பதிவு செய்த நாள்
05 அக்2016
03:08
புதுடில்லி : ‘இந்தியாவின் பொருளாதார வளர்ச்சி வலிமையாக உள்ளது; இது, மேலும் வலுப்பெறும்’ என, உலக வங்கி தெரிவித்து உள்ளது. இவ்வங்கி, தெற்காசிய நாடுகளின் பொருளாதார நிலை பற்றிய ஆய்வறிக்கையை வெளியிட்டு உள்ளது.
அதன் விபரம்: நடப்பாண்டு, இந்தியாவின் பொருளாதார வளர்ச்சி, 7.6 சதவீதம் என்றளவில், தொடர்ந்து வலுவாகவே இருக்கும்.நாடு முழுவதும் பரவலாக பெய்துள்ள பருவமழையால், விவசாயத் துறையில் நிலவிய மந்த நிலை மாறும்; அத்துறை மீண்டும் எழுச்சி காணும். ஏழாவது ஊதியக் குழுவின் பரிந்துரையை அமல்படுத்தியதால், மத்திய அரசு ஊழியர்களின் ஊதியம் உயர்ந்துள்ளது.
சூடு பிடிக்கும்இதனால், பணப்புழக்கம் பெருகும்; மக்கள், பொருட்கள் வாங்குவது அதிகரிக்கும். இது, தொழில் உற்பத்தி பெருகவும், ஏற்றுமதி அதிகரிக்கவும் துணை புரியும். இதன் மூலம், சுணக்கம் கண்டிருந்த தனியார் துறை முதலீடுகள் சூடு பிடிக்கும். இந்த மதிப்பீட்டின் அடிப்படையில், அடுத்த ஆண்டு, நாட்டின் பொருளாதார வளர்ச்சி, 7.7 சதவீதமாக உயரும் என, எதிர்பார்க்கப்படுகிறது.நாட்டின் வேகமான பொருளாதார வளர்ச்சி, வறுமையை ஒழிப்பதில், முக்கிய பங்காற்றும். சமீப காலமாக, இந்தியா, வறுமை ஒழிப்பில் வெற்றி கண்டு வருகிறது. ஆனால், அது பரவலாக இல்லை. ஏற்கனவே, நல்ல நிலையில் உள்ள மாநிலங்களும், சமூக அமைப்புகளும், மேலும் வளர்ச்சி பெற்று வருகின்றன.
ஆகவே, வறுமை ஒழிப்பு நடவடிக்கைகளால், பயன் பெறாத பெண்கள் சமூகம், பழங்குடியினர் உள்ளிட்டோரை மேம்படுத்த வேண்டிய முக்கிய சவால், இந்தியாவுக்கு உள்ளது. குறிப்பாக, ஆரோக்கியம், சத்துணவு, தரமான கல்வி உள்ளிட்ட வசதிகள், அனைவருக்கும் கிடைக்க வேண்டும். அரசு மேற்கொண்ட வரி மற்றும் ஊதிய சீர்திருத்தங்கள், குறிப்பாக, சரக்கு மற்றும் சேவை வரி சட்டம் நிறைவேற்றம், பருவமழை பொழிவு ஆகியவை, கிராமம் மற்றும் நகர்ப்புற பொருளாதார வளர்ச்சிக்கு துணை புரியும்.
சவால்கள்அதேசமயம், கொள்கை திட்டங்களை அமல்படுத்துவதில் காணப்படும் நிச்சயமற்ற நிலை, நிதிப் பிரச்னைகள் உள்ளிட்ட, முக்கிய சவால்களும் அப்படியே உள்ளன. அவற்றையும், இந்தியா சமாளித்தாக வேண்டும்.நாட்டின் பொருளாதாரம் வளர்ச்சியடையும் போது, வறுமை ஒழிப்பும் பரவலாக இருக்குமாறு, இந்தியா, பார்த்துக் கொள்ள வேண்டியது அவசியம்.இவ்வாறு அதில் கூறப்பட்டு உள்ளது.
சர்வதேச நெருக்கடி, சீனாவின் மந்த நிலை ஆகியவற்றுக்கு இடையிலும், உலக பொருளாதார வளர்ச்சியில், தெற்காசிய நாடுகள் சிறந்து விளங்குகின்றன.– உலக வங்கி
மேலும் பொது செய்திகள்
|
Advertisement
|
Advertisement
|
Advertisement
|
|
|
|