பதிவு செய்த நாள்
16 ஆக2016
05:09
புதுடில்லி : ‘உலகளவில், பலதரப்பட்ட பொருட்களை ஏற்றுமதி செய்வதில், இந்தியாவின் பங்களிப்பு அதிகரித்து வருகிறது’ என, பி.எச்.டி., வர்த்தக கூட்டமைப்பின் ஆய்வறிக்கையில் தெரிவிக்கப்பட்டுள்ளது.
அதன் விபரம்: இந்தியா, பலதரப்பட்ட பொருட்களை ஏற்றுமதி செய்வதில் கவனம் செலுத்தி வருகிறது. இது, ஒட்டுமொத்த ஏற்றுமதி வளர்ச்சிக்கு உதவும். உலக நாடுகளின் ஏற்றுமதியில், முதல் 10 இடங்களில் உள்ள பொருட்களில், இந்தியாவின் பங்கு, 58 சதவீதமாக உள்ளது. இந்த பட்டியலில், ஹாங்காங், 89 சதவீதத்துடன் முதலிடத்தில் உள்ளது. அடுத்த இடங்களில், கொரிய குடியரசு, 86 சதவீதம்; ஜப்பான், 77; பிரிட்டன், 71; ஜெர்மனி, 70; அமெரிக்கா, 68; சீனா, 68; நெதர்லாந்து, 63; பிரான்ஸ், 60 சதவீதம் என்ற அளவில், பங்களிப்பை கொண்டுள்ளன.
சர்வதேச நாடுகளின் பொருளாதார மந்தநிலையால், இதர நாடுகளைப் போல, இந்தியாவின் ஏற்றுமதி வளர்ச்சியும் குறைந்துள்ளது.எனினும், சரக்கு போக்குவரத்து உள்ளிட்ட, ஏற்றுமதி சார்ந்த அடிப்படை கட்டமைப்பு துறைகளில் ஏற்பட்டு வரும் முன்னேற்றம், ஆறுதல் அளிப்பதாக உள்ளது. இதர போட்டி நாடுகளை விட, இந்திய ஏற்றுமதி நிறுவனங்களின் கடன் சார்ந்த செலவினங்கள் அதிகமாக உள்ளன. இதுவும், ஏற்றுமதி வளர்ச்சிக்கான தடைக்கற்களில் ஒன்றாக உள்ளது.
சர்வதேச பொருளாதார மந்தநிலையால், 2015ல், பிரான்ஸ் தவிர்த்து, இதர முன்னணி நாடுகள், ஏற்றுமதி வளர்ச்சியில், பின்னடைவை சந்தித்துள்ளன. இந்த வகையில், நெதர்லாந்தின் ஏற்றுமதி வளர்ச்சி, மைனஸ் 17 சதவீதம் என்ற அளவில் பின்னடைவை சந்தித்துள்ளது. ஏற்றுமதி வளர்ச்சியில் பின்னடைவை சந்தித்த நாடுகளின் வரிசையில், இத்தாலி, 13 சதவீதம்; ஜெர்மனி, 11; பிரிட்டன், 9; கொரிய குடியரசு, 8; அமெரிக்கா, 7; ஹாங்காங், 5; சீனா, 3 சதவீதம் ஆகியவை இடம் பெற்றுள்ளன.
கடந்த, 2015 – 16ம் நிதியாண்டில், சர்வதேச ஏற்றுமதியில், இந்தியாவின் பங்கு, 1.6 சதவீதம்; ஏற்றுமதி வளர்ச்சி மைனஸ் 15.5 சதவீதம் என்ற அளவில் இருக்கும் என, மதிப்பிடப்பட்டுள்ளது. இந்தியாவில், சுலபமாக தொழில் துவங்க எடுக்கப்பட்டு வரும் நடவடிக்கைகள், ஏற்றுமதி அடிப்படை கட்டமைப்பு வசதிகளில் மேற்கொண்டு வரும் சீர்திருத்தங்கள் போன்றவை, நம்பிக்கையை விதைத்துள்ளன. அதற்கேற்ப, கடந்த ஜூலை மாதம், நாட்டின் ஏற்றுமதி, 1.27 சதவீதம் வளர்ச்சி கண்டுள்ளது. இது, வரும் மாதங்களில் மேலும் அதிகரிக்கும் என, எதிர்பார்க்கப்படுகிறது. இவ்வாறு அதில் கூறப்பட்டு உள்ளது.
மேலும் பொது செய்திகள்
|
Advertisement
|
Advertisement
|
Advertisement
|
|
|
|