பதிவு செய்த நாள்
11 மே2016
04:59
மும்பை:கடந்த 2015 – 16ம் நிதியாண்டில், ஜன., – மார்ச் வரையிலான நான்காவது காலாண்டு முடிவுகளை, இதுவரை, 350 நிறுவனங்கள் வெளியிட்டுள்ளன. அந்நிறுவனங்களின் ஒட்டுமொத்த விற்பனை, 5.6 சதவீதம் வளர்ச்சி கண்டிருப்பது தெரியவந்துள்ளது. ஒட்டு மொத்த லாபம், 16.9 சதவீதம் அதிகரித்து உள்ளது. இது, கடந்த, ஆறு காலாண்டுகளில் காணாத வேகமான வளர்ச்சியாகும். இந்நிறுவனங்கள், தொடர்ந்து நான்கு காலாண்டுகளாக, வருவாயில் சரிவைசந்தித்து வந்தன. தகவல் தொழில்நுட்ப துறை சார்ந்த ஏற்றுமதியாளர்கள், ஒரு சில தனியார் வங்கிகள், வங்கி சாரா நிதி நிறுவனங்கள், ரிலையன்ஸ் இண்டஸ்ட்ரீஸ், எய்ச்சர் மோட்டார்ஸ் போன்ற தனியார் நிறுவனங்கள், ஒட்டுமொத்த விற்பனை எழுச்சிக்கு துணை புரிந்துள்ளன. அதேசமயம், கெய்ர்ன் இந்தியா போன்ற எரிசக்தி துறை நிறுவனங்கள், பொறியியல் சாதனங்கள் தயாரிப்பு நிறுவனங்களின் விற்பனை வளர்ச்சி குறைந்துள்ளது.மதிப்பீட்டிற்கு எடுத்துக் கொள்ளப்பட்ட காலாண்டில், 350 நிறுவனங்களின் நிகர விற்பனை, 4.13 லட்சம் கோடி ரூபாயாகவும், நிகர லாபம், 55 ஆயிரம் கோடி ரூபாயாகவும் இருந்தன.
முந்தைய, 2014 – 15ம் நிதியாண்டின், இதே காலாண்டில், இவை முறையே, 3.91 லட்சம் கோடி ரூபாய் மற்றும், 47 ஆயிரம் கோடி ரூபாய் என்ற அளவில் காணப்பட்டன. இதே காலத்தில், தயாரிப்பு துறையைச் சேர்ந்த, 196 நிறுவனங்களின் நிகர விற்பனை, 3.8 சதவீதத்தில் இருந்து, 5.8 சதவீதமாகவும், நிகர லாபம், 4.6 சதவீதத்தில் இருந்து, 15.8 சதவீதமாகவும் உயர்ந்துள்ளன. அதேசமயம், இதே காலத்தில், தகவல் தொழில்நுட்ப துறை ஏற்றுமதியை தவிர்த்து, போக்குவரத்து, ஓட்டல், ரியல் எஸ்டேட், தொலைதொடர்பு உள்ளிட்ட சேவைகள் துறையின் நிகர லாபம், 21.8 சதவீதம் சரிவடைந்துள்ளது.எரிபொருள் மற்றும் மூலப்பொருட்கள் விலை குறைவால், தயாரிப்பு துறை நிறுவனங்கள் தொடர்ந்து பயன் பெற்று வருகின்றன.
தகவல் தொழில்நுட்ப துறையைச் சேர்ந்த, டாடா கன்சல்டன்சி சர்வீசஸ், இன்போசிஸ், மைன்டு ட்ரீ, பெர்சிஸ்டன்ட் சிஸ்டம்ஸ் ஆகியவை, நான்காம் காலாண்டில், ஜொலிக்கும் நட்சத்திரங்களாக விளங்குகின்றன.அடுத்து, டாடா மோட்டார்ஸ், டாடா ஸ்டீல், கெயில், ஹிண்டால்கோ, பி.எச்.இ.எல்., லார்சன் அண்டு டூப்ரோ, ஐ.டி.சி., இந்துஸ்தான் யூனிலீவர் உள்ளிட்ட ஜாம்பவான்களின் காலாண்டு முடிவுகள் வர உள்ளன.
மேலும் ஐ.டி செய்திகள்
|
Advertisement
|
Advertisement
|
Advertisement
|
|
|
|