பதிவு செய்த நாள்
21 ஆக2017
05:47
சொந்த வீடு கனவு போலவே, சொந்தமாக கார் வாங்க வேண்டும் என்பதும் நடுத்தர வர்க்கத்தின் கனவாக இருக்கிறது. வீட்டுக்கடன் போலவே, வாகனக்கடன் மூலம் சொந்த கார் கனவையும் நிறைவேற்றிக்கொள்ளும் வாய்ப்பு அதிகமாக இருக்கிறது. எனினும், தற்போது கால் டாக்சி நிறுவனங்களின் சேவை பரவலாகி வரும் நிலையில், சொந்த காரை விட வாடகை காரை பயன்படுத்துவது சிறந்ததா எனும் கேள்வி எழுந்துள்ளது.
செலவு ஒப்பீடு:
போக்குவரத்து தேவைக்கு சொந்த கார் பயன்பாடு சிறந்ததா... அல்லது வாடகை கார் சிறந்ததா என்பதை தீர்மானிக்க இரண்டுக்குமான செலவை ஒப்பிட்டு பார்க்க வேண்டும். சொந்த கார் எனில், வாகனக் கடனுக்கான தவணை, பெட்ரோல் செலவு, பராமரிப்பு செலவு ஆகியவற்றை கணக்கில் எடுத்துக்கொள்ள வேண்டும். கால் டாக்சி உள்ளிட்ட வாடகை கார் எனில் வாடகை கட்டணம் மற்றும் பயன்பாட்டை கருத்தில் கொள்ள வேண்டும்.
15,000 கி.மீ.,:
சொந்த கார் – வாடகை கார் விவாதம் தொடர்ந்து நடைபெற்று வந்தாலும், இதற்கான பதில் மாறுபடக்கூடியதாகவே இருக்கிறது. இந்நிலையில், அண்மையில், ‘கிரிசில் ரிசர்ச்’ அமைப்பு நடத்திய ஆய்வு, இந்திய சூழலில் சொந்த கார் வைத்திருப்போர், ஆண்டுக்கு, 15 ஆயிரம் கி.மீ.,க்கு மேல் பயன்படுத்தினால் தான் அது லாபகரமாக இருக்கும் என தெரிவித்துள்ளது. கி.மீ.,க்கு, 22 ரூபாய் பயன்பாட்டு செலவு எனும் அடிப்படையில் இது கணக்கிடப்பட்டுள்ளது.
12,000 கி.மீ.,:
பொதுவாக இந்திய கார்கள் ஆண்டுக்கு சராசரியாக, 12 ஆயிரம் கி.மீ., பயணிப்பதாக கருதப்படுகிறது. இதன் அடிப்படையில் பார்த்தால், சராசரிக்கும் குறைவான பயன்பாடு கொண்டவர்களுக்கு, சொந்த கார் செலவு மிக்கதாக அமையலாம். இவர்கள் வாடகை காரை பயன்படுத்துவதே சிக்கனமானதாக இருக்கும். வாடகை கார் எனும் போது பராமரிப்பு பிரச்னைகளும் இல்லாமல் இருக்கிறது.
முதல் கார் :
சொந்த கார் – வாடகை கார் ஒப்பீட்டில் செலவு ஒரு முக்கிய விஷயமாக அமைந்தாலும், இந்தியர்களில் பெரும்பாலானோர் சொந்த காரை விரும்பி நாடுவர் என கருதப்படுகிறது. கார், அந்தஸ்தின் அடையாளமாக இருப்பதால், முதல் முறை கார் வாங்க இருப்பவர்கள், செலவை ஒரு முக்கிய அம்சமாக கருதாமல், நிதி நிலை கைகொடுக்கும் போது சொந்த காரை வாங்கவே விரும்புவர்.
வாடகை கார் ஆதரவு:
ஓலா, உபெர் உள்ளிட்ட கால்டாக்சி நிறுவனங்கள் அதிக அளவில் கார்களை வாங்கி வருவதால், கார் விற்பனையில் வாடகை கார்களின் பங்கு அதிகரித்துள்ளது. தற்போதைய வேகத்தில், 2020ம் ஆண்டு வாக்கில், கார் விற்பனையில் வாடகை காரின் பங்கு, 20 சதவீதமாகவும், 2030ல், 30 சதவீதமாகவும் இருக்கும் என கருதப்படுகிறது. வாடகை கார் எனில், அவை முழு ஆயுளுக்கு பயன்படுத்தப்படும் வாய்ப்பும் உள்ளது.
மேலும் வங்கி மற்றும் நிதி செய்திகள்
|
Advertisement
|
Advertisement
|
Advertisement
|
|
|
|