பதிவு செய்த நாள்
21 டிச2016
23:50
மும்பை : ‘கார்ப்பரேட் நிறுவனங்களில், கடந்த நிதியாண்டில், 1.08 லட்சம் வேலைவாய்ப்புகள் உருவாகியுள்ளன’ என, ‘கேர்’ தர நிர்ணய நிறுவனத்தின் ஆய்வறிக்கையில் தெரிவிக்கப்பட்டுள்ளது.
அதன் விபரம்: பல்வேறு துறைகளைச் சேர்ந்த, 2,122 கார்ப்பரேட் நிறுவனங்களின் வேலைவாய்ப்பு குறித்து, அவற்றின் நிதியாண்டு அறிக்கைகளின் அடிப்படையில், ஆய்வு மேற்கொள்ளப்பட்டது. அதில், அந்நிறுவனங்கள், 2015 – 16ம் நிதியாண்டில், 1.08 லட்சம் வேலைவாய்ப்புகளை உருவாக்கியிருப்பது தெரியவந்துள்ளது. அனைத்து துறைகளிலும், பரவலான வேலைவாய்ப்பு வளர்ச்சியை தெளிவாக அறிய முடியாத போதிலும், சேவை சார்ந்த தொழில்கள், நுகர்வோர் சாதனங்கள் ஆகிய துறைகளில், வேலைவாய்ப்புகள், குறிப்பிடத்தக்க வளர்ச்சியை கண்டுள்ளன.
பணியாளர் நியமனத்தை பொறுத்தவரை, கடந்த நிதியாண்டில், அப்பிரிவு முந்தைய ஆண்டுகளை விட, அதிக வளர்ச்சி கண்டுள்ளது. இதற்கு முன், கார்ப்பரேட் நிறுவனங்களில், 2013 – 14 மற்றும் 2012 – 13ம் நிதியாண்டுகளில், முறையே, 46 ஆயிரம் மற்றும் 84 ஆயிரம் என்ற அளவிற்கே, வேலைவாய்ப்புகள் உருவாகியிருந்தன என்பது குறிப்பிடத்தக்கது. தற்போது, மத்திய அரசின் பணமதிப்பு நீக்க நடவடிக்கையால், அனைத்து துறைகளிலும் மந்தநிலை காணப்படுகிறது. இதன் காரணமாக, நடப்பு 2016 – 17ம் நிதியாண்டில், கார்ப்பரேட் நிறுவனங்களில் வேலைவாய்ப்புகள் உருவாவது குறையும் என, எதிர்பார்க்கப்படுகிறது.
கடந்த, 2013 – 14 மற்றும் 2014 – 15ம் நிதியாண்டுகளில், மொத்த உள்நாட்டு உற்பத்தியின், வளர்ச்சி விகிதத்திற்கு நிகராக, புதிய வேலைவாய்ப்புகள் உருவாகவில்லை; கடந்த நிதியாண்டில், இதுபோன்ற நிலை இல்லை. கடந்த நிதியாண்டில், 1,078 நிறுவனங்கள், தலா, 3,000 பேரையும், ௨௦ நிறுவனங்கள், அதற்கு மேற்பட்டோரையும் பணிக்கு அமர்த்தியுள்ளன. ஆறு நிறுவனங்களில், 10 ஆயிரத்திற்கும் அதிகமானோர் வேலைவாய்ப்பு பெற்றுள்ளனர்.
கடந்த சில ஆண்டுகளாக, முதலீடுகள் குறைந்ததால், பொறியியல் மற்றும் அடிப்படை கட்டமைப்பு துறைகளில் வேலைவாய்ப்புகள் குறைந்திருந்தன. கட்டுமான துறையில், அதிக திறன் தேவைப்படாத பணிகளில், வேலைவாய்ப்பு வெகுவாக குறைந்திருந்தது.இந்நிலையில், மத்திய அரசு, அடிப்படை கட்டமைப்பு திட்டங்களுக்கு முன்னுரிமை அளித்து வருவதால், வரும் ஆண்டுகளில், வேலைவாய்ப்பு மேலும் அதிகரிக்கும் என, எதிர்பார்க்கப்படுகிறது. இவ்வாறு அதில் கூறப்பட்டு உள்ளது.
மேலும் பொது செய்திகள்
|
Advertisement
|
Advertisement
|
Advertisement
|
|
|
|