பதிவு செய்த நாள்
11 டிச2017
00:41
போதுமான ஆயுள் காப்பீடு பெற்றிருப்பது நிதி பாதுகாப்பிற்கு மிகவும் முக்கியமானது. ஆனால், நடைமுறையில் ஆயுள் காப்பீடு, பாதுகாப்பு தவிர பிற அம்சங்களுக்காகவும் பெறப்படுகிறது. குழந்தைகள் கல்வி, வரிச்சலுகை, திருமண திட்டமிடல் என பலவிதமான
நோக்கங்களுடனும் பாலிசிகளை பெறும் வழக்கம் இருக்கிறது. எனவே,
காப்பீடு சரியான பலனை அளிக்க, பொதுவாக பலரும் செய்யக்கூடிய
வழக்கமான தவறுகளை செய்யாமல் இருப்பது நல்லது.
நோக்கம் என்ன?
எதற்காக
காப்பீடு பெறுகிறோம் என்பது தெரியாமல் பாலிசி வாங்குவதை விட பெரிய
தவறு வேறு இருக்க முடியாது. எனவே, முதலில் காப்பீட்டிற்கான நோக்கம்
குறித்த தெளிவு வேண்டும். காப்பீட்டின் முதன்மை நோக்கம்,
குடும்பத்திற்கான பாதுகாப்பாகும்; வரிச்சலுகை அளிப்பது அல்ல. அது ஒரு கூடுதல் பலன் அவ்வளவே. இதை மனதில் கொண்டு, தேவையான
அளவு காப்பீடு பெற்றிருக்க வேண்டும்.
எவ்வளவு தேவை?
காப்பீடு பெறும் போது ஒருவர் தனக்கு எந்த அளவு பாதுகாப்பு தேவை என்பதில் கவனம் செலுத்த வேண்டும். குறிப்பிட்ட கட்டத்தில் எவ்வளவு தேவை என கணக்கிடாமல், அதிகபட்சமான சம் அஷ்யூர்டு கொண்ட பாலிசியை மட்டும் பெறுவதால் பலன் இல்லை. ஆண்டு செலவீனத்தை கணக்கிட்டு பார்த்து பாலிசி அளவை தீர்மானிப்பதன் மூலம், தேவையில்லாமல் அதிக பிரீமியம் செலுத்துவதை தவிர்க்கலாம்.
எந்த பாலிசி?
ஒருவர் தனக்கு எந்த வகை பாலிசி தேவை என்பதிலும் கவனமாக இருக்க வேண்டும். டெர்ம் பாலிசியே போதுமா? யூலிப் பாலிசி தேவையா போன்ற விஷயங்களை ஆராய வேண்டும். யூலிப்கள் காப்பீடு மற்றும் முதலீடு கலந்தவை. டெர்ம் பாலிசிகள் பாதுகாப்பை மட்டும்
அளிப்பவை. என்டோமென்ட் பாலிசிகள் முதிர்வு கால பலன் கொண்டிருந்தாலும், அவற்றின் பலன் குறைவு என கருதப்படுகிறது.
பிரீமியம் என்ன?
ஒவ்வொரு பாலிசிக்கும் குறிப்பிட்ட பிரீமியம் தொகையை செலுத்த வேண்டும். ஒவ்வொரு
பாலிசியும் அதன் தன்மைக்கேற்ப மாறுபட்ட பிரீமியம் செலுத்த வேண்டிய காலத்தை கொண்டுள்ளன. இதை அறிந்திருப்பதன் மூலம் காப்பீட்டிற்காக ஒருவர் செலுத்தக்கூடிய மொத்த தொகையை அறிந்து கொள்ளலாம். இதன் மூலம் காப்பீடு தரக்கூடிய பலன்களை சீர் துாக்கி பார்க்க முடியும்.
கிளைம் செய்யும் வழி
காப்பீடு பாலிசிகளை பல நிறுவனங்கள் வழங்குகின்றன. குறிப்பிட்ட நிறுவனத்தை தேர்வு
செய்யும் முன், அந்நிறுவனத்தின் கிளைம் விகித செயல்பாடு எப்படி இருக்கிறது என்பதை
பார்க்க வேண்டும். காப்பீடு தொடர்பான கிளைம்கள் நிறைவேற்றப்படும் விதமே இவ்வாறு
குறிப்பிடப்படுகிறது. கிளைம் விகிதம் கொண்டு நிறுவனத்தின் நம்பகத்தன்மையை தீர்மானிக்கலாம்.
மேலும் வங்கி மற்றும் நிதி செய்திகள்
|
Advertisement
|
Advertisement
|
Advertisement
|
|
|
|