பதிவு செய்த நாள்
29 ஜூலை2017
06:32
புதுடில்லி: ‘இந்தியா, அடுத்த ஆண்டு, ‘4ஜி ஸ்மார்ட் போன்’ பயன்பாட்டில், அமெரிக்காவை விஞ்சி, இரண்டாவது இடத்திற்கு முன்னேறும்’ என, ஆய்வொன்றில் தெரிய வந்துள்ளது.
ஹாங்காங்கைச் சேர்ந்த, தொழிற்நுட்ப ஆய்வு நிறுவனமான, கவுன்டர் பாயின்ட், இந்திய தொலை தொடர்பு துறை குறித்து, ஆய்வு செய்து வெளியிட்டுள்ள அறிக்கை: ஸ்மார்ட் போனில், தகவல், படங்கள் உள்ளிட்டவற்றை, விரைவாக பரிமாறிக் கொள்ள, ‘4ஜி’ தொழிற்நுட்பம் உதவுகிறது. இந்த தொழிற்நுட்ப வசதி கொண்ட ஸ்மார்ட் போன் பயன்பாட்டில், சீனா முதலிடத்தில் உள்ளது. இந்நாட்டில், 74 கோடி ஸ்மார்ட் போன்கள் புழக்கத்தில் உள்ளன. அமெரிக்காவில், 22.50 கோடி ஸ்மார்ட் போன்கள் பயன்படுத்தப்படுகின்றன. இந்தியா, 15 கோடி ஸ்மார்ட் போன்களுடன் மூன்றாவது இடத்தில் உள்ளது.
இந்நிலையில், ரிலையன்ஸ் ஜியோ இன்போகாம் நிறுவனம், செப்டம்பரில், ‘4ஜி’ தொழிற்நுட்பத்தில் தயாரிக்கப்பட்ட, ஆர்ஜியோ போனை அறிமுகப்படுத்த உள்ளது. ‘இந்தியாவின் ஸ்மார்ட் போன்’ என்ற சிறப்புடன் வர உள்ள, இந்த சாதனத்தை, 1,500 ரூபாய் முன்பணம் செலுத்தி பெறலாம்; மூன்று ஆண்டுகளுக்கு பின், போனை ஒப்படைத்து முன்பணத்தை பெற்றுக் கொள்ளலாம் என, ஆர்ஜியோ அறிவித்துள்ளது. வாடிக்கையாளர்களுக்கு, மாதம், 153 ரூபாய் கட்டணத்தில், இலவச அழைப்புகள், தகவல்கள், படங்கள் ஆகியவற்றை பரிமாறிக் கொள்ளும் வசதிகள் வழங்கப்படும் எனவும் தெரிவித்துள்ளது.இதனால், வரும் மாதங்களில், நாடு முழுவதும், ஆர்ஜியோ போன் பயன்பாடு மளமளவென உயரும் என, எதிர்பார்க்கப்படுகிறது.
இதை சமாளிக்க, போட்டி நிறுவனமான ஏர்டெல், ‘4ஜி வோல்டி’ தொழிற்நுட்ப சேவையை, நாடு முழுவதும் விரிவுபடுத்த திட்டமிட்டு உள்ளது. இதர நிறுவனங்களும், ‘4ஜி’ சேவையில் ஆழமாக காலுான்ற முயற்சி மேற்கொண்டு உள்ளன. இதனால், ‘4ஜி’ ஸ்மார்ட் போன் விற்பனை, பல மடங்கு அதிகரிக்கும். இதில், ஆர்ஜியோ போன் பெரும்பான்மை பங்களிப்பை கொண்டிருக்கும்.இதன் காரணமாக, அடுத்த ஆண்டு, இந்தியாவில், ‘4ஜி’ தொழிற்நுட்பத்திலான ஸ்மார்ட் போன் பயன்பாடு, தற்போது உள்ளதை விட, 19 கோடி அதிகரித்து, 34 கோடியாக உயரும் என, எதிர்பார்க்கப்படுகிறது.
இதே காலத்தில், அமெரிக்காவின், ‘4ஜி’ ஸ்மார்ட் போன் பயன்பாடு, 2 கோடி அதிகரித்து, 24.50 கோடி என்ற அளவிற்கே உயரும். இதன் மூலம், அமெரிக்கா, மூன்றாவது இடத்திற்கு தள்ளப்படும். சீனாவில், ‘4ஜி’ ஸ்மார்ட் போன் புழக்கம், 4 கோடி அதிகரித்து, 78 கோடியாக உயரும். இவ்வாறு அதில் கூறப்பட்டுள்ளது.
சாம்சங் முதலிடம்:
ஸ்மார்ட் போன் விற்பனையில், சாம்சங், 24.1 சதவீத பங்களிப்புடன் முதலிடத்தில் உள்ளது. அடுத்த இடங்களில், ஜியோமி, 15.5 சதவீதம்; விவோ, 12.7; ஓப்போ, 9.6; லெனோவோ, 6.8 சதவீதத்துடன் உள்ளன. சாதாரண போன் மற்றும் ஸ்மார்ட் போன் சந்தையில், சாம்சங், 25.4 சதவீதத்துடன் முதலிடத்தில் உள்ளது. அடுத்த இடங்களில், ஐடெல், 10.2 சதவீதம்; ஜியோமி, 7.2; மைக்ரோமேக்ஸ், 7.1 மற்றும் விவோ, 5.9 சதவீதத்துடன் உள்ளன.
மேலும் பொது செய்திகள்
|
Advertisement
|
Advertisement
|
Advertisement
|
|
|
|