பதிவு செய்த நாள்
11 ஜன2017
01:27
புதுடில்லி : ‘மத்திய அரசுக்கு, கொள்கை சீர்திருத்தங்களை நிறைவேற்றும் ஆற்றல் உள்ளதா என்ற மதிப்பீட்டின் அடிப்படையில், இந்தியாவிற்கான கடன் தகுதி குறியீடு நிர்ணயிக்கப்படும்’ என, அமெரிக்காவின் தர நிர்ணய நிறுவனமான, ‘மூடிஸ்’ தெரிவித்துள்ளது.
ஒரு நாட்டின் பொருளாதாரம், நிதி, வர்த்தகம், அரசியல் உள்ளிட்ட பல்வேறு அம்சங்களின் அடிப்படையில், அந்நாட்டிற்கான கடன் தகுதி குறியீட்டை, மூடிஸ் நிறுவனம் வழங்குகிறது. அதனடிப்படையில், அந்நாட்டில் முதலீடு செய்வதை, அன்னிய நிதி நிறுவனங்கள் தீர்மானிக்கின்றன. இதன்படி, முதலீடுகளுக்கு மிகச் சொற்ப அளவிற்கே இடர்பாடு உள்ளதை குறிக்க, ஏ.ஏ.ஏ., குறியீடு வழங்கப்படுகிறது. இடர்பாடு குறைவாக உள்ள நாடுகளுக்கு, ஏ.ஏ 1, ஏ.ஏ 2, ஏ.ஏ 3 குறியீடுகள் தரப்படுகின்றன. மிதமான இடர்பாடு வாய்ப்பை குறிக்க, பி.ஏ.ஏ 1, பி.ஏ.ஏ 2, பி.ஏ.ஏ 3 ஆகிய குறியீடுகள் வழங்கப்படுகின்றன.
மூடிஸ் நிறுவனம், இந்தியாவின் கடன் தகுதிக்கு, பி.ஏ.ஏ 3 குறியீட்டை வழங்கியுள்ளது. இதில் முன்னேற்றம் காண்பது, மத்திய அரசின் செயல்பாடுகளை பொருத்துள்ளது என, மூடிஸ் வெளியிட்டுள்ள அறிக்கையில் தெரிவிக்கப்பட்டு உள்ளது.
அதன் விபரம்:மத்திய அரசு, பல்வேறு சீர்திருத்தங்களை மேற்கொண்டு வருகிறது. குறிப்பாக, அன்னிய நேரடி முதலீட்டு விதிமுறைகளை தளர்த்தியது; ஜி.எஸ்.டி., மசோதாவை நிறைவேற்றியது; திவால் சட்டத்தில் திருத்தம் செய்தது உள்ளிட்ட ஏராளமான நடவடிக்கைகளை கூறலாம். பிரதமர் மோடி தலைமையிலான அரசின், இந்த செயல்பாடுகள், இந்தியாவில், தனியார் முதலீடுகளை ஊக்குவித்து, ஸ்திரமான பொருளாதார வளர்ச்சிக்கும், அரசின் கடன் சுமை குறையவும் வழிவகுக்கும்.
மத்திய அரசின் சீர்திருத்த கொள்கைகள், நாட்டின் நடுத்தர கால வளர்ச்சிக்கு துணை நிற்கும் என, எதிர்பார்க்கப்படுகிறது. அதன் அடிப்படையில், இந்தியாவுக்கு சாதகமான தரக் குறியீடு வழங்கப்பட்டு உள்ளது. எனினும், அறிவிக்கப்பட்ட சீர்திருத்த கொள்கைகளை செயல்பாட்டிற்கு கொண்டு வரும் ஆற்றல், அரசுக்கு உள்ளதா என்பதை யும், அத்திட்டங்களால் கிடைத்த பயன்கள் குறித்தும் ஆராய்ந்த பின்னே, கடன் தகுதி குறியீட்டில் மாற்றம் செய்வது குறித்து முடிவெடுக்க முடியும். இந்தாண்டு, ஆசிய பசிபிக் பிராந்திய நாடுகளின் கடன் தகுதி மதிப்பீடு, ஸ்திரமாக இருக்கும் என, மதிப்பிடப்பட்டு உள்ளது. இவ்வாறு அதில் கூறப்பட்டுள்ளது.
மேலும் பொது செய்திகள்
|
Advertisement
|
Advertisement
|
Advertisement
|
|
|
|