பதிவு செய்த நாள்
12 ஜூன்2017
04:17
இலக்குகளை அடையவும் சரி, செல்வத்தை பெருக்கி கொள்ளவும் சரி, சேமிப்பு தான் அடிப்படை. ஆனால், பலரும் போதிய அளவு சேமிப்பதில்லை. குறிப்பாக இளம் தலைமுறையினர் செலவுகளுக்கு கொடுக்கும் முக்கியத்துவத்தை, சேமிப்புக்கு அளிப்பதில்லை. சம்பாதிக்கத் துவங்கும் காலத்திலேயே சேமிக்கத் துவங்குவது, வருங்கால வாழ்க்கையை வளமாக்கும். அந்த வகையில், முதல் ஒரு லட்சத்தை சேமிப்பதற்கான வழிகள் இதோ:
பட்ஜெட் தேவைசேமிப்பு எண்ணம் வந்தவுடன், முதலில் செலவுகளை கண்காணிக்கத் துவங்க வேண்டும். தினசரி செலவு, வாடகை, போக்கு வரத்து செலவு உள்ளிட்டவற்றை குறித்து வைக்கும் போது எதில் எல்லாம் செலவு செய்கிறோம் என்பது புரியும். இதற்காக, ‘எக்செல் கோப்பை’ பயன்படுத்தலாம். நவீன செயலிகளும் இருக்கின்றன. மாத இறுதியில் கணக்கு பார்க்கும் போது, சேமிப்பதற்கு எந்த அளவு வாய்ப்பு உள்ளது எனத்தெரிய வரும்.
செலவை குறையுங்கள்செலவுகளை கண்காணித்து ஒழுங்குபடுத்திய உடன், வீண் செலவுகளை கண்டறிந்து குறைக்க வேண்டும். வெளியே சாப்பிடும் பழக்கம் இருந்தால், அலுவலகத்திற்கு சாப்பாடு கொண்டு செல்லலாம். எதில் எல்லாம் செலவுகளை குறைக்க முடியும் என பார்த்து, சிக்கனத்தை கடைப்பிடிக்கலாம். ஆரம்பத்தில் இந்த தொகை சொற்பமாக இருக்கலாம். ஆனால், போகப்போக கணிசமாக கையில் நிற்கும்.
உறுதி தேவைசெலவுகளை குறைப்பதால் மிஞ்சம் தொகை சேமிப்பாக மாறுவதை உறுதி செய்வது அவசியம். தானியங்கி சேமிப்பு வசதியை இதற்காக பயன்படுத்திக் கொள்ளலாம். மாதந்தோறும் குறிப்பிட்ட தொகை சம்பள கணக்கில் இருந்து தொடர் வைப்பு நிதிக்கு மாற்றப்படும் வகையில் ஏற்பாடு செய்யலாம். சேமிப்பு இலக்கிற்கு இது உதவும். ‘கிரெடிட் கார்டு’ பழக்கம் கட்டுப்படுத்த முடியாமல் இருந்தால், ‘டெபிட் கார்டு’க்கு மாறலாம்.
நண்பர்களிடம் சொல்லுங்கள்சேமிப்பு இலக்கை, உங்களுக்குள் வைத்துக் கொள்வதோடல்லாமல், மற்றவர்களுக்கு தெரிவிப்பது நல்லது. பெற்றோர், சகோதரர்கள், நெருங்கிய நண்பர்களிடம் சேமிப்பு இலக்கு பற்றி கூறுங்கள். அவர்களிடம் சொல்லி விட்டோமே எனும் எண்ணமே உறுதியுடன் சேமிக்க வைக்கும். அவர்களும் அடிக்கடி கேட்டு அழுத்தம் கொடுக்கலாம். தேவை எனில் அறையில் சேமிப்பு இலக்கை எழுதியும் வைக்கலாம்.
ஜாலியாக சேமிக்கவும்சேமிப்பது என்பது ஒரு சுமையாக இருக்க வேண்டியதில்லை. அதற்காக செலவு செய்யாமலே இருக்க வேண்டும் என்றும் அர்த்தம் இல்லை. எப்போதேனும் ஒரு முறை தாராளமாக செலவு செய்து கொள்ளலாம். அதே போல, சேமிப்பு இலக்கை கொஞ்சம் பொழுதுபோக்காகவும் மாற்றிக் கொள்ளலாம். உதாரணத்திற்கு, 50 ரூபாய் நோட்டு கையில் கிடைத்தால் செலவு செய்யாமல் இருப்பது எனும் வழக்கத்தை பின்பற்றலாம்.
மேலும் வங்கி மற்றும் நிதி செய்திகள்
|
Advertisement
|
Advertisement
|
Advertisement
|
|
|
|