பதிவு செய்த நாள்
27 ஜன2017
04:27
புதுடில்லி : மத்திய நிதியமைச்சர் அருண் ஜெட்லி, 2017 – 18ம் நிதியாண்டிற்கான, மத்திய பட்ஜெட்டை, பிப்., 1ல், பார்லிமென்டில் தாக்கல் செய்ய உள்ளார்.
வழக்கமாக, பட்ஜெட் நாளன்று, அரசு அறிவிக்கும் கொள்கை திட்டங்களின் அடிப்படையில், பங்குகள் விலையில் அதிக ஏற்றம் அல்லது இறக்கமோ இருக்கும்; இது, பங்குச்சந்தையின் எழுச்சி அல்லது சரிவுக்கு வழிவகுக்கும். ‘வரும் நிதியாண்டுக்கான பட்ஜெட்டில், மத்திய அரசின் கொள்கைகளில் பெரிய மாற்றங்கள் ஏதும் இருக்காது என, எதிர்பார்க்கப்படுவதால், பங்குச்சந்தைகளின் ஏற்ற, இறக்கம் மிதமான அளவிற்கே இருக்கும்’ என, ‘மார்கன் ஸ்டான்லி’ நிறுவனத்தின் ஆய்வறிக்கையில் தெரிவிக்கப்பட்டு உள்ளது.
அதன் விபரம்:கச்சா எண்ணெய் விலை சரிவடைந்து வந்த போது, பெட்ரோலிய பொருட்கள் மீதான கலால் வரியை, மத்திய அரசு அவ்வப்போது உயர்த்தி வந்தது. இத்தகைய கூடுதல் வருவாயில், அனைவருக்கும் வங்கிச் சேவை திட்டத்தை, விரைவாக மேற்கொள்ள, மத்திய அரசு திட்டமிட்டிருந்தது. தற்போது, கச்சா எண்ணெய் விலை உயர்ந்து வருவதால், பெட்ரோலிய பொருட்களுக்கான கலால் வரியை, மத்திய அரசு உயர்த்தாது என, எதிர்பார்க்கப்படுகிறது. இவ்வகையில், வரி வருவாய் குறையும்பட்சத்தில், வங்கிச் சேவைகளை பரவலாக்கும் திட்டம், எதிர்பார்த்ததை விட, மந்தமாக வாய்ப்புள்ளது.
பண மதிப்பு நீக்க நடவடிக்கையை தொடர்ந்து, மின்னணு பணப் பரிவர்த்தனை திட்டங்கள், விழிப்புணர்வு பிரசாரங்கள் ஆகியவற்றுக்கான செலவினங்களையும், மத்திய அரசு குறைக்க விரும்பாது. இத்தகைய சூழலில், மிகப்பெரிய கொள்கை மாற்றங்களை, மத்திய அரசு மேற்கொள்ளாது என்றே தோன்றுகிறது. எனினும், பொதுத் துறை நிறுவனங்களின் பங்கு விற்பனை உள்ளிட்ட, இதர வகை வருவாயின் அடிப்படையில், நிதிப்பற்றாக்குறை இலக்கு குறைக்கப்படலாம்.
நடப்பு நிதியாண்டில், மொத்த உள்நாட்டு உற்பத்தியில், நாட்டின் நிதிப் பற்றாக்குறை இலக்கு, 3.5 சதவீதமாக நிர்ணயிக்கப்பட்டிருந்தது; இது, வரும் நிதியாண்டில், 3.3 சதவீதமாக குறைக்கப்படும் என, தெரிகிறது. திரும்பப் பெறப்பட்ட செல்லாத ரூபாய் நோட்டுகளுக்கு நிகராக, புதிய ரூபாய் நோட்டுகள் புழக்கத்தில் வரும் பட்சத்தில், மக்களின் பயன்பாடும், அரசு திட்டங்களுக்கான ஒதுக்கீடுகளும் அதிகரிக்கும். இதன் எதிரொலியாக, நாட்டின் பொருளாதாரம், மந்த நிலையில் இருந்து வளர்ச்சி பாதைக்கு திரும்பும். இவ்வாறு அதில் கூறப்பட்டு உள்ளது.
மேலும் பொது செய்திகள்
|
Advertisement
|
Advertisement
|
Advertisement
|
|
|
|