பதிவு செய்த நாள்
26 ஜூலை2014
23:45
மும்பை:நடப்பு 2014 – 15ம் நிதியாண்டின் ஏப்ரல் முதல், ஜூன் வரையிலான முதல் காலாண்டில், நாட்டின் நவரத்தினங்கள் மற்றும் ஆபரணங்கள் ஏற்றுமதி, 7.71 சதவீதம் வளர்ச்சி கண்டு, 50,334 கோடி ரூபாயாக அதிகரித்துள்ளது என, நவரத்தினங்கள் மற்றும் ஆபரணங்கள் ஏற்றுமதி மேம்பாட்டு கவுன்சிலின் (ஜி.ஜே.இ.பி.சி.,) தற்காலிக புள்ளி விவரத்தில் தெரிவிக்கப்பட்டுள்ளது.
ரூபாய் மதிப்பு உயர்வு:கடந்த நிதியாண்டின் இதே காலாண்டில், இவற்றின் ஏற்றுமதி, 46,731 கோடி ரூபாயாக இருந்தது. மதிப்பீட்டு காலாண்டில், டாலருக்கு எதிரான ரூபாய் மதிப்பு உயர்வால், நவரத்தினங்கள் மற்றும் ஆபரணங்கள் ஏற்றுமதி, ரூபாய் மதிப்பின் அடிப்படையி ல் சிறப்பாக உயர்ந்துள்ளது.
அதேசமயம், டாலர் மதிப்பின் அடிப்படையில், இவற்றின் ஏற்றுமதி, 0.60 சதவீதம் மட்டுமே உயர்ந்து, 836 கோடி டாலரிலிருந்து, 841 கோடி டாலராக அதிகரித்துள்ளது. கணக்கீட்டு காலாண்டில், நறுக்கப்பட்ட மற்று பட்டை தீட்டப்பட்ட வைரங்கள் ஏற்றுமதி, 6.34 சதவீதம் வளர்ச்சி கண்டு, 26,660 கோடியிலிருந்து, 28,349 கோடி ரூபாயாக உயர்ந்து உள்ளது.
பதக்கங்கள்:அதேசமயம், அளவின் அடிப்படையில் இவற்றின் ஏற்றுமதி, 86 லட்சம் காரட்டிலிருந்து, 81 லட்சம் காரட்டாகக் குறைந்துள்ளது. தங்க ஆபரணங்கள் ஏற்றுமதி, 27.52 சதவீதம் அதிகரித்து, 9,155 கோடியிலிருந்து, 11,675 கோடி ரூபாயாக வளர்ச்சி கண்டுள்ளது.இதே போன்று, தங்க பதக்கங்கள் மற்றும் நாணயங்கள் ஏற்றுமதியும், 32.67 சதவீதம் உயர்ந்து, 4,181 கோடியிலிருந்து, 5,547 கோடி ரூபாயாக வளர்ச்சி கண்டுள்ளது.
அதேசமயம், வெள்ளி ஆபரணங்கள் ஏற்றுமதி, மதிப்பீட்டு காலாண்டில், 4.36 சதவீதம் குறைந்து, 2,218 கோடியிலிருந்து, 2,121 கோடி ரூபாயாக சரிவடைந்துள்ளது.மேலும், நவரத்தினங்கள் ஏற்றுமதியும், 57.07 சதவீதம் வீழ்ச்சி கண்டு, 717 கோடியிலிருந்து, 308 கோடி ரூபாயாக சரிவடைந்துள்ளது.இவை தவிர, கச்சா வைரங்கள் ஏற்றுமதியும், 5.98 சதவீதம் குறைந்து, 2,287 கோடியிலிருந்து, 2,150 கோடி ரூபாயாக வீழ்ச்சி கண்டுள்ளது.
செயற்கை முத்துகள்:இவற்றின் ஏற்றுமதி, அளவின் அடிப்படையிலும், 32.47 சதவீதம் சரிவடைந்து, 117 லட்சம் காரட்டிலிருந்து, 79 லட்சம் காரட்டாகக் குறைந்துள்ளது.அதேசமயம், கணக்கீட்டு காலாண்டில், செயற்கை முத்துகள் ஏற்றுமதி, 79 கோடியிலிருந்து, 115 கோடி ரூபாயாக வளர்ச்சி கண்டுள்ளது என, ஜி.ஜே.இ.பி.சி., புள்ளி விவரத்தில் மேலும் தெரிவிக்கப்பட்டுள்ளது
மேலும் பொது செய்திகள்
|
Advertisement
|
Advertisement
|
Advertisement
|
|
|
|