பதிவு செய்த நாள்
09 ஆக2017
08:17
புதுடில்லி : மருத்துவக் காப்பீடு, மொபைல் போன் சேவை ஆகியவற்றை தொடர்ந்து, ஒரு நிறுவனத்தின், செட் – டாப் பாக்சை மாற்றாமல், அதே சாதனம் மூலம், வேறு நிறுவனத்தின், ‘டிவி’ சேனல்களை காணும், ‘செட் – டாப் பாக்ஸ் போர்ட்டபிலிட்டி’ வசதி, அடுத்த ஆண்டு அறிமுகமாக உள்ளது.
தற்போது, ஒரு நிறுவனத்தின் மொபைல் போன் சேவையில் அதிருப்தி ஏற்பட்டால், வாடிக்கையாளர், அதே எண் மூலம், வேறொரு நிறுவனத்தின் மொபைல் போன் சேவைக்கு மாறும் வசதி உள்ளது. இதை, ‘மொபைல் நம்பர் போர்ட்டபிலிட்டி’ என்கின்றனர். இது போன்ற வசதி, மருத்துவக் காப்பீட்டு துறையிலும் உள்ளது. ஒரு மருத்துவக் காப்பீட்டு நிறுவனத்தின் பாலிசிதாரர், காப்பீட்டு காலத்தின் இடையிலேயே, வேறொரு காப்பீட்டு நிறுவனத்தின் சேவைக்கு மாறலாம். பழைய நிறுவனத்தில் அளிக்கப்பட்ட நோய் விபரங்கள், பாலிசி கால, ‘போனஸ்’ சலுகைகள் ஆகியவை, புதிய நிறுவனத்திலும் தொடரும்.
இந்நிலையில், ‘டிவி’ சேனல் ஒளிபரப்பிற்கான, செட் – டாப் பாக்சை மாற்றாமல், விரும்பிய, டி.டி.எச்., நிறுவனத்தையோ அல்லது கேபிள் ஆப்பரேட்டரையோ மாற்றிக் கொள்ளும் வசதியை அறிமுகப்படுத்த, தொலை தொடர்பு ஒழுங்குமுறை ஆணையமான, ‘டிராய்’ திட்டமிட்டு உள்ளது. இதன் மூலம், ஒரு நிறுவனத்தின், செட் – டாப் பாக்சை மாற்றாமலே, வேறொரு நிறுவனத்தின் வாடிக்கையாளராக மாறலாம்.
இது குறித்து, ‘டிராய்’ தலைவர், ஆர்.எஸ்.ஷர்மா கூறியதாவது: டி.டி.எச்., நிறுவனங்கள் மற்றும் கேபிள் ஆப்பரேட்டர்கள் மூலம், செட் – டாப் பாக்ஸ் வாயிலாக, ‘டிவி’ நிகழ்ச்சிகளை காண்போர், அடுத்த ஆண்டு முதல், ஒரே செட் – டாப் பாக்ஸ் மூலம், வேறொரு, டி.டி.எச்., நிறுவனம் அல்லது கேபிள் ஆப்பரேட்டர்களின், ‘டிவி’ சேனல்களின் சேவையை பெறலாம்.
தற்போது, ஒரு நிறுவனத்தின் சேவையில் இருந்து, வேறொரு நிறுவனத்தின் சேவைக்கு மாறும் போது, மீண்டும், செட் – டாப் பாக்ஸ் வாங்கும் நிலை உள்ளது. இதற்கு, அடுத்த ஆண்டு அறிமுகமாகும், ‘செட் – டாப் பாக்ஸ் போர்ட்டபிலிட்டி’ வசதி முடிவு கட்டும். இதற்கான தொழில்நுட்பத்துடன், மாதிரி கட்டமைப்பு சாதனத்தை, பெங்களூரில் உள்ள, சி.டி.ஓ.டி., நிறுவனம் உருவாக்கி உள்ளது.
அதை பரிசோதித்து பார்த்ததில், முழு திருப்தி ஏற்பட்டுள்ளது. இந்த, செட் – டாப் பாக்சை, வர்த்தக ரீதியில் அறிமுகப்படுத்துவது தொடர்பாக, அனைத்து, டி.டி.எச்., நிறுவனங்கள், கேபிள் ஆப்பரேட்டர்கள் ஆகியோருடன், பேச்சு நடத்த உள்ளோம். இவ்வாறு அவர் கூறினார்.
செலவில்லாத தேர்வு:
தற்போது, ஒரு, ‘செட் – டாப் பாக்ஸ்’ விலை, 1,700 – 2,200 ரூபாய் வரை உள்ளது. இதனால், பலர், மீண்டும் ஒரு, செட் – டாப் பாக்ஸ் வாங்க விரும்பாமல், அதிருப்தியுடன், பழைய நிறுவனத்தின் சேவையை தொடருகின்றனர். புதிய செட் – டாப் பாக்ஸ் இதே விலையில் அறிமுகமானாலும், அதில், வேறு நிறுவனத்திற்கு மாறக் கூடிய வசதி இருக்கும் என்பதால், மக்கள் விருப்பமான, டி.டி.எச்., நிறுவனங்கள் அல்லது கேபிள் ஆப்பரேட்டர்களை, கூடுதல் செலவின்றி தேர்வு செய்து கொள்ளலாம்.
-ஆர்.எஸ்.ஷர்மா, தலைவர், ‘டிராய்’
மேலும் பொது செய்திகள்
|
Advertisement
|
Advertisement
|
Advertisement
|
|
|
|