பதிவு செய்த நாள்
17 ஆக2016
04:09
புதுடில்லி : மத்திய அரசின், ‘சாகர்மாலா’ துறைமுக மேம்பாட்டு திட்டத்தின் கீழ், சரக்கு கப்பல் போக்குவரத்து மூலம், உருக்கு நிறுவனங்களுக்கு, ஆண்டுக்கு, 6,500 கோடி ரூபாய் மிச்சமாகும் என, ஆய்வொன்றில் தெரியவந்துள்ளது.
மத்திய அரசு, சாகர்மாலா என்ற துறைமுக மேம்பாட்டு திட்டத்தை, கடந்த ஆண்டு அறிமுகப்படுத்தியது. இத்திட்டத்தின் கீழ், 13 மாநிலங்கள் மற்றும் யூனியன் பிரதேசங்களை உள்ளடக்கிய, 7,500 கி.மீ., நீளமுள்ள இந்திய கடலோரப் பகுதியில், 5 – 6 புதிய துறைமுகங்கள் உருவாக்கப்பட உள்ளன; அவற்றில் அமைய உள்ள கடலோர பொருளாதார மண்டலங்களில், பல்வேறு துறை சார்ந்த தொழிற்சாலைகள் இடம் பெற உள்ளன.
உருக்கு நிறுவனங்கள்:இத்தொழிற்சாலைகள், அவற்றுக்கான மூலப் பொருட்களை, கடலோர சரக்கு கப்பல் போக்கு வரத்து மூலம், இதர மாநிலங்களில் இருந்து சுலபமாக பெற்றுக் கொள்ளும். இந்த வகையில், சாகர்மாலா திட்டம் மூலம், சரக்கு போக்குவரத்தில், ஆண்டுக்கு, 35 ஆயிரம் கோடி ரூபாய் மிச்சமாகும் என, மதிப்பிடப்பட்டுள்ளது. அதில், ஆண்டுக்கு, 4 கோடி டன் உருக்கு உற்பத்தி திறன் கொண்ட நிறுவனங்கள், 6,500 கோடி ரூபாய் வரை சேமிக்கும் என, எதிர்பார்க்கப்படுகிறது.
பெரும்பாலான உருக்கு நிறுவனங்கள், மூலப்பொருளான இரும்புத் தாது கிடைக்கும் பகுதிக்கு அருகேதான் தொழிற்சாலைகளை அமைக்கின்றன. அதனால், உள்நாடு மற்றும் வெளிநாட்டிற்கான சரக்கு போக்குவரத்திற்கு, கணிசமான தொகையை செலவிடுகின்றன. நகருக்கு அருகே, துறைமுகங்களில் அமையும், கடலோர பொருளாதார மண்டலங்களில், உருக்கு தொழிற்சாலைகளை நிறுவினால், சரக்கு போக்குவரத்து செலவு கணிசமாக குறையும். கடலோர சரக்கு போக்குவரத்திலும், உள்நாட்டில், குழாய் மூலம் இரும்புத் தாதுவை கொண்டு வருவதிலும், உருக்கு தொழிற்சாலைகள், பெரும் தொகையை மிச்சப்படுத்த முடியும்.
மிச்சப்படுத்தலாம் :உருக்கு பொருட்களை, உள்நாட்டில் விற்பனைக்கு அனுப்புவதிலும், சரக்கு போக்குவரத்து செலவை குறைக்கலாம்; ஏற்றுமதியிலும் பணத்தை மிச்சப்படுத்தலாம். தென்கொரியாவின், போஹங் மற்றும் எகிப்தின், போர்ட் செய்ட் துறைமுகங்களில், உருக்கு மற்றும் உர நிறுவனங்கள், இந்த வகையில் செயல்பட்டு வருவது குறிப்பிடத்தக்கது. இந்திய கடலோர பொருளாதார மண்டலங்களில் அமையும் உருக்கு நிறுவனங்கள், சரக்கு போக்குவரத்தில், டன்னுக்கு, சராசரியாக, 800 – 1,000 ரூபாய் மிச்சப்படுத்தலாம் என, மதிப்பிடப்பட்டுள்ளது.
மேலும் பொது செய்திகள்
|
Advertisement
|
Advertisement
|
Advertisement
|
|
|
|