பதிவு செய்த நாள்
09 மார்2016
07:16
மும்பை : மொபைல் போன் சேவையில் இறங்க உள்ள, முகேஷ் அம்பானியின் ரிலையன்ஸ் இண்டஸ்ட்ரீஸ் நிறுவனம், இந்தியாவின், ‘கேபிள் டிவி’ தொழிலையும் வளைத்துப் போட, அதிரடி திட்டம் வகுத்து வருவதாக கூறப்படுகிறது.
இது குறித்து, தொலை தொடர்பு வட்டாரங்கள் கூறிய தகவல்: முகேஷ் அம்பானி, ‘4ஜி’ மொபைல் போன் சேவை வழங்க, ‘ஆர்ஜியோ’ என்ற நிறுவனத்தை, 2010ல் துவக்கினார். கடந்த, ஆறு ஆண்டுகளாக, 1,800 கோடி டாலர் முதலீட்டில், அனைத்து, அடிப்படை கட்டமைப்பு வசதிகளையும் உருவாக்கியுள்ளார். இந்தாண்டுக்குள், நாடு முழுவதும், மொபைல் போன் மற்றும் இணையதள சேவைகள் வழங்கப்பட உள்ளன. இத்துடன், நாடு தழுவிய அளவில், ‘கேபிள் டிவி, டி.டி.எச்.,’ சேவைகளையும் வழங்க, ஆர்ஜியோ திட்டமிட்டுள்ளது. அவற்றின் வாயிலாக, இந்தியா மற்றும் இதர நாடுகளின் திரைப்படங்கள், சர்வதேச தொலைக்காட்சி தொடர்கள் ஆகியவற்றை, ‘ஜியோ பிளே’ என்ற, துணை பிரிவின் மூலம் வழங்க உள்ளது. இதற்காக, ‘கேபிள் டிவி’ சேவையில் ஈடுபட்டுள்ள, ‘ஹாத்வே கேபிள், டென் ஒர்க்ஸ், சிட்டி கேபிள்’ போன்ற பெரிய நிறுவனங்களுடன் ஒப்பந்தம் செய்து கொள்ள உள்ளது.
அது மட்டுமின்றி, சிறிய நகரங்களில் உள்ள, கேபிள் ஆப்பரேட்டர்களையும் விட்டு வைக்க, ஆர்ஜியோ தயாராக இல்லை. அடுத்த மூன்று ஆண்டுகளில், 20 மில்லியன் குடும்பங்களை, சந்தாதாரராக சேர்க்க, இலக்கு நிர்ணயித்து செயல்பட்டு வருகிறது.மேம்பட்ட தொலை தொடர்பு சேவை, அதிவிரைவான இணையதள வசதி, தொலைக்காட்சியில் உலகத் தரத்திலான பொழுதுபோக்கு சேவை என, பாய உள்ள, ஆர்ஜியோவைக் கண்டு, போட்டி நிறுவனங்களுக்கு இப்போதே, ‘கிலி’ ஏற்பட்டுள்ளது. இத்தனைக்கும், 10 ஆண்டுகளுக்கு முன் சகோதரர் முகேஷ் அம்பானியை விட்டுப் பிரிந்து, சில ஆண்டுகளுக்கு முன், சமாதானமான, அனில் அம்பானியும், ‘அலர்ஜி’ அடைந்துள்ளதாக கூறப்படுகிறது. அவர், தன், ரிலையன்ஸ் கம்யூனிகேஷன்ஸ் நிறுவனத்தின் அடிப்படை தொலை தொடர்பு வசதிகளை, ஆர்ஜியோவுக்கு வழங்குவதற்கு ஒப்பந்தம் செய்து கொண்டுள்ளார்.
இந்நிலையில், ஆர்ஜியோவின் அதிரடி நடவடிக்கைகளை பார்த்து, தன் வர்த்தகத்தையும் வலுப்படுத்த முனைந்துள்ளார்.சமீபத்தில், ‘சிஸ்டெமா’ மொபைல் போன் சேவை நிறுவனத்தை கையகப்படுத்திய அனில் அம்பானி, அடுத்து, ஏர்செல் நிறுவனத்தை வாங்க உள்ளார் என, கூறப்படுகிறது. ஆக, இனி இந்திய தொலை தொடர்பு சேவை துறையில், அம்பானி சகோதரர்களின் ஆட்சி தான்.
மேலும் பொது செய்திகள்
|
Advertisement
|
Advertisement
|
Advertisement
|
|
|
|