பதிவு செய்த நாள்
24 ஜூலை2016
01:04
புதுடில்லி:கடந்த இரண்டு ஆண்டுகளாக மந்தமாக இருந்த நுகர்வோர் சாதனங்கள் விற்பனை, வரும் பண்டிகை காலம் முதல் சூடு பிடிக்கும் என, தெரிகிறது. இதையொட்டி பல நிறுவனங்கள், புதிய மாடல்களில், நவீன வாஷிங் மிஷின், ரெப்ரிஜரேட்டர், ‘டிவி’ மற்றும் ‘ஏசி’ உள்ளிட்ட வீட்டு பயன்பாட்டு சாதனங்களை அறிமுகப்படுத்த திட்டமிட்டு உள்ளன.
கடந்த, 2014ல் பருவ மழை தவறியது; 2015ல், போதிய அளவு மழை பொழியாதது போன்றவற்றால், விவசாய உற்பத்தி பாதிக்கப்பட்டது. கிராமப்புற மக்களிடையே பணப்புழக்கம் குறைந்து, அவர்களின் செலவழிப்பு வருவாய் குறைந்தது. இந்தாண்டு, பருவ மழை துவங்கி, நாடு முழுவதும் நன்கு பெய்து வருகிறது. வழக்கத்தை விட, மழைப் பொழிவு அதிகம் இருக்கும் என, தேசிய வானிலை ஆய்வு மையம் தெரிவித்துள்ளது. இதனால், விவசாயப் பொருட்களின் உற்பத்தி அதிகரித்து, கிராமப்புற மக்களிடம் பணப்புழக்கம் அதிகரிக்கும் என, மதிப்பிடப்பட்டுள்ளது.
இது, கிராமப்புறங்களில் வீட்டு பயன்பாட்டு சாதனங்கள் விற்பனை உயர்வுக்கு வழி வகுக்கும் என, எதிர்பார்க்கப்படுகிறது. கடந்த ஆண்டு, பல முன்னணி நிறுவனங்களின், ‘ஏசி’ மற்றும் ‘டிவி’ விற்பனை சரிவடைந்தது. இந்தாண்டு, கிராமங்கள் மட்டுமின்றி நகரங்களிலும், வீட்டு பயன்பாட்டு சாதனங்கள் விற்பனை எகிறும் என, கணிக்கப்பட்டு உள்ளது. ஏழாவது ஊதியக் குழு பரிந்துரை அமலுக்கு வந்துள்ளதால், மத்திய அரசு ஊழியர்கள், ஓய்வூதியர்கள் உட்பட, ஒரு கோடிக்கும் அதிகமானோருக்கு, முன்தேதியிட்ட, ஊதிய உயர்வு தொகை கிடைக்கும். கணிசமான இத்தொகையில், மக்கள், விரும்பிய வீட்டு பயன்பாட்டு சாதனங்களை வாங்குவர் என, எதிர்பார்க்கப்படுகிறது. இதையொட்டி, வீடியோகான், வேர்ல்பூல், பி.எஸ்.எச்., ஹோம் அப்ளையன்சஸ், பானசோனிக் உள்ளிட்ட முன்னணி நிறுவனங்கள் போட்டி போட்டுக் கொண்டு, பல விதமான நுகர்வோர் சாதனங்களை சந்தையில் அறிமுகப்படுத்த திட்டமிட்டுள்ளன.
குன்ஜன் ஸ்ரீவத்சவா, நிர்வாக இயக்குனர், பி.எஸ்.எச்., ஹோம் அப்ளையன்சஸ்: தீபாவளி, கிறிஸ்துமஸ் பண்டிகைகளை முன்னிட்டு, புதிய சமையலறை சாதனங்கள், ரெப்ரிஜரேட்டர்கள் ஆகியவற்றையும், சிறப்பு நிதியுதவி திட்டங்களையும் அறிமுகப்படுத்த உள்ளோம்.சந்திரமணி சிங், தலைமை செயல் அதிகாரி, வீடியோகான்: மக்கள், ஆண்டின் முதல் பாதியில், குறைந்த விலையில் தரமான பொருட்களை வாங்க விரும்புவர்.பண்டிகை காலத்தில், சற்று விலை அதிகமுள்ள, மேம்பட்ட தரத்தில் பொருட்களை வாங்குவர். அதற்கேற்ப, ‘பிரீமியம், செமி பிரீமியம்’ பிரிவுகளில், வாஷிங் மிஷின், ரெப்ரிஜரேட்டர், எல்.இ.டி., ‘டிவி’ உள்ளிட்ட சாதனங்களை அறிமுகப்படுத்த தயாராகி வருகிறோம்.
கபில் அகர்வால், துணை தலைவர், சந்தைப்படுத்துதல், வேர்ல்புல்: புதிய வாஷிங் மிஷின்களுடன், தீபாவளியை முன்னிட்டு சிறப்பு தள்ளுபடிகளையும் வழங்க உள்ளோம். விளம்பரங்களுக்கு அதிகம் செலவிட முடிவு செய்துள்ளோம்.கமல் நந்தி, செயல் துணை தலைவர், கோத்ரெஜ் அப்ளையன்சஸ்: மக்களிடம் வாங்கும் சக்தி அதிகரித்துள்ளதால், இந்தாண்டு, பிரீமியம் பொருட்களின் விற்பனை அதிகம் இருக்கும் என, எதிர்பார்க்கிறோம்.
மேலும் பொது செய்திகள்
|
Advertisement
|
Advertisement
|
Advertisement
|
|
|
|