பதிவு செய்த நாள்
05 ஜூன்2017
07:42
தங்க சேமிப்பு பத்திரத்தில் முதலீடு செய்ய விரும்புகிறவர்கள், இவற்றை பங்குச்சந்தை பரிவர்த்தனை மூலம் வாங்கும் வாய்ப்பையும் பரிசீலிக்கலாம் என, வல்லுனர்கள் கருதுகின்றனர்.
கடந்த, 2015ம் ஆண்டு நவம்பரில் தங்க சேமிப்பு பத்திரங்கள் அறிமுகம் செய்யப்பட்டன. தங்கத்தை பெளதீக வடிவில் வாங்குவதற்கு பதிலாக பத்திர வடிவில் வாங்குவதை ஊக்குவிக்கும் வகையில் இந்த திட்டம் கொண்டு வரப்பட்டது. இது வரை எட்டு கட்டங்களாக பத்திரங்கள் வெளியிடப்பட்டுள்ளன. ஒரு கிராம் முதல் 500 கிராம் வரையான அளவில் பத்திரங்களை வாங்கலாம். இவற்றின் முதிர்வு காலம், 8 ஆண்டுகள். முதலீடு காலத்தில் இவற்றுக்கு வட்டி உண்டு. எனினும் ஒருவரின் வருமான வரி விகிதத்திற்கு ஏற்ப வட்டி வருமானத்திற்கு வரி பொருந்தும். இந்த பத்திரங்களை அவை வெளியிடப்படும் போது வங்கிகள், தபால் அலுவலகங்கள் மூலம் வாங்கலாம். அதன் பின் இவை பங்குச்சந்தையிலும் பட்டியலிடப்பட்டு பரிவர்த்தனை செய்யப்படுகின்றன.
இதுவரை வெளியிட்டு காலங்களில் பத்திரங்களை வாங்காமல் தவறவிட்டவர்கள், பங்குச்சந்தையில் பரிவர்த்தனை மூலமும் இவற்றை வாங்க வாய்ப்பிருக்கிறது. பெரும்பாலான பத்திரங்கள் அவற்றின் வெளியீட்டு விலையை விட குறைவாக பரிவர்த்தனை செய்யப்படுவதால், இது நல்ல வாய்ப்பு என்றும் வல்லுனர்கள் கூறுகின்றனர். உதாரணத்திற்கு, 5ம் கட்டமாக வெளியிட்டப்பட்ட தங்க பத்திரம், அண்மை நிலவரப்படி கிராமுக்கு, 2,828.6 ரூபாய் என பரிவர்த்தனை செய்யப்படுகிறது. வெளியீட்டு விலையை விட இது, 10.2 சதவீதம் குறைவாகும். இதுவரை பட்டியலிடப்பட்டுள்ள, 7 பத்திரங்களில் முதல் இரண்டு கிராம், 2,700 ரூபாய்க்கும் குறைவாக வெளியிடப்பட்ட முதல் இரண்டு கட்ட பத்திரங்கள் மட்டுமே அதிக விலையில் பரிவர்த்தனை செய்யப்படுகின்றன. மற்றவற்றை குறைந்த விலையில் வாங்கும் வாய்ப்புள்ளது.
எனவே, தங்க பத்திரங்களில் முதலீடு செய்ய விரும்புகிறவர்கள் பங்குச்சந்தை பரிவர்த்தனை மூலம் இவற்றை வாங்கலாம் என்கின்றனர். ஆனால், தங்க பத்திரங்கள் குறைவான எண்ணிக்கையிலேயே பரிவர்த்தனை செய்யப்படுவதால் இவற்றை உடனடியாக விற்பது கடினமாக இருக்கலாம் என்பதை மனதில் கொள்ள வேண்டும். முதிர்வு காலம் வரை வைத்திருக்கும் எண்ணம் இருந்தால், தற்போது உள்ள விலையில் இந்த பத்திரங்களை சந்தையில் வாங்குவது ஏற்றதாக இருக்கும் என கருதப்படுகிறது.
மேலும் வங்கி மற்றும் நிதி செய்திகள்
|
Advertisement
|
Advertisement
|
Advertisement
|
|
|
|