பதிவு செய்த நாள்
28 மார்2016
07:31
புதுடில்லி : மத்திய அரசு, அன்னிய முதலீடுகளை அதிக அளவில் ஈர்க்கும் நோக்கில், தொழில் துவக்குவதற்கான நடைமுறைகளை சுலபமாக்கி வருகிறது.
அவற்றில் ஒன்றாக, கம்பெனி கள் சட்டத்தின் கீழ், நிறுவனங்களை பதிவு செய்வதற்கான வழிமுறையை, ஒரே குடையின் கீழ், மத்திய அரசு கொண்டு வந்து உள்ளது. இதற்காக, மத்திய நிறுவன விவகாரங்கள் அமைச்சகம், சி.ஆர்.சி., எனப்படும், மத்திய பதிவு மையம் என்ற அமைப்பை உருவாக்கியுள்ளது. இந்த அமைப்பு, வலைதளம் வாயிலாக வரும் அனைத்து விண்ணப்பங்களையும் பரிசீலித்து, நிறுவனங்களை பதிவு செய்து தரும் பணியை மேற்கொள்ளும். தற்போது, நிறுவனங்களை பதிவு செய்யும் பணியை, கம்பெனிகள் பதிவாளர் அலுவலகம் மேற்கொண்டு வருகிறது; இன்று முதல், இப்பணியை, சி.ஆர்.சி., மேற்கொள்ள உள்ளது.
புதிய நிறுவனங்களை துவக்க விரும்புவோர், கம்பெனிகள் பதிவு சட்டத்தின் கீழ், உரிய தொகையுடன், வலைதளம் வாயிலாக மின்னணு விண்ணப்பங்களை – ஐ.என்.சி., 2, 7, 29; ஐ.என்.சி., 22, டி.ஐ.ஆர்., 12, யு.ஆர்.சி., 1 படிவங்களை பூர்த்தி செய்து அனுப்பலாம். அந்த விண்ணப்பங்களை, சி.ஆர்.சி., பரிசீலித்து, தகுதியுள்ள நிறுவனங்களுக்கு பதிவுச் சான்றிதழ் வழங்கும். அதே சமயம், நிறுவனங்களை பதிவு செய்வதற்காக பெறப்படும் விண்ணப்பங்கள், கம்பெனிகள் சட்ட விதிமுறைகளின்படி உள்ளதா; அதே பெயரில் வேறு நிறுவனங்கள் செயல்படுகின்றனவா என்பது உள்ளிட்ட ஆய்வுகளை ஆர்.ஓ.சி., மேற்கொள்ளும். இதையடுத்து, ஆர்.ஓ.சி., அளிக்கும் பரிந்துரையின் அடிப்படையிலேயே, சி.ஆர்.சி., புதிய நிறுவனங்களை பதிவு செய்யும்.
இன்று முதல் அமலுக்கு வரும் இந்த நடைமுறையால், ஒரு நிறுவனம், கம்பெனிகள் சட்டத்தின் கீழ், உரிய விதிமுறைகளை பின்பற்றி வலைதளத்தில் விண்ணப்பித்தால், 24 மணி நேரத்தில் அது தொடர்பான பரிசீலனை முடிவடைந்து, மறுநாள் பதிவு சான்றிதழ் பெற்று விடலாம். ‘இப்பணிகள் விரைவாக நடைபெறுகின்றனவா என்பது நேரடியாக மேற்பார்வையிடப்படும்’ என, நிறுவன விவகாரங்கள் அமைச்சகம் தெரிவித்துள்ளது.
சர்வதேச நடைமுறைஉலக நாடுகளில் தொழில் துவங்குவதற்கான நடைமுறைகள் எளிமையாக உள்ளன. அதை பின்பற்றி, மத்திய அரசு, சுலபமாக தொழில் துவங்குவதற்கான நடவடிக்கைகளை மேற்கொண்டு வருகிறது. அதன்படி, நாடு தழுவிய அளவில், ஒரே அமைப்பின் கீழ், மின்னணு விண்ணப்பங்களை பரிசீலித்து, பதிவு செய்யும் நடைமுறை அமலுக்கு வந்துள்ளது.
மேலும் பொது செய்திகள்
|
Advertisement
|
Advertisement
|
Advertisement
|
|
|
|