பதிவு செய்த நாள்
03 ஜூன்2016
07:38
புதுடில்லி: இந்தியாவின் தயாரிப்பு துறை சந்தித்து வரும் கடுமையான சவால்கள் காரணமாக, பிரதமர் மோடியின் கனவுத் திட்டமான, ‘மேக் இன் இந்தியா’ திட்டம், எதிர்பார்த்த வெற்றியை பெறுமா என்பது கேள்விக்குறியாக உள்ளது.
மத்திய அரசு, அன்னிய முதலீடுகள் மூலம், உள்நாட்டு உற்பத்தியை ஊக்குவிக்கும் நோக்கில், ‘மேக் இன் இந்தியா’ திட்டத்தை அறிமுகப்படுத்தியது. ‘இத்திட்டத்தில், அரசின் இலக்கை எட்டுவதற்கு தடையாக, தயாரிப்பு துறை, பல்வேறு சிக்கல்களை சந்தித்து வருகிறது’ என, பி.எம்.ஐ., நிறுவனத்தின் ஆய்வறிக்கையில் கூறப்பட்டுள்ளது.
அதன் விவரம்:பலவீனமான அடிப்படை கட்டமைப்பு வசதிகள், இந்திய தயாரிப்பு துறையின் செயல்பாட்டிற்கு இடையூறாக உள்ளன. போதுமான அளவிற்கு, ரயில் போக்குவரத்தில் ஒருங்கிணைப்பு வசதிகள் இல்லை. அதனால், நிலக்கரி மற்றும் இறக்குமதி செய்யப்படும் மூலப் பொருட்களை, புறநகர் பகுதிகளில் உள்ள தொழிற்சாலைகளுக்கு விரைந்து எடுத்துச் செல்ல முடியாத நிலை உள்ளது. மின் வினியோகத்தை மேலும் சீரமைக்க வேண்டும். 2013 முதல், தொழிற்சாலைகள், மின் இணைப்பிற்காக காத்திருக்கும் காலம் குறைந்துள்ளது. தற்போது, தொழிற்சாலைகளுக்கு, 90 நாட்களில் மின் இணைப்பு வழங்கப்படுகிறது. இதுவும் மிக அதிகம் தான். இதை, மேலும் குறைக்க வேண்டும்.
எண்ணற்ற கட்டுப்பாடுகள் காரணமாக, தொழிற்சாலைகளுக்கு தேவையான நிலத்தை கையகப்படுத்துவதில், தயாரிப்பு துறை கடும் சவால்களை சந்தித்து வருகிறது. தொழிலாளர் சார்ந்த பிரச்னைகளும் உள்ளன. இது போன்ற சிக்கல்களுக்கு தீர்வு காண, மத்திய அரசு முயற்சித்து வருகிறது. எனினும், ராஜ்யசபாவில், போதுமான பெரும்பான்மை இல்லாததால், சீர்திருத்தங்களை அமல்படுத்த முடியாத நிலையில், மத்திய அரசு உள்ளது. இப்பிரச்னைகள் தொடர்பாக, பிராந்திய கட்சிகளிடையே மத்திய அரசு பேச்சு நடத்தி, ஒருமித்த கருத்தை ஏற்படுத்த வேண்டும். அது, உடனடியாக நடைபெறக் கூடிய சாத்தியம் இல்லை.
இதுபோன்ற சிக்கல்களால், தயாரிப்பு துறையில், புதிய முதலீடுகள் குவிவதில் மந்தநிலை காணப்படுகிறது. ஏற்கனவே செயல்பட்டு வரும் நிறுவனங்களும், அவற்றின் விரிவாக்கத் திட்டங்களை தள்ளி வைத்துள்ளன. இத்தகைய சூழல் காரணமாக, தயாரிப்பு துறையில், ஜாம்பவான்களாக விளங்கும் சீனா மற்றும் ஜெர்மனிக்கு நிகராக, இந்தியா உருவெடுப்பது தாமதமாகும்.இவ்வாறு அதில் கூறப்பட்டு உள்ளது.
மேலும் பொது செய்திகள்
|
Advertisement
|
Advertisement
|
Advertisement
|
|
|
|