பதிவு செய்த நாள்
22 ஆக2016
03:59
புதுடில்லி : ‘‘அடுத்த ஆண்டு அறிமுகமாக உள்ள, ஜி.எஸ்.டி., எனப்படும், சரக்கு மற்றும் சேவை வரி திட்டத்திற்கு ஏற்ப, சிறப்பு பொருளாதார மண்டலம் மற்றும் வெளிநாட்டு வர்த்தகம் சார்ந்த சட்டங்களில் திருத்தம் செய்யப்படும்,’’ என, மத்திய வர்த்தக துறை செயலர் ரீடா தியோதியா தெரிவித்து உள்ளார்.
அவர், டில்லியில், இந்திய தொழிலக கூட்டமைப்பின், ‘சர்வதேச வர்த்தக விதிமுறைகளில் ஏற்பட்டு வரும் மாற்றம்’ என்ற தலைப்பிலான கருத்தரங்கில், மேலும் பேசியதாவது: அடுத்த ஆண்டு, சரக்கு மற்றும் சேவை வரி அமலுக்கு வரும் என, எதிர்பார்க்கப்படுகிறது. இதன் மூலம், நாடு முழுவதும் ஒரே வரி என்ற நடைமுறை உருவாகும். அதனால், தற்போது பல்வேறு வரிச்சலுகைகளை அனுபவித்து வரும், சிறப்பு பொருளாதார மண்டல நிறுவனங்களுக்கான சட்டத்தில், தேவையான திருத்தங்கள் செய்யப்பட உள்ளன. அதுபோல, வெளிநாட்டு வர்த்தக சட்டத்திலும், உரிய திருத்தங்கள் செய்யப்படும். அதுமட்டுமின்றி, வெளிநாட்டு வர்த்தகத்திற்கான தலைமை இயக்குனரகம் செயல்படுத்தி வரும் திட்டங்களிலும், சரக்கு மற்றும் சேவை வரி சட்டத்திற்கு ஏற்ப, மாற்றங்கள் செய்யப்படும்.
இது தொடர்பாக, வரைவு மசோதாவில் சேர்க்கப்பட வேண்டிய அம்சங்கள் குறித்து, மத்திய அரசின் சட்ட வல்லுனர்கள் ஆராய்ந்து வருகின்றனர். தற்போது, சிறப்பு பொருளாதார மண்டலங்களில் உள்ள, நிறுவனங்களுக்கான வரி விதிப்பு முறைகள் தொடரும். அதுபோல, வெளிநாட்டு வர்த்தக சட்டத்தின் கீழ் உள்ள நடைமுறைகளும் நீடிக்கும். சரக்கு மற்றும் சேவை வரி சட்டம் சார்ந்த பணிகள் முடிவடையும் வரை, தற்போதைய நடைமுறைகளில், உடனடியாக எந்த மாற்றமும் செய்யப்பட மாட்டாது. சரக்கு மற்றும் சேவை வரி விதிப்பு அமலுக்கு வந்தால், அனைத்து அம்சங்களிலும் தெளிவான பார்வை கிடைக்கும். தற்போது, வெளிநாட்டு வர்த்தக தலைமை இயக்குனரகத்தின் ஒரு சில திட்டங்கள், இறக்குமதிக்கு செலுத்தும் வரியை, ஏற்றுமதி நிறுவனங்கள் திரும்ப பெற வகை செய்கின்றன.
இதை, சரக்கு மற்றும் சேவை வரி சட்டத்திற்கு ஏற்ப, மாற்றுவது குறித்து ஆலோசிக்கப்பட்டு வருகிறது. அனைத்து வரி சார்ந்த பிரச்னைகளுக்கும், சரக்கு மற்றும் சேவை வரி அமலுக்கு வருகையில் தீர்வு கிடைக்கும். சரக்கு மற்றும் சேவை வரி விதிப்பு, இந்தியாவின் மொத்த உள்நாட்டு உற்பத்தியை, 1 – 1.5 சதவீதம் உயர்த்த உதவும் என, மதிப்பிடப்பட்டு உள்ளது.இவ்வாறு அவர் கூறினார்.
மேலும் பொது செய்திகள்
|
Advertisement
|
Advertisement
|
Advertisement
|
|
|
|