மும்பை : இந்திய ரூபாயின் மதிப்பு கடந்த 28 மாதங்களில் இல்லாத அளவுக்கு கடுமையாக சரிந்துள்ளது. இன்றைய வர்த்தகநேர துவக்கத்தில்(காலை 9.15மணி)அந்நிய செலாவணி சந்தையில் அமெரிக்க டாலருக்கு எதிரான இந்திய ரூபாயின் மதிப்பு 30 காசுகள் சரிந்து ரூ.67.95-ஆக இருந்தது. தொடர்ந்து சரிவுடன் இருந்த ரூபாயின் மதிப்பு மதியத்திற்கு மேல் சரிந்தது. மதியம் 1.45 மணியளவில் ரூபாயின் மதிப்பு 37 காசுகள் சரிந்து ரூ.68.02-ஆக வர்த்தகமானது. பின்னர் வர்த்தகம் முடியும்போது ரூ.67.95-ஆக முடிந்தது.

பங்குச்சந்தைகளில் காணப்பட்ட சரிவு, வங்கிகள் மற்றும் இறக்குமதியாளர்களுக்கு டாலரின் தேவை அதிகரித்தது போன்ற காரணங்களால் ரூபாயின் மதிப்பு சரிந்ததாக சந்தை வல்லுநர்கள் தெரிவித்துள்ளனர். 

முன்னதாக நேற்று ரூபாயின் மதிப்பு 3 காசுகள் உயர்ந்து ரூ.67.65-ஆக இருந்தது.