பதிவு செய்த நாள்
08 அக்2014
00:02
புதுடில்லி :அரிசி, தேயிலை, முந்திரி, நறுமணப் பொருட்கள், புகையிலை உள்ளிட்ட பல முக்கிய வேளாண் பொருட்கள் ஏற்றுமதி, சென்ற ஆகஸ்ட் மாதத்தில், தொய்வை கண்டுள்ளது. இதற்கு, சர்வதேச சந்தையில் நல்ல விலை கிடைக்காததே முக்கிய காரணம்.முக்கிய 13 வேளாண் பொருட்களில், 8 வேளாண் பொருட்கள் ஏற்றுமதி பின்னடைவை கண்டுள்ளது என, மத்திய வர்த்தக அமைச்சகம் தெரிவித்துள்ளது.
விலை சரிவு: சப்ளை அதிகரிப்பால், உள்நாட்டை காட்டிலும், சர்வதேச சந்தையில், வேளாண் பொருட்கள் விலை சரிவை கண்டுள்ளது. இதன் காரணமாக, வர்த்தகர்கள் ஏற்றுமதியை கைவிட்டு, உள்நாட்டு சந்தைகளில் அதிக ஆர்வம் காட்டி வருகின்றனர் என, இந்திய ஏற்றுமதி நிறுவனங்கள் கூட்டமைப்பின் தலைமை செயல் அதிகாரி அஜய் சகாய் தெரிவித்தார்.சென்ற ஆகஸ்ட் மாதத்தில், அரிசி ஏற்றுமதி, 3.15 சதவீதம் சரிவடைந்து, 60 கோடி டாலராக குறைந்துள்ளது.
இதே போன்று, நறுமணப் பொருட்கள் ஏற்றுமதி, 2.18 சதவீதம் சரிவடைந்து, 23 கோடி டாலராகவும், புகையிலை ஏற்றுமதி, 14.7 சதவீதம் வீழ்ச்சி கண்டு, 7.30 கோடி டாலராகவும் குறைந்துள்ளதாக, வர்த்தக அமைச்சகத்தின் புள்ளிவிவரத்தில் தெரிவிக்கப்பட்டுள்ளது.மேலும், தேயிலை (6.72 சதவீதம்), உணவு தானியங்கள் (50.6 சதவீதம்), முந்திரி (1.82 சதவீதம்) மற்றும் புண்ணாக்கு (64.3 சதவீதம்) ஆகியவற்றின் ஏற்றுமதியும் பின்னடைவை கண்டுள்ளன.
வர்த்தக பற்றாக்குறை: மேற்கண்ட முக்கிய வேளாண் பொருட்கள் ஏற்றுமதி தொய்வடைந்துள்ளதையடுத்து, சென்ற ஆகஸ்ட்டில், நாட்டின் ஏற்றுமதி, கடந்த 5 மாதங்களில் இல்லாத வகையில், 2.35 சதவீதம் குறைந்து, 2,695 கோடி டாலராக சரிவடைந்துள்ளது. இதையடுத்து, வர்த்தக பற்றாக்குறை, 1,083 கோடி டாலராக அதிகரித்துள்ளது.
நாட்டின் ஒட்டுமொத்த ஏற்றுமதியில், வேளாண் பொருட்களின் பங்களிப்பு, 10 சதவீதமாகும்.கடந்த 2010 – 11ம் நிதியாண்டில், வேளாண் பொருட்கள் ஏற்றுமதி, 1,735 கோடி டாலராக இருந்தது. இது, 2011 – 12ல், 2,743 கோடி டாலராகவும், 2012–13ல், 3,186 கோடி டாலராகவும், 2013 – 14ல், 4,500 கோடி டாலராகவும் வளர்ச்சி கண்டுள்ளது.
பழங்கள்:சென்ற ஆகஸ்டில், மேற்கண்ட முக்கிய வேளாண் பொருட்கள் ஏற்றுமதி சரிவை கண்டுள்ள நிலையில், எண்ணெய் வித்துக்கள் (37.2 சதவீதம்), பழங்கள் – காய்கறிகள் (3.46 சதவீதம்), பதப்படுத்தப்பட்ட பொருட்கள் (6.71 சதவீதம்), கடல் உணவுப் பொருட்கள் (35.5 சதவீதம்), இறைச்சி மற்றும் பால் (37.2 சதவீதம்) ஆகியவற்றின் ஏற்றுமதி சிறப்பான அளவில் உயர்ந்துள்ளது என்பது குறிப்பிடத்தக்கது.
மேலும் பொது செய்திகள்
|
Advertisement
|
Advertisement
|
Advertisement
|
|
|
|