பதிவு செய்த நாள்
18 ஆக2014
01:16
புதுடில்லி:நடப்பு 2014 – 15ம் நிதியாண்டின் முதல் காலாண்டில் (ஏப்., – ஜூன்), இந்தியாவின் ஒட்டு மொத்த வேளாண் பொருட்கள் ஏற்றுமதி, 2.7 சதவீதம் சரிவடைந்து, 33,649 கோடி ரூபாயாக சரிவடைந்துள்ளது.இது, கடந்த நிதியாண்டின் இதே காலாண்டில், 34,581 கோடி ரூபாயாக அதிகரித்து காணப்பட்டது என, வேளாண் மற்றும் பதப்படுத்தப்பட்ட உணவுப் பொருட்கள் ஏற்றுமதி மேம்பாட்டு ஆணையம் (அபெடா) தெரிவித்துள்ளது.பாதிப்பு:குறிப்பாக, மதிப்பீட்டு காலாண்டில், கொத்தவரை ஏற்றுமதி, 50 சதவீதத்திற்கும் மேல் சரிவடைந்து, 4,634 கோடியிலிருந்து, 2,316 கோடி ரூபாயாக வீழ்ச்சி கண்டுள்ளது.
இதன் காரணமாகவே ஒட்டு மொத்த ஏற்றுமதி பாதிக்கப்பட்டுள்ளது.இருப்பினும், பாசுமதி அரிசி, நிலக்கடலை, பதப்படுத்தப்பட்ட காய்கறிகள் மற்றும் பழங்கள் ஏற்றுமதி குறிப்பிடத்தக்க அளவிற்கு அதிகரித்துள்ளது.சவுதி அரேபியா, ஈரான் மற்றும் மேற்கு ஆசியா நாடுகளில், இந்திய நறுமண நீள்வகை பாசுமதி அரிசிக்கான தேவை சிறப்பான அளவில் வளர்ச்சி கண்டுள்ளது. இதையடுத்து, அந்நாடுகளுக்கான இதன் ஏற்றுமதி, கணக்கீட்டு காலாண்டில், 8 சதவீதம் உயர்ந்து, 8,400 கோடி ரூபாயாக அதிகரித்துள்ளது.
இது, கடந்த நிதியாண்டின் இதே காலாண்டில், 7,757 கோடி ரூபாயாக இருந்தது. இதே போன்று, சாதாரண வகை அரிசி ஏற்றுமதியும், 3,353 கோடி ரூபாயாக உயர்ந்துள்ளது.கடந்த நிதியாண்டில், ஒட்டு மொத்த அரிசி ஏற்றுமதி, 40 ஆயிரம் கோடி ரூபாயாக இருந்தது. இதில், பாசுமதி அரிசியின் பங்களிப்பு மட்டும், 28 ஆயிரம் கோடி ரூபாயாகும்.வரவேற்பு:சாதாரண வகை அரிசி ஏற்றுமதிக்கு விதிக்கப்பட்டிருந்த தடை, கடந்த 2011ம் ஆண்டு விலக்கி கொள்ளப்பட்டதையடுத்து, உலகளவில், அதற்கான தேவை பெருகி வருகிறது. குறிப்பாக, ஆப்ரிக்கா, ஐரோப்பிய நாடுகளில், இந்திய சாதாரண வகை அரிசிக்கு சிறந்த வரவேற்பு காணப்படுகிறது. இதையடுத்து, கடந்த இரண்டு நிதியாண்டுகளில் மட்டும், 1 கோடி டன் அரிசி ஏற்றுமதி செய்யப்பட்டுள்ளது.மாமிச உணவுப் பொருட்கள் ஏற்றுமதியில், மாட்டிறைச்சியின் பங்களிப்பு, 86 சதவீதமாக உள்ளது.
இதன் ஏற்றுமதி, மதிப்பீட்டு காலாண்டில், 17 சதவீதம் அதிகரித்து, 4,634 கோடியிலிருந்து, 5,742 கோடி ரூபாயாக வளர்ச்சி கண்டுள்ளது.இவை தவிர, நிலக்கடலை (34 சதவீதம்), கோகோ (144 சதவீதம்), பதப்படுத்தப்பட்ட காய்கறிகள் (38 சதவீதம்) ஆகியவை குறிப்பிடத்தக்க அளவிற்கு வளர்ச்சி கண்டுள்ளன.அதேசமயம், கோதுமை (24 சதவீதம்), பருப்பு வகைகள் (16 சதவீதம்), பால் பொருட்கள் (19 சதவீதம்) ஆகியவற்றின் ஏற்றுமதி சரிவை கண்டுள்ளது என, ‘அபெடா’ மேலும் தெரிவித்துள்ளது.
மேலும் பொது செய்திகள்
|
Advertisement
|
Advertisement
|
Advertisement
|
|
|
|