பதிவு செய்த நாள்
22 ஆக2017
06:25
புதுடில்லி : ‘அடிப்படை கட்டமைப்பு வசதிக்கான, 322 திட்டங் களின் தாமதத்தால், அவற்றை முடிக்க நிர்ணயித்த தொகையை விட, கூடுதலாக, 1.71 லட்சம் கோடி ரூபாய் செலவாகும்’ என, மத்திய புள்ளியியல் மற்றும் திட்ட செயலாக்க அமைச்சகம் தெரிவித்து உள்ளது.
குடிநீர், மின்சாரம், சாலை, துறைமுகம், ரயில், விமான போக்குவரத்து உட்பட, பல்வேறு துறைகளில் நடைபெற்று வரும், அடிப்படை கட்டமைப்பு வசதி திட்டங்கள் குறித்த அறிக்கையை, அமைச்சகம் வெளியிட்டு உள்ளது.
அதன் விபரம்: இந்தாண்டு, மார்ச், 31 நிலவரப்படி, அடிப்படை கட்டமைப்பு வசதிக்கான, 1,231 திட்டங்கள் செயல்பாட்டில் உள்ளன. இவை, தலா, 150 கோடி ரூபாய் மற்றும் அதற்கு மேற்பட்ட மதிப்பிலான திட்டங்கள் ஆகும். இவற்றின் மொத்த மதிப்பு, 15.59 லட்சம் கோடி ரூபாய். இத்திட்டங்களில், ஒன்பது வகைப் பணிகள், நிர்ணயிக்கப்பட்ட காலத்திற்கு முன்பாகவே முடிக்கப்பட்டு வருகின்றன. ஏற்கனவே நிர்ணயித்த இலக்கின்படி, 324 திட்டப் பணிகள் நடக்கின்றன.
ஒப்பந்ததாரர்கள் மேற்கொண்டு வரும், 327 பணிகளில் தாமதம் ஏற்பட்டுள்ளது. குறித்த காலத்தில் முடிக்கப்படாததால், 322 திட்டங்களுக்கான செலவில், 1.71 லட்சம் கோடி ரூபாய் அதிகரித்துள்ளது. திட்டங்களை முடிப்பதற்கான விதிமுறைகள், தற்போது மறுவரையறை செய்யப்பட்டு உள்ளன. இதன்படி கணக்கிட்டால், தாமதமான திட்டங்களின் எண்ணிக்கை, 253 ஆக குறையும்.
தாமதமான, 327 திட்டங்களில், 63 திட்டங்கள், 1 – 12 மாதங்கள் வரை தாமதமாகி உள்ளன. இவை தவிர்த்து, 63 திட்டங்கள், 13 – 24 மாதங்கள் தாமதமாக நடக்கின்றன. மேலும், 119 திட்டங்களில், 25 – 60 மாதங்கள் தாமதம் ஏற்பட்டுள்ளது. ஆறு மாதங்களுக்கும் மேலாக, 311 திட்டங்கள் தாமதமாக நடைபெறுகின்றன. 231 திட்டங்களுக்கான செலவு, தலா, 100 கோடி ரூபாய்க்கும் அதிகமாக உயர்ந்துள்ளது.
இந்தாண்டு மார்ச் நிலவரப்படி, மதிப்பீட்டிற்கு எடுத்துக் கொள்ளப்பட்ட திட்டங்களில், 7.46 லட்சம் கோடி ரூபாய் செலவிடப்பட்டு உள்ளது; இது, இத்திட்டங்களின் மொத்த மதிப்பில், 43 சதவீதம் ஆகும். கால தாமதம் உள்ளிட்ட பல்வேறு காரணங்களால், மதிப்பீட்டிற்கு எடுத்துக் கொள்ளப்பட்ட, 1,231 திட்டங்களின் மொத்த செலவினம், 17.31 லட்சம் கோடி ரூபாயாக உயர்ந்துள்ளது. இது, நிர்ணயிக்கப்பட்ட திட்டச் செலவை விட, 1.71 லட்சம் கோடி ரூபாய் அதிகமாகும். இவ்வாறு அதில் கூறப்பட்டுள்ளது.
நிலம் கையகப்படுத்துவதில் ஏற்படும் சிக்கல், சுற்றுச்சூழல் துறை எதிர்ப்பு போன்ற காரணங்களால், பல திட்டங்கள் முடிவடைய தாமதமாகின்றன.
மொத்த மதிப்பு:
இந்தாண்டு, ஆக., 15 நிலவரப்படி, மாநிலங்கள் மற்றும் யூனியன் பிரதேசங்களில், அரசு மற்றும் தனியார் துறையில், 52 லட்சம் கோடி ரூபாய் மதிப்பிலான, 8,882 அடிப்படை கட்டமைப்பு வசதி திட்டங்கள் மேற்கொள்ளப்பட்டு வருகின்றன.
மேலும் பொது செய்திகள்
|
Advertisement
|
Advertisement
|
Advertisement
|
|
|
|