பதிவு செய்த நாள்
20 ஏப்2016
08:21
புதுடில்லி : இந்தியாவில், நேரடி விற்பனை சந்தை, கடந்த ஐந்து ஆண்டுகளில் மிகச் சிறப்பான வளர்ச்சி கண்டு வருகிறது.
ஒரு நிறுவனம், அதன் தயாரிப்பு பொருட்களை, கடைகளில் விற்காமல், தனி மையம் மற்றும் முகவர்கள் மூலம், நேரடியாக நுகர்வோருக்கு விற்பனை செய்வதை, நேரடி விற்பனை என்கின்றனர்.இந்தியாவில், இத்தகைய விற்பனையில், ‘ஆம்வே, டப்பர்வேர், மெடிகேர், ஒரிபிளேம்’ உள்ளிட்ட நிறுவனங்கள் ஈடுபட்டுள்ளன.கடந்த, 2010ல், 4,100 கோடி ரூபாயாக இருந்த, நேரடி விற்பனை சந்தை, 83 சதவீதம் வளர்ச்சி கண்டு, 7,500 கோடி ரூபாயாக உயர்ந்துள்ளது. இச்சந்தையில், வட மாநிலங்கள், 29 சதவீத பங்களிப்புடன் முதலிடத்தில் உள்ளன.
தென் மாநிலங்களின் பங்களிப்பு, 25 சதவீதமாக உள்ளது; இதில், கேரளா, 70 சதவீத பங்களிப்புடன் முதலிடத்தில் உள்ளது. இந்தியாவின் கிழக்கு மற்றும் மேற்கு பிராந்தியங்கள், முறையே, 18 மற்றும், 16 சதவீத பங்களிப்பை கொண்டுள்ளன. வடகிழக்கு மாநிலங்களின் பங்கு, 12 சதவீதமாக உள்ளது. பகுதி நேரமாகவோ அல்லது முழு நேரமாகவோ பொருட்களை விற்பனை செய்யும் வசதி, உழைப்பிற்கேற்ப கிடைக்கும் வருவாய், பணியில் சுதந்திரம், நிறுவனங்களின் ஊக்கத் தொகை உள்ளிட்ட அம்சங்கள், நேரடி விற்பனையில் பலரையும் ஈடுபட துாண்டுகின்றன. குறிப்பாக, இல்லத்தரசிகள் மிகுந்த ஆர்வமுடன், முகவர்களாக பணியாற்றி வருகின்றனர்.
தற்போது, இத்துறையில், 60 லட்சத்திற்கும் அதிகமான நேரடி விற்பனை முகவர்கள் உள்ளனர்; அவர்களில், 35 லட்சம் பேர் பெண்கள் என்பது குறிப்பிடத்தக்கது. ‘வரும், 2025ல், நேரடி விற்பனையில், பெண்களின் பங்களிப்பு, ஒரு கோடியை எட்டும்’ என, புள்ளி விவரம் கூறுகிறது. நேரடி விற்பனையில் ஈடுபட்டுள்ள பெரும்பான்மையான நிறுவனங்கள், பொருட்களை தயாரிப்பது, அவற்றை பாக்கெட்டுகளில் அடைப்பது உள்ளிட்ட பணிகளை, சிறிய மற்றும் நடுத்தர நிறுவனங்களுக்கு அளித்து, பெற்றுக் கொள்கின்றன. இதனால், நேரடி விற்பனை துறை, மறைமுகமாகவும், பலருக்கு வேலைவாய்ப்புகளை வழங்கி வருகிறது.
நேரடி விற்பனை போல், ‘பொன்ஸி’ எனப்படும், போலி விற்பனை திட்டங்களும், சந்தையில் புழங்குகின்றன. மத்திய அரசு, தெளிவான நேரடி விற்பனை கொள்கையை அறிவித்து, தனி அமைச்சகத்தை ஏற்படுத்தினால், போலி திட்டங்களால் ஏற்படும் பாதிப்புகளை தடுக்கலாம் என, அங்கீகரிக்கப்பட்ட நேரடி விற்பனை நிறுவனங்கள் தெரிவிக்கின்றன.
மேலும் பொது செய்திகள்
|
Advertisement
|
Advertisement
|
Advertisement
|
|
|
|