பதிவு செய்த நாள்
02 ஆக2016
23:39
புதுடில்லி : மந்தநிலையில் இருந்த இந்திய கார் சந்தை, கடந்த சில மாதங்களாக, மெல்ல எழுச்சி பெற்று வருகிறது. கடந்த ஜூலை மாதம், பெரும்பான்மையான முன்னணி கார் தயாரிப்பு நிறுவனங்களின் விற்பனை, 10 சதவீதத்திற்கும் அதிகமாக வளர்ச்சி கண்டுள்ளது.
மாருதி சுசூகி இந்தியா நிறுவனம், கார் விற்பனையில் முதலிடத்தில் உள்ளது. இந்நிறுவனம், கடந்த ஜூலையில், 1 லட்சத்து, 25,778 கார்களை விற்பனை செய்துள்ளது. இது, கடந்த ஆண்டு, இதே காலத்தில் விற்பனையான, 1 லட்சத்து, 10,405 கார்களை விட, 13.9 சதவீதம் அதிகம். இதே காலத்தில், இந்நிறுவனத்தின் புதிய, ‘விட்டாரா பிரெஸ்ஸா, எர்டிகா, எஸ் – கிராஸ்’ ஆகிய கார்களின் விற்பனை, இரண்டு மடங்கு அதிகரித்து, 6,916லிருந்து, 17,382 ஆக உயர்ந்துள்ளது. எனினும், ‘ஆல்டோ, வேகன்ஆர்’ உள்ளிட்ட சிறிய கார்கள் விற்பனை, 7.2 சதவீதம் சரிவடைந்து, 7,752லிருந்து, 35,051ஆக குறைந்துள்ளது.
அதிகரிப்பு...அதேசமயம், ‘ஸ்விப்ட், ரிட்ஸ், எஸ்டிலோ, டிசையர், பலேனோ’ ஆகிய கார்கள் விற்பனை, 4.1 சதவீதம் அதிகரித்து, 48,381லிருந்து, 50,362 ஆக உயர்ந்துள்ளது. இதே காலத்தில், ஹூண்டாய் மோட்டார் இந்தியா நிறுவனத்தின் கார் விற்பனை, 12.87 சதவீதம் வளர்ச்சி கண்டு, 36,503லிருந்து, 41,201ஆக அதிகரித்துள்ளது.
மகிந்திரா அண்டு மகிந்திரா நிறுவனத்தின் கார் விற்பனை, 14 சதவீதம் அதிகரித்து, 31,087லிருந்து, 35,305ஆக உயர்ந்துள்ளது. போர்டு இந்தியாவின் கார் விற்பனை, 62.21 சதவீதம் உயர்ந்து, 4,362லிருந்து, 7,076 ஆக அதிகரித்துள்ளது.
மகிழ்ச்சி : ரெனோ இந்தியாவின் கார் விற்பனை, ஏழு மடங்கு உயர்ந்து, 1,686லிருந்து, 11,968 என்ற அளவை எட்டியுள்ளது. டாடா மோட்டார்ஸ் நிறுவனத்தின் கார் விற்பனை, 43.29 சதவீதம் அதிகரித்து, 8,520லிருந்து, 12,209 ஆக உயர்ந்துள்ளது. டொயோட்டா கிர்லோஸ்கர் நிறுவனத்தின் விற்பனை, 2.76 சதவீதம் வளர்ச்சி கண்டு, 12,070லிருந்து, 12,404ஆக உயர்ந்துள்ளது.கார் விற்பனை கிடுகிடுவென உயர்ந்து வருவது, தயாரிப்பு நிறுவனங்களை மகிழ்ச்சியில் ஆழ்த்தியுள்ளது.
ஹூண்டாய் நிறுவனத்தின், ‘கிராண்ட் ஐ10, எலைட் ஐ20, கிரெட்டா’ ஆகிய மாடல்கள், சிறப்பான விற்பனை வளர்ச்சிக்கு துணை புரிந்து வருகின்றன. பருவமழை நன்கு இருக்கும் என்ற எதிர்பார்ப்பு, பணவீக்கம் கட்டுக்குள் இருப்பது, குறைந்த வட்டி விகிதம், எரிபொருள் விலை வீழ்ச்சி உள்ளிட்ட அம்சங்கள், நுகர்வோரிடம் நம்பிக்கையை ஏற்படுத்தியுள்ளன. இதன் காரணமாக, கார் வாங்குவது அதிகரித்துள்ளது.– ராகேஷ் ஸ்ரீவத்சவா, துணை தலைவர் , விற்பனை – சந்தைப்படுத்துதல், ஹூண்டாய் மோட்டார் இந்தியா
மேலும் பொது செய்திகள்
|
Advertisement
|
Advertisement
|
Advertisement
|
|
|
|