பதிவு செய்த நாள்
11 டிச2017
00:35
லிக்விட் பண்ட்’கள் குறைந்த ரிஸ்க் கொண்ட கடன்சார் மற்றும் இதர நிதி சாதனங்களில் முதலீடு செய்வதால், வைப்பு நிதிக்கான பொருத்தமான மாற்றாக கருதப்படுகின்றன.
சராசரி முதலீட்டாளர்களைப் பொறுத்தவரை, வைப்பு நிதி முதலீடு மிகவும் அவசியமானது தான். பாதுகாப்பானதாகவும், நிச்சயமான பலன் அளிக்க கூடியதாகவும் இருப்பது, வைப்பு நிதிக்கான சாதகமான அம்சங்களாக அமைகின்றன. ஓய்வூதியதாரர்களுக்கு மாத வருமானத்திற்கான சாதனமாகவும் இது அமைகிறது.
இதே போலவே, லிக்விட் பண்ட் முதலீடும் ஏற்றதாக நிதி வல்லுனர்களால் முன்வைக்கப்படுகிறது. லிக்விட் பண்ட் என்பவை, ‘மியூச்சுவல் பண்ட்’ திட்டங்களில் ஒரு வகையாகும். இந்த வகை நிதிகள், 90 நாள் முதிர்வு கொண்ட பத்திரங்கள் மற்றும் இதர கடன்சார் நிதி சாதனங்களில் முதலீடு செய்கின்றன. குறுகிய கால முதலீட்டிற்கு இவை மிகவும் ஏற்றதாக கருதப்படுகிறது.
ரிஸ்க் குறைவு
மேலும், இவை அளிக்கும் பலனும் வைப்பு நிதி பலனை விட மேம்பட்டதாக இருப்பதாக கருதப்படுகிறது. அதே நேரத்தில், தேவை எனில் உடனடியாக பணத்தை விலக்கிக் கொள்ளும் வாய்ப்பும் இருக்கிறது.எனினும், புதிய முதலீட்டாளர்கள் லிக்விட் பண்ட் முதலீட்டிற்கு மாறுவதற்கு முன், அதன் முக்கிய அம்சங்களை புரிந்து கொள்வது அவசியம்.
லிக்விட் பண்ட்கள் மியூச்சுவல் பண்ட் ரகத்தைச் சேர்ந்தவை என்றாலும், இவை அடிப்படை
யில் குறைந்த ரிஸ்க் கொண்ட பத்திரங்கள் போன்றவற்றில் முதலீடு செய்வதால், வைப்பு நிதிக்கு பொருத்தமான மாற்றாக கருதப்படுகின்றன. இந்த முதலீடுகளில் இருந்து வரும் வட்டி வருமானம் சேர்ந்து முதலீட்டின் பலனாக அமைகிறது. மேலும், முதலீட்டின் சந்தை போக்கிற்கு ஏற்ப பலன்கள், என்.ஏ.வி., எனப்படும் யூனிட்களுக்கான நெட் அசெட் வேல்யூவாக முதலீட்டாளர்களுக்கு மாற்றி அளிக்கப்படுகிறது.
வட்டி ஏற்ற, இறக்கம்
மற்ற நிதிகள் போலவே சந்தை சார்ந்த நிதி சாதங்களில் முதலீடு செய்தாலும், இவற்றுக்கான ஏற்ற, இறக்கம் பொதுவாக குறைவானதாக இருக்கும் என கருதப்படுகிறது. தொடர்ந்து சேரும் வட்டி, தினசரி என்.ஏ.வி., மதிப்புடன் சேர்வது, இவற்றை சிறந்த சேமிப்பிற்கான வழியாக கருதப்படுகிறது. எனினும், வைப்பு நிதி போல இவற்றின் பலன் நிச்சயிக்கப்பட்டவை அல்ல.
மியூச்சுவல் பண்ட் திட்டங்கள் அனைத்தும் சந்தை போக்கு சார்ந்தவை என்பதால், இவற்றின் பலன் குறித்து, நிறுவனங்கள் உறுதி அளிப்பதில்லை; இதற்கான அனுமதியும் இல்லை.
வைப்பு நிதி முதலீட்டிற்கான வட்டி விகிதம், சந்தையின் வட்டி விகித போக்கிற்கு ஏற்ப அமையும். அது போலவே, லிக்விட் பண்ட் முதலீடுகளின் வட்டி வருமான பலனும்,
சந்தையின் வட்டி விகித போக்கிற்கு ஏற்பவே அமையும்.
வட்டி விகிதம் ரெப்போ விகிதத்திற்கு ஏற்ப அமைவதால், வைப்பு நிதிக்கான வட்டி, 9 சதவீதத்தில் இருந்து, 6 சதவீதத்தை நோக்கி வந்திருக்கிறது. லிக்விட் பண்ட் திட்டங்களும் இதே போன்ற ஏற்ற, இறக்கத்திற்கு உள்ளாகும் வாய்ப்புள்ளன என்றாலும், இவற்றின் பலன், 9 முதல், 10 சதவீதத்தில் இருந்து, 7 சதவீதம் நோக்கி வந்துள்ளன.
சேரும் வட்டி வருமானம் தவிர, சந்தையின் ஏற்றத்தால் கிடைக்கும் பலனும் சேர்வது, லிக்விட் பண்ட்கள் அளிக்கும் சாதகமாகும். எனினும், இது நிதியை நிர்வகிக்கும் திறன் சார்ந்தது என்பதையும் கவனிக்க வேண்டும். முதலீட்டின் மீதான பலனை அதிகமாக்கும் உத்தி மற்றும் கடன்சார் முதலீட்டின் தரத்தை உறுதி செய்வது ஆகியவற்றில், நிதியை நிர்வகிக்கும் மேலாளர் கவனம் செலுத்துவார்.
லிக்விட் பண்ட்கள் அளிக்கக் கூடிய அதிக பலன் தவிர அவற்றின் சாதகமான அம்சங்களாக
அமைவது, எளிதாக பணத்தை விலக்கும் தன்மை மற்றும் வரி அம்சம் ஆகியவை ஆகும்.
லிக்விட் பண்ட் திட்டங்களில் கோரிக்கை வைத்த ஒரு அலுவல் நாளில், பணத்தை வங்கி கணக்கில் பெற்றுக் கொள்ளலாம். உடனடி பணம் பெறும் வசதியை அளிக்கும் நிதிகள் மூலம், 50 ஆயிரம் வரை பெறலாம். இவற்றுக்கு டிவிடன்ட் வினியோக வரி உண்டு.
இந்த அம்சங்களை பரிசீலித்து, ஒருவர் தன் நிதி சூழல், இலக்குகளுக்கு ஏற்ப லிக்விட் பண்ட் முதலீட்டை தேர்வு செய்யலாம்.
குறுகிய கால முதலீடு
* மியூச்சுவல் பண்ட் திட்ட வகைகளில் ஒன்றாக லிக்விட் பண்ட் திட்டங்கள் விளங்குகின்றன.
* இந்த வகை நிதிகள், 90 நாள் முதிர்வு கொண்ட பத்திரங்கள், நிதி சாதனங்களில்
முதலீடு செய்கின்றன.
* கூடுதல் பலன் அளிக்கக் கூடியதோடு, தேவைக்கேற்ப விலக்கிக் கொள்ளும் வாய்ப்பும் உள்ளது.
மேலும் பங்கு வர்த்தகம் செய்திகள்
|
Advertisement
|
Advertisement
|
Advertisement
|
|
|
|