பதிவு செய்த நாள்
29 ஜூலை2018
05:27
நொய்டா: தகவல் தொழில்நுட்பத் துறையைச் சேர்ந்த, எச்.சி.எல்., டெக்னாலஜிஸ் நிறுவனத்தின் நிகர லாபம், நடப்பு, 2018- – 19ம் நிதியாண்டின், ஏப்., – ஜூன் காலாண்டில், 9 சதவீதம் அதிகரித்து, 2,431 கோடி ரூபாயாக உயர்ந்துள்ளது.இதே காலத்தில், டாலர் அடிப்படையிலான வருவாய், 205 கோடி டாலராக அதிகரித்துள்ளது.இதன் மூலம், இந்திய தகவல் தொழில்நுட்ப துறையில், எச்.சி.எல்., நிறுவனம், விப்ரோவை விஞ்சி, மூன்றாவது இடத்திற்கு முன்னேறி உள்ளது.விப்ரோ நிறுவனம், நடப்பு நிதியாண்டின், ஏப்., – ஜூன் வரையிலான காலாண்டில், 202 கோடி டாலர் ஈட்டியிருந்தது குறிப்பிடத்தக்கது.இந்திய தகவல் தொழில்நுட்ப துறையில், டாடா கன்சல்டன்சி நிறுவனம், தொடர்ந்து முதலிடத்தில் உள்ளது. இந்நிறுவனம், மதிப்பீட்டு காலாண்டில், 505 கோடி டாலர் வருவாய் ஈட்டியுள்ளது.
சாதனை : இன்போசிஸ் நிறுவனம், 283 கோடி டாலர் வருவாயுடன், இரண்டாவது இடத்தில் உள்ளது.எச்.சி.எல்., டெக்னாலஜிஸ் நிறுவனத்தின், தலைமை செயல் அதிகாரி, சி.விஜயகுமார் வெளியிட்டுள்ள அறிக்கை:நடப்பு நிதியாண்டில், எஞ்சிய ஒன்பது மாதங்களில், நிறுவனத்தின் வருவாய் வளர்ச்சி, டாலர் அடிப்படையில், 8.4 – 10.4 சதவீதமாக இருக்கும்.நிறுவனத்தின் முதல் நிலை வர்த்தகத்தில், தொலைதொடர்பு, நிதிச் சேவை, எரிசக்தி ஆகிய துறைகள் இடம் பெற்றுள்ளன. இத்துறைகள் சார்ந்த வர்த்தகம், மந்தநிலையில் இருந்து மீண்டதால், மதிப்பீட்டு காலாண்டில், வருவாய் அதிகரித்துள்ளது. சாதனை அளவாக, 27 ஒப்பந்தங்கள் கையெழுத்தாகியுள்ளன. மேலும், ‘கிளவுட், டிஜிட்டல், அனலிட்டி’ தொழில்நுட்பங்களை உள்ளடக்கிய, நிறுவனத்தின், இரண்டாம் நிலை வர்த்தகமும், நன்கு இருந்தது.நிறுவனத்தின் மூன்றாம் நிலை வர்த்தகம் வாயிலான வருவாய், எச்.சி.எல்., சாப்ட்வேர்கள், காப்புரிமை பயன்பாட்டிற்கான, ‘ராயல்டி’ ஆகியவற்றின் மூலம் கிடைக்கிறது.இப்பிரிவும், சிறப்பாக செயல்பட்டு, நிறுவனத்தின் வருவாய் உயர வழிகோலியது.எதிர்காலத்தில், நிறுவனத்தின் வளர்ச்சிக்கு, இரண்டு மற்றும் மூன்றாம் நிலை வர்த்தகங்கள் தான் துணை புரியும் என்ற திடமான நம்பிக்கை உள்ளது. அப்பிரிவுகள் தான் சந்தையில் கோலோச்சும் என்பதால், அவற்றில் தொடர்ந்து முதலீடு செய்யப்படும்.இவ்வாறு அவர் கூறினார்.
39 நாடுகளில்...: தமிழகத்தைச் சேர்ந்த, சிவநாடார், எச்.சி.எல்., என்ற, ஹிந்துஸ்தான் கம்ப்யூட்டர்ஸ் நிறுவனத்தை, 1976ல் உருவாக்கினார். இந்நிறுவனம், 1991ல், எச்.சி.எல்., டெக்னாலஜிஸ் என்ற பெயருடன், சாப்ட்வேர் சேவைகளில் களமிறங்கியது. இதன் தலைமை அலுவலகம், உத்தர பிரதேச மாநிலம், நொய்டாவில் உள்ளது. இத்துடன், அமெரிக்கா, பிரிட்டன், பிரான்ஸ் உள்ளிட்ட, 39 நாடுகளில், அலுவலகங்கள், கண்டுபிடிப்பிற்கான ஆய்வுக் கூடங்கள், வினியோக மையங்கள் உள்ளன. இந்நிறுவனத்தில், 1.20 லட்சம் பேர் பணியாற்றுகின்றனர். கடந்த மே மாத நிலவரப்படி, எச்.சி.எல்., குழுமத்தின் வருவாய், 780 கோடி டாலராக உள்ளது.
மேலும் பொது செய்திகள்
|
Advertisement
|
Advertisement
|
Advertisement
|
|
|
|