பதிவு செய்த நாள்
19 ஜூலை2016
03:48
புதுடில்லி : சரக்கு இறக்குமதி தொடர்பான காகித ஆவணங்களுக்கு விடை கொடுத்து விட்டு, அடுத்த ஆண்டு முதல், முழுவதும் மின்னணு நடைமுறைக்கு மாற, சுங்கத் துறை திட்டமிட்டு, அதற்கான பணிகளை முடுக்கி விட்டுள்ளது.
இறக்குமதியாகும் சரக்கை, உள்நாட்டிற்குள் அனுமதிக்க, சுங்கத் துறையின் ஒப்புதல் தேவை. இதற்கு, 18 விதமான ஆவணங்களை, இறக்குமதியாளர்கள், தாக்கல் செய்யும் நிலை இருந்தது. இதனால் ஏற்படும் கால விரயத்தை குறைக்க, சரக்கு இறக்குமதிக்கு அனுமதி பெறுவது தொடர்பான அனைத்து நடைமுறைகளையும், படிப்படியாக, மின்னணு முறைக்கு மாற்ற, மத்திய கலால் மற்றும் சுங்க வாரியம் முடிவு செய்தது.
அதன்படி, கடந்த ஏப்., 1ல், ‘ஸ்விப்ட்’ என்ற திட்டம் அறிமுகப்படுத்தப்பட்டது. இத்திட்டத்தின் கீழ், பல்வேறு அரசு துறைகள் ஒன்றிணைக்கப்பட்டுள்ளன.இதன்மூலம், இறக்குமதியாகும் பொருட்களின் விவரம், விலைப்பட்டியல், பேக்கேஜ் குறித்த தகவல் ஆகிய மூன்று ஆவணங்களை மட்டும் இறக்குமதியாளர்கள் அளித்து, சுங்கத் துறையின் ஒப்புதலை பெற, வழி ஏற்பட்டுள்ளது. இந்த நடைமுறை மூலம், கடந்த ஜூன் வரையிலான மூன்று மாதங்களில், 10 லட்சத்திற்கும் அதிகமான இறக்குமதி ஆவணங்கள் பரிசீலிக்கப்பட்டுள்ளன.
இதுகுறித்து, சுங்கத் துறை கூடுதல் டைரக்டர் ஜெனரல் எஸ்.கே.விமலநாதன் கூறியதாவது: அடுத்த ஆறு மாதங்களில், சரக்கு இறக்குமதிக்கு சுங்க அனுமதி பெறும் நடைமுறை, முழுவதுமாக மின்னணுமயமாகும். தற்போது, சுங்கத் துறை அனுமதிக்காக, மூன்று சாப்ட்வேர்கள் பயன்படுத்தப்படுகின்றன. இவற்றை, ஒரே குடையின் கீழ் ஒருங்கிணைக்க நடவடிக்கை எடுக்கப்பட்டு வருகிறது. இதன்மூலம், தற்போது இறக்குமதி ஆவணங்களின் பரிசீலனைக் காலம், தற்போதைய 10 நிமிடங்களில் இருந்து, 10 வினாடிகளாக குறையும். சுங்கத் துறையின் சுறுசுறுப்பான செயல்பாடு காரணமாக, இறக்குமதியாகும் சரக்குகள் மிக விரைவாக, உள்நாட்டு சந்தைக்கு வர வழியேற்படும்.இவ்வாறு அவர் கூறினார்.
சந்தேகத்திற்கிடமான சரக்குகளை, சுங்க அதிகாரிகள், ஒவ்வொன்றாக ஆய்வு செய்ய தேவையில்லை. அந்த சரக்கை ஏற்றுமதி செய்த நாடு, இறக்குமதியாளரின் கடந்தகால வர்த்தக வரலாறு உள்ளிட்ட அனைத்து தகவல்களையும், கணினி வாயிலாகவே, சுங்க அதிகாரிகள் அறியலாம். வளர்ந்த நாடுகளில் உள்ள இவ்வசதி, இந்தியாவிலும் செயல்பாட்டிற்கு வந்துள்ளது.-ராஜீவ் தண்டன், தலைமை ஆணையர், சுங்கத் துறை
மேலும் பொது செய்திகள்
|
Advertisement
|
Advertisement
|
Advertisement
|
|
|
|