பதிவு செய்த நாள்
01 ஜூலை2017
00:49
ஐயா, நான், என் ஒரு கிளையிலிருந்து, வேறொரு கிளைக்கு சரக்குகளை அனுப்பும் போது, ஜி.எஸ்.டி., வரி விதிக்கப்படுமா?– ராம் கோபால், நாகை
ஒரே மாநிலத்தில், கிளைகளுக்கு சரக்குகளை இடமாற்றம் செய்யும் போது, ஜி.எஸ்.டி., வரியில் விலக்கு அளிக்கப்படும். வேறொரு மாநிலத்தில் உள்ள கிளைக்கு, சரக்குகளை அனுப்பும் போது மட்டுமே, ஜி.எஸ்.டி., விதிக்கப்படும்.
தற்போது, மூலதன பொருட்கள் (கேப்பிட்டல் குட்ஸ்) வாங்கும் போது, 50 சதவீதம் உள்ளீட்டு வரி சலுகை முதல் ஆண்டிலும், மீதத்தை இரண்டாம் ஆண்டிலும் எடுத்துக் கொள்கிறோம். ஜி.எஸ்.டி., வரி அமைப்பில், மூலதன பொருட்களின் உள்ளீட்டு வரி சலுகையில் மாற்றம் இருக்கிறதா?– பார்கவி, சேலம்
ஆம். ஜி.எஸ்.டி., வரி அமைப்பில், மூலதன பொருட்களின் உள்ளீட்டு வரி சலுகையில், 100 சதவீதத்தை முதல் ஆண்டிலேயே பெற்று விடலாம்.
தற்போது நாங்கள், இ.ஓ.யூ., யூனிட்டிற்கு சப்ளை செய்கிறோம். ஜி.எஸ்.டி., வரியில், இத்தகைய சப்ளைக்கு ஏதாவது சலுகை உள்ளதா?– தீனதயாள், சென்னை
இல்லை. இ.ஓ.யூ., யூனிட்டிற்கு சப்ளை செய்தாலும், அது சாதாரண வழங்கல்களாக கருத்தில் கொண்டு வரி விதிக்க வேண்டும்.
சார், நான் பதிவு செய்யாத நபரிடமிருந்து வாங்கும் அனைத்து பொருட்களுக்கும், ‘ரிவெர்ஸ் சார்ஜ்’ உண்டா? இதில் ஏதாவது சலுகை உள்ளதா?– ரவி, ஈரோடு
ஜி.எஸ்.டி., பதிவு செய்த நபர், பதிவு செய்யாத நபரிடமிருந்து வாங்கும் அனைத்து பொருட்கள் மற்றும் சேவைக்கு, ‘ரிவெர்ஸ் சார்ஜ்’ உண்டு. ஆனால், ஒரு நாளைக்கு அத்தகைய மொத்த சப்ளையின் மதிப்பு, 5,000 ரூபாய்க்கு மிகாமல் இருந்தால், ‘ரிவெர்ஸ் சார்ஜ்’ முறையில் கூட வரி செலுத்த வேண்டாம்.
நாங்கள், ‘ஸ்பெஷல் எகனாமிக் ஸோன்’ என, சொல்லப்படக்கூடிய, எஸ்.இ.இசட்., யூனிட்டிற்கு சப்ளை செய்தால், எவ்வளவு சதவீதம் வரி வசூல் செய்ய வேண்டும்? விளக்கமாக கூறவும். – பிரகாஷ், ஓசூர்
சரக்குகள் அல்லது சேவைகளை, எஸ்.இ.இசட்., யூனிட்டிற்கு அல்லது எஸ்.இ.இசட்., டெவலப்பர்களுக்கு வழங்கினால், அது ஏற்றுமதியாக கருத்தில் கொண்டு, அதன் மீது, பூஜ்ஜிய சதவீத வரி விதிக்கப்படும்.
தற்போது சேவை வரியின் கீழ், 6 மாதங்களுக்கு ஒருமுறை ரிட்டர்ன் எஸ்.டி., 3 படிவத்தில் தாக்கல் செய்கிறோம். 2017 ஏப்., – ஜூன் வரையிலான ரிட்டர்னை, எவ்வாறு தாக்கல் செய்ய வேண்டும்?– களஞ்சியம், தேனி
நீங்கள், 2017 ஏப்., – ஜூன் வரையிலான, சேவை வரி ரிட்டர்னை, எஸ்.டி., 3 படிவத்தில், ஆக., 15க்குள் தாக்கல் செய்ய வேண்டும். தாக்கல் செய்த நாள் முதல், 45 நாட்களுக்குள், தாக்கல் செய்த படிவத்தை திருத்தம் செய்து கொள்ளவும் அவகாசம் அளித்துள்ளனர்.
நான், தற்போது, ‘வாட்’ பதிவு பெறவில்லை. ஆனால், ஜி.எஸ்.டி., பதிவு செய்தால், 2017 ஜூன், 30ல் உள்ள கையிருப்பு சரக்கிற்கு, ‘வாட்’ மற்றும் கலால் வரிச்சலுகை பெறலாம் என, கூறுகின்றனர். இது சாத்தியமா?– அசோகன், கடலுார்
ஆம். ஜி.எஸ்.டி., வரி சட்டத்தில் இந்த சாதகமான விதி உள்ளது. தற்போது, ‘வாட்’ பதிவு பெறாவிட்டால் கூட, ஜி.எஸ்.டி., பதிவு செய்து கொண்டால், 2017 ஜூன், 30ல் உள்ள கையிருப்பு சரக்கிற்கு, நீங்கள் சரக்கை வாங்கும் போது செலுத்திய, ‘வாட்’ மற்றும் கலால் வரியை, உள்ளீட்டு சலுகையாக பெறலாம்.
இந்த சலுகை பெற முக்கிய நிபந்தனைகள்: 2017 ஜூன், 30ல் உள்ள கையிருப்பு சரக்கு, வாங்கிய தேதி, 12 மாதங்களுக்குள் இருக்க வேண்டும். வரி செலுத்திய ஆவணம் இருக்க வேண்டும். (ஒருவேளை வரி செலுத்திய ஆவணம் இல்லையென்றாலும் கூட, 60 சதவீதம் வரை, உள்ளீட்டு வரி சலுகை பெற, சட்டத்தில் வழிவகை செய்யப்பட்டுள்ளது)
‘ரிவெர்ஸ் சார்ஜ்’ வரி விதிப்பு என்றால் என்ன?– அனிதா, சென்னை
ஜி.எஸ்.டி., பதிவு செய்யப்பட்ட நபர், பதிவு செய்யப்படாத நபரிடமிருந்து சரக்குகளையோ அல்லது சேவையையோ பெற்றால், சப்ளையை பெறுபவருக்கு வரி செலுத்த வேண்டிய கட்டாயம் ஏற்படுகிறது. இது, ‘ரிவெர்ஸ் சார்ஜ்’ வரி விதிப்பு என, கூறப்படுகிறது.
-ஜி.சேகர், எப்.சி.ஏ., ஆடிட்டர்
மேலும் பொது செய்திகள்
|
Advertisement
|
Advertisement
|
Advertisement
|
|
|
|