அண்மையில் ஐரோப்பிய கூட்டமைப்பு (இ.யு.,) தடை விதித்தது.

விசாரணை கமிஷன்: இதனால், அல்போன்சா மாம்பழம் ஏற்றுமதி பாதிக்கப்பட்டு, மகாராஷ்டிர அரசு, விசாரணை கமிஷன் வைக்கும் அளவிற்கு, அதன் விலை வீழ்ச்சி கண்டது. இந்நிலையில், ஐரோப்பிய மருந்து கட்டுப்பாட்டு அமைப்பின் தடையால், இந்தியாவின் மூலிகை மருந்துகளை, ஐரோப்பிய நாடுகளுக்கு ஏற்றுமதி செய்ய முடியாத நிலை ஏற்பட்டுள்ளது.

இங்கிலாந்து: இங்கிலாந்தின் மருந்துகள் மற்றும் ஆரோக்கிய பராமரிப்பு பொருட்கள் ஒழுங்குமுறை ஆணையம் (எம்.எச்.ஆர்.ஏ.,), பாரம்பரிய மூலிகைக்கான பதிவு (டி.எச்.ஆர்.,) அல்லது மருந்து உரிமை (பி.எல்.,) சான்றிதழ் பெறாத, அனைத்து ஆயுர்வேத, மூலிகை மருந்துகளின் இறக்குமதிக்கு தடை விதித்து உள்ளது.நடப்பு மே 1ம் தேதி முதல் அமலுக்கு வந்துள்ள தடையால், ஐரோப்பிய நாடுகளில் உள்ள மருந்து கடைகள், மேற்கண்ட சான்றிதழ் இல்லாத மூலிகை மருந்துகளின் விற்பனையை நிறுத்தி வருகின்றன. இத்துடன் தடை செய்யப்பட்ட மூலிகை மருந்துகளின் பட்டியலும் எம்.எச்.ஆர்.ஏ., வலை தளத்தில் வெளியிடப்பட்டுள்ளது. அதில், இந்த மருந்துகளை யாரும் வாங்க வேண்டாம் என, எச்சரிக்கை விடுக்கப்பட்டுள்ளது. இந்த பட்டியலில், ஆஸ்துமா நிவாரணியான, இந்தியாவின் 'சுவாச சஞ்சீவனி' உள்ளிட்ட பல்வேறு மருந்துகள் இடம் பெற்றுள்ளன.

கண்டனம்: ஐரோப்பாவின் இந்த நடவடிக்கைக்கு, இந்தியாவின், ஆயுர்வேத மருந்து தயாரிப்பாளர்கள் கூட்டமைப்பு (ஏ.டீ.எம்.ஏ.,) கடும் கண்டனம் தெரிவித்துள்ளது. இப்பிரச்னைக்கு உடனே தீர்வு காணாவிட்டால், 850 கோடி ரூபாய் மதிப்பிலான மூலிகை மற்றும் ஆயுர்வேத மருந்து ஏற்றுமதி பாதிக்கப்படும் என, மத்திய வர்த்தக அமைச்சகத்திடம் கூறியுள்ளது.

கட்டணம்: ஒரு மூலிகை மருந்துக்கான பதிவுக் கட்டணம், 8 லட்சம் முதல் 45 லட்சம் ரூபாய் வரை, மிக அதிகமாக நிர்ணயிக்கப்பட்டுள்ளது. அதனால், இந்திய நிறுவனங்கள், இக்கட்டணத்தை செலுத்தி, மருந்துகளை பதிவு செய்யாமல் உள்ளன.

இத்துடன், ஐரோப்பாவில், 15 ஆண்டுகளாக பயன்பாட்டில் உள்ள மருந்துகளுக்கே, சான்றிதழ் வழங்கப்படும் என, தெரிவிக்கப்பட்டுள்ளது. இதுவும், இந்திய மூலிகை மருந்து ஏற்றுமதியாளர்களுக்கு, கவலை அளிக்கக்கூடியதாக உள்ளது.

இதுகுறித்து, ஏ.டீ.எம்.ஏ., பொருளாளர் சசாங் சாந்து கூறியதாவது: பதிவு செய்த மருந்துகளின் உரிமம், எத்தனை ஆண்டுகளுக்கு செல்லுபடியாகும் என்பது தெரியவில்லை. ஒவ்வொரு ஆண்டும், இந்த அளவிற்கு பெரிய தொகையை செலுத்துவது இயலாத காரியம். அப்படியே செலுத்தினாலும், அதை திரும்ப வழங்க வேண்டும் அல்லது மானியமாவது அளிக்க வேண்டும் என, வர்த்தக அமைச்சகத்திடம் கோரிக்கை விடுத்துள்ளோம். இவ்வாறு அவர் கூறினார்.

அமெரிக்காவின் அதிர்ச்சி 'ரிப்போர்ட்':கடந்த ஆண்டுகளில், உலோகம் அல்லது நச்சுக் கலவைகள் காரணமாக, இங்கிலாந்தில், இந்திய ஆயுர்வேத மருந்துகள் பலவற்றுக்கு தடை விதிக்கப்பட்டுள்ளது. தாபர், ஜண்டு, பத்யநாத், இமாலயா ஆகிய நிறுவனங்களின் 14 மருந்துகளில், ஈயம், பாதரசம், ஆர்சனிக் பொருட்கள் தீங்கு விளைவிக்கக் கூடிய அளவிற்கு உள்ளதாக, அமெரிக்க மருந்து கூட்டமைப்பு, அதிர்ச்சி தகவலை வெளியிட்டுள்ளது.