பதிவு செய்த நாள்
09 அக்2017
00:12
நுகர்வோராக நம்மை நாமே புரிந்து கொள்ள வழிகாட்டுகிறது, ‘பேகோ அண்டர்ஹில்’ எழுதிய, ‘ஒய் வி பை’ புத்தகம்: நுகர்வோர் எவ்வளவு நேரம் கடையில் செலவிடுகின்றனரோ, அதற்கேற்ப அதிக பொருட்களை வாங்குவர். நவீன மால்கள் இதற்கு ஏற்பவே வடிவமைக்கப்பட்டுள்ளன.
இசை கேட்டபடி மெதுவாக நடந்து சென்று, பொருட்களை பார்த்தபடி, ஊழியர்களுடன் உரையாடி, நுகர்வோர் ஊக்குவிக்கப்படுகின்றனர். நுகர்வோர் புதிய சூழலுக்கு பழக அவகாசம் தேவை, குறைந்தது, 5 நிமிடமாவது வேண்டும். மால்களின் வாயில் அருகேயே, முக்கிய பொருட்களை வைத்தால் வாங்க மாட்டார்கள். உதவி தேவையா என ஊழியர்கள் கேட்டாலும், நிராகரிப்பர். எடுத்த எடுப்பில் விளம்பரம் செய்வது பலன் அளிக்காது. தள்ளுபடி பொருட்களை குவித்து, அவர்களை மெதுவாக கடைக்குள் வலம் வர வைக்க வேண்டும்.
பெரும்பாலும் நுகர்வோர் வலப்பக்கமாக சென்று அங்குள்ள பொருட்களை அதிகம் பார்வையிடுகின்றனர். குறைந்த விலை கொண்ட பொருட்கள், பார்வையில் படும் வகையில் வைக்கப்படுகின்றன. நுகர்வோர் அமர வசதியான இடம் இருந்தால் அவர்களிடம் எளிதாக விளம்பர தகவல்களை திணிக்கலாம். ஷாப்பிங் செய்வதில் ஆண்களுக்கும் பெண்களுக்கும் வேறுபாடு இருக்கிறது. பெண்கள் பேக்கிங் மற்றும் தோற்றத்தில் கவனம் செலுத்தி, அதிக நேரம் ஷாப்பிங் செய்கின்றனர். ஊழியர்களிடம் அதிக கேள்விகள் கேட்கின்றனர். ஆண்கள் குறைவான நேரம் ஷாப்பிங் செய்கின்றனர். ஆண்கள் தங்களுக்கு பொருந்தும் ஆடைகளை வாங்குகின்றனர்.
நுகர்வோர் பொருட்களை வாங்க முக்கிய காரணம், அவற்றை தொட்டுப்பார்க்க வாய்ப்பு கிடைப்பதாகும். நாம் வாழும் சமூகத்தில், சுதந்திரமாக பொருட்களை தொட்டுப்பார்த்து உணரும் வாய்ப்பு, ஷாப்பிங்கில் கிடைக்கிறது. திட்டமிடாமல் வாங்கப்படும் பொருட்கள் எல்லாம், தொடுதல், உணர்தல், கேட்டல் மூலம் நிகழ்கிறது. ஷாப்பிங் செய்யும் போது பொருட்களை வாங்குவதில் கண்ணாடியை பார்ப்பது முக்கிய அங்கம் வகிக்கிறது. ஷாப்பிங் செய்வது என்பது கண்டறிதலின் உணர்வை அளிக்கிறது. ஒரு மாலுக்குள் சென்று சுற்றுப்பார்த்து பலவற்றை தேடி, நமக்கு தேவையானதை தேர்வு செய்வது, வேட்டையாடியதற்கு நிகரான திருப்தியை அளிக்கிறது. ஷாப்பிங் என்பதே ஒரு பயண அனுபவம் போல் அமைகிறது.
நுகர்வோர் தாங்கள் அங்கீகரிக்கப்படுவதை விரும்புகின்றனர். தாங்கள் வரவேற்கப்படுவதாக உணரும் இடங்களிலேயே பொருட்களை வாங்க விரும்புகின்றனர். எனவே ஊழியரின் உரையாடல் அல்லது பரிந்துரை பொருட்களை வாங்கத் துாண்டும் கூடுதல் அம்சமாக இருக்கும்.
மேலும் வங்கி மற்றும் நிதி செய்திகள்
|
Advertisement
|
Advertisement
|
Advertisement
|
|
|
|